އެއް މިލިއަނުގެ ޖޫރިމަނާ އެއް މަސް ތެރޭ ދައްކަން އަދީބަށް ހުކުމްކޮށްފި
ދައުލަތަށް ދައްކަން ޖެހޭ އެއް މިލިއަން ރުފިޔާގެ ޖޫރިމަނާ އެއް މަސް ދުވަހުގެ ތެރޭގައި ދެއްކުމަށް ކުރީގެ ނައިބު ރައީސް އަހުމަދު އަދީބުގެ މައްޗަށް ސިވިލް ކޯޓުން ހުކުމްކޮށްފި އެވެ.
އެ ފައިސާއަކީ ކުރީގެ ރައީސް އަބްދުﷲ ޔާމީންގެ ވެރިކަމުގައި އަދީބު އިސްވެ ހުންނަވައި ހިންގި އެމްއެމްޕީއާރުސީގެ ކޮރަޕްޝަންގެ މައްސަލައާ ގުޅިގެން ކުރި ޖޫރިމަނާގެ ބާކީއަށްވާ ފައިސާ އެވެ.
އަދީބުގެ މައްޗަށް ކުރި ދެ ދައުވާ އެއް ސާބިތުވެ، ކޮންމެ ދައުވާއަކުން ވެސް އެއް މިލިއަން ރުފިޔާ ދައްކަން 2020 ވަނަ އަހަރު ހުކުމްކުރިއިރު އަދީބު ދެއްކީ އޭގެ ތެރެއިން އެއް މިލިއަން ރުފިޔާ އެވެ.
އެ މައްސަލައިގައި އެއް މަސް ދުވަހުގެ ތެރޭގައި އެއް މިލިއަން ރުފިޔާ ދައްކަން ހުކުމްކުރި ނަމަވެސް އަދީބުގެ ފަރާތުން ބުނެފައިވަނީ އެއް ފަހަރާ ފައިސާ ދައްކަން ދަތި ކަމަށެވެ.
އެހެންވެ އެ ފައިސާ ނަގައިދިނުމަށް އެދި ދައުލަތުން އޮތީ ސިވިލް ކޯޓުގައި ދައުވާކޮށްފަ އެވެ.
އެ މައްސަލައިގައި އިއްޔެ ސިވިލް ކޯޓުން ވަނީ ނުދައްކާ އޮތް އެއް މިލިއަން ރުފިޔާ މަސް ދުވަސް ތެރޭގައި މީރާއަށް ދައްކަން އަދީބުގެ މައްޗަށް ހުކުމްކޮށްފަ އެވެ.
އެމްއެމްޕީއާރުސީގެ ހިޔާނާތާ ގުޅިގެން އަދީބުގެ މައްޗަށް 7 ދައުުވާއެއް އުފުލި އެވެ. އެ ދައުވާތައް ސާބިތުވުމުން 20 އަހަރުގެ ޖަލު ހުކުމެއް އިއްވި ނަމަވެސް ފަހުން ހުކުމް ތަންފީޒު ކުރެއްވީ ގޭގައި ހުންނަވައިގެންނެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަން ނިމެން އުޅެނިކޮށް، އެމަނިކުފާނު ވަނީ އަދީބުއަށް މާފު ދެއްވާފަ އެވެ. އޭގެފަހުން އަދީބު ދިރިއުޅުއްވަމުން ގެންދަވަނީ ރާއްޖެއިން ބޭރުގަ އެވެ. ނަމަވެސް އެނބުރި ރާއްޖެ ވަޑައިގަންނަވާނެ ކަމަށް އޭނާ ވިދާޅުވެފައިވެ އެވެ.
