ތާރީހުގައި އެންމެ ގިނަ މަޝްރޫއު ހިންގާނީ މި އަހަރު: އަބްދުއްރަހީމް
ރާއްޖޭގެ ތާރީހުގައި އެންމެ ގިނަ މަޝްރޫއު ހިންގާނީ މި އަހަރު ކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.
ދައުުލަތުގެ މީޑިއާއިން މިރޭ ގެނެސްދިން "ރާއްޖެ މިއަދު" ޕްރޮގްރާމުގައި ވާހަކަދައްކަވަމުން އަަބްދުއްރަހީމް ވިދާޅުވީ މި އަހަރަށް ފާސްކޮށްފައިވާ ބަޖެޓަކީ ތަރައްގީގެ މަޝްރޫއުތަކަށް އަމާޒުކޮށްފައި އޮތް ބަޖެޓެއް ކަމަށެވެ.
އެ ބަޖެޓު މަޖިލީހުން ފަސްކޮށްދީފައިވަނީ ސަރުކާރުން ހުށަހެޅުއްވި ގޮތަށް ކަމަށެވެ. އެ ބަޖެޓު ފާސްކޮށްދިނީ ހިތުހުރި ގޮތަކަށް ރައީސް ޑރ. މުހައްމަދު މުއިއްޒު އެ ބަޖެޓު ހޭދަކުރައްވަން ނޫން ކަމަށް ވެސް އެމަނިކުފާނު ވިދާޅުވި އެވެ.
"އަޅުގަނޑު ދަންނަވާނީ ދިވެހިރާއްޖޭގައި މިހާތަނަށް ތަރައްގީގެ މަޝްރޫއު ނުހިނގާ ވަރަށް އިރާދަކުރެއްވިއްޔާ މި އަހަރު ތަރައްގީގެ މަޝްރޫއުތައް ހިނގަމުންދާނެޔޭ،" އަބްދުއްރަހީމް ވިދާޅުވި އެވެ.
އަބްދުއްރަހީމް ވިދާޅުވީ ރައީސް ބޭނުންފުޅުވާ ކަންކަން ކުރައްވަން މި ފަހަރުގެ ބަޖެޓުގައި އެމަނިކުފާނަށް ދަތިކަމެއް ނޯންނާނެ ކަމަށެވެ.
މިފަހުން ރަށްރަށަށް ކުރެއްވި ޒިޔާރަތުގައި ރައީސް އެންމެ ބޮޑަށް ފާހަގަކުރެއްވި މައްސަލައަކީ ނިމިގެން ދިޔަ އަހަރު ސަރުކާރުން ބޭނުންވި ގޮތަށް މަޝްރޫއުތައް ނުގެންދެވުމުގެ މައްސަަލަ އެވެ. އެމަނިކުފާނު ވިދާޅުވެފައިވަނީ އެ ގޮތަށް މަޝްރޫއުތައް ނުގެންދެވުނީ ކުރީ ސަރުކާރުން ބަޖެޓު ފާސްކޮށްފައި އޮތް ގޮތުން ކަމަށެވެ.
އަންނަ އަހަރު ސަރުކާރުން އެންމެ ބޮޑު އިސްކަމެއް ދޭން ނިންމާފައިވަނީ ބޯހިޔާވަހި ކަމަށެވެ. އެކަމަށް ޓަކައި އަންނަ އަހަރުގެ ބަޖެޓުގައި 4.8 ބިލިއަން ރުފިޔާ ވަނީ ހިމަނާފަ އެވެ.
