މި މަހު 6000 އަށްވުރެ ގިނަ ދިވެހިން އުމުރާ އަށް ދިޔަ
ރާއްޖެއިން މި ޑިސެންބަރު މަހުގެ ތެރޭގައި އެކި ކުންފުނިތަކުގެ ހަވާލުގައި 6373 ވުރެ ގިނަ މީހަކު އުމްރާގެ އަޅުކަން އަދާކުރަން ގޮސްފައިވާ ކަމަށް އިސްލާމިކް މިނިސްޓަރު ޑރ މުހައްމަދު ޝަހީމް އަލީ ސައީދު މިއަދު ވިދާޅުވެއްޖެ އެވެ.
'އެކްސް'ގައި ކުރި ޕޯސްޓެއްގައި ޝަހީމް ވިދާޅުވީ އުމްރާއަށް ދިޔަ އެންމެންގެ ހާލުވެސް ރަނގަޅު ކަމަށެވެ.
މި ދުވަސްވަރަކީ ސްކޫލްތަކުގެ ޗުއްޓީ ދުވަސްވަރަށްވާއިރު އާންމުކޮށް ޑިސެންބަރު އުމްރާއަށް ގިނަ އަދަދެއްގެ ބަޔަކު ރާއްޖެއިން މައްކާއަށް ދެ އެވެ.
ހައްޖު އަދި އުމްރާ ގްރޫޕުތަކުން މިހާރު އާންމުކޮށް އުފައްދާފައިވާ ޕެކޭޖްތަކަށް ބަދަލުތަކެއް ގެނެސް، ހާއްސަކޮށް ޒުވާނުންނަށް އަގުހެޔޮ ޕެކޭޖުތައް ތައާރަފްކުރުމަށް ޝަހީމް ވަނި ގޮވާލައްވާފައި އެވެ.
މިނިސްޓަރު ވިދާޅުވީ ރައީސް ޑރ މުހައްމަދު މުއިއްޒުގެ އަމާޒަކީ ހައްޖާއި އުމްރާގެ ނިޒާމަށް ހެޔޮ ބަދަލުތަކެއް ގެނެސް ރައްޔިތުންނަށް ލުއިފަސޭހަކަމާއެކު ހެޔޮ އަގުގައި އަޅުކަން އަދާކުރެވޭނެ މަގު ތަނަސްކޮށްދިނުން ކަމަށެވެ.
ރާއްޖެ އާންމުކޮށް މިހާރު އުމްރާއަށް ގެންދާ ޕެކޭޖްތަކުގައި، ކޮންމެ މީހަކަށް ނުދެވިދާނެކަން ފާހަގަކުރައްވާ ޝަހީމް ވިދާޅުވީ 20،000ރ އަށް ނުވަތަ 15،000ރ އަށް ލިބޭ ޕެކޭޖުތަކެއް ތައާރާފް ކޮށްފިނަމަ ގާބިލުކަން ހުންނަ މީހުން ގިނަވާނެ ކަމަށެވެ.
ޝަހީމް ވިދާޅުވީ މައްކާ އާއި މަދީނާގައި ވެސް ޕެކޭޖްތަކުގެ އަގު ބޮޑުވަނީ ހަރަމްފުޅާ ކައިރިން ހޮޓަލްތައް ނަގާތީ ކަމަށާއި އަޒީޒިއްޔާގައި ތިބޭ ގޮތަށް ހުޅުވާލާ ޕެކޭޖުތައް އަގުހެޔޮވާނެ ކަމަށެވެ.
އުމްރާގެ އަގުހެޔޮ ކުރާކަށް ނުޖެހެއެވެ. ކެރިފޯރުންތެރިކަން ނެތް މީހުން ނުދާނީއެވެ