ފްލެޓާއި ގޯއްޗާ ގުޅޭ މައްސަލައަށް 16 މީހަކު މައުލޫމާތު ދިފި
ފުލުހުން ތަހުގީގުކުރަމުންދާ ގެދޮރުވެރިޔާ އަދި ބިންވެރިޔާ ސްކީމާގުޅޭ މައްސަލައިގެ ތަހުގީގުގަށް މައުލޫމާތު އެއްކުރުމަށް ގާއިމްކުރި ޕޯޓަލަށް މިހާތަނަށް ޖުމުލަ 16 ފަރާތަކުން މައުލޫމާތު ހުށަހަޅާފައިވާ ކަމަށް ފުލުހުން މިއަދު ބުނެފި އެވެ.
މީޑިއާތަކާ ހިއްސާކުރި މެސެޖެއްގައި ފުލުހުން ބުނީ ޕޯޓަލަށް މައުލޫމާތު ހުށަހެޅި ފަރާތްތަކުގެ ތެރެއިން 4 ފަރާތަކުން ގުޅުންހުރި ލިޔެކިޔުން ވެސް ފުލުހުންނާ ހިއްސާކޮށްފައިވާ ކަމަށެވެ.
އެ ޕޯޓަލް މެދުވެރިކޮށް އަދިވެސް މައުލޫމާތު ހުށަހެޅޭނެ ކަމަށް ފުލުހުން ބުންޏެވެ.
"މައުލޫމާތާއި ހެކި ހިއްސާކުރައްވާއިރު އަމިއްލަ މައުލޫމާތު ހާމަނުކޮށް ވެސް ހުށަހެޅުއްވިދާނެ އެވެ. ނުވަތަ ތަހުގީގުކުރާ ފަރާތްތަކުން ގުޅަން ބޭނުންވެއްޖެ ހާލަތުގައި ގުޅޭނެ މައުލޫމާތާއެކުވެސް ހިއްސާކުރެއްވިދާނެއެވެ." ފުލުހުން ބުންޏެވެ.
ގެދޮރުވެރިޔާގެ މައްސަލައާއި ބިންވެރިޔަ ސްކީމްގެ މައްސަލަ ފުލުހުން ބަލަމުންދާއިރު ބިންވެރިޔާގެ ސްކީމުން ގޯތި ނުލިބޭ ބަޔަކަށް ގޯތި ލިބުނު މައްސަލައެއް ވަނީ ފެންމަތިވެފަ އެވެ.
އެ މައްސަލައިގެ ތަހުގީގު ކުރިއަށްދާއިރު އޭސީސިން ވެސް ދަނީ މައްސަލަ ބަލަމުންނެވެ. އަދި އެ މައްސަލައާ ގުޅޭ ބައެއް ފަރާތްތަކުގެ ޕާސްޕޯޓްވެސް ވަނީ ހިފަހައްޓައިފަ އެވެ.
ގެދޮރުވެރިޔާ ސްކީމުގައިވެސް ބޮޑެތި މައްސަލަތަކެއް އުޅޭއިރު ޝަރުތު ހަމަނުވާ އެތައް ބަޔަކަށް ފްލެޓްތައް ލިބުނުކަންވެސް ވަނީ ހާމަވެފަ އެވެ.
ފްލެޓްތަކުގެ ލިސްޓު އާންމުކުރުމަށް މި ސަރުކާރުން އެތައް ތާރީހުތަކެއް ވެސް ދިނެވެ. އެހެން ނަމަވެސް މިހާރު ވަނީ އެ ލިސްޓު އާންމުކުރުން މުއްދަތެއް ނެތް ގޮތަށް ފަސްކޮށްފަ އެވެ.
