ވެމްކޯއިން ސިޓީތަކާއި ރަށްރަށުގައި އާންމު އުޅަނދުތަކުން ނަގާ ގޭޓުފީ ކުޑަކޮށްފި
ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ) އިން ނަގާ ގޭޓުފީގެ އަގު ކުޑަކޮށްފި އެވެ.
ސަރުކާރުގެ ގެޒެޓްގައި އެ ކުންފުނިން އިއްޔެކުރި އިއުލާނުގައި ބުނީ ރާއްޖޭގެ ސަރަހައްދީ ސިޓީތަކާއި ރަށްރަށުގައި ފޯރުކޮށްދޭ ހިދުމަތްތަކުގެ ތެރެއިން ކުނި މެނޭޖްކުރާ މަރުކަޒުތަކަށް ކުނި އުކާލާ ފަރާތްތަކުން ނަގާ ގޭޓްފީއަށް މިއަދުން ފެށިގެން މުހިންމު ބަދަލެއް ގެންނާނެ ކަމަށެވެ.
އެގޮތުން އަމިއްލަ ފަރާތްތަކުން ގޭޓުފީގެ ގޮތުގައި ނެގުމަށް ހަމަޖެހިފައިވާ އަގު ކުނި އުފުލާ އުޅަނދުގެ ރަޖިސްޓަރީ ކުރެވިފައިވާ ބަރުދަނަށް ބަލައި, ޓަނަކަށް 212 ރުފިޔާއިން ޓަނަކަށް 106 ރުފިޔާއަށް ކުޑަކުރެވިފައިވާ ކަމަށް ވެމްކޯއިން ބުންޏެވެ.
އެ ފީ ނެގުމަށް ހަމަޖެހިފައިވަނީ ޓްރާންސްފާ ސްޓޭޝަނަށް ކުނި ބަރުކޮށްގެން ގެންނަ ކުނި އުފުލާ އުޅަނދު ރަޖިސްޓްރީ ކުރެވިފައިވާ 'އުފުލޭ ބަރުދަނަށް' ބަލައިގެންނެވެ.
ވެމްކޯއިން ދޭ ބައެއް ހިދުމަތްތަކާއި އަގުތަކަށް ބަލާއިއިރު، ގޭގެއިން ކުނި ނަގައިދޭނީ މަހަކަށް 150 ރުފިޔާގެ ރޭޓުންނެވެ.
އޭގެ އިތުރުން ކޮމާޝަލް މަސައްކަތްކުރާ ތަންތަނުގެ ތެރެއިން ކުނި އުކާލާ ކޮންމެ ދުވަހަކަށް ވިޔަފާރިތަކުން ކުނި ނަގަނީ ލީޓަރަކުން 0.20 ރުފިޔާގެ ރޭޓުން ކަމަށްވާއިރު، ސަރުކާރުގެ އިދާރާތަކުން ލީޓަރެއް 1.27 ރުފިޔާގެ ރޭޓުންނެވެ.
