އިންޑިއާއާ އިތުރަށް ގުޅުން ބަދަހިކުރަން ރައީސް ބޭނުންފުޅުވޭ: ހަލީލް
ރާއްޖެއާ އިންޑިއާ ދެމެދު އޮންނަ ގުޅުން އިތުރަށް ބަދަހިކުރައްވަން ރައީސް ޑރ މުހައްމަދު މުއިއްޒު ބޭނުންފުޅުވާ ކަމަށް ފޮރިން މިނިސްޓަރު ޑރ އަބްދުﷲ ހަލީލް ވިދާޅުވެއްޖެ އެވެ.
ރަސްމީ 3 ދުވަހެއްގެ ދަތުރެއްގައި ބުރާސްފަތި ދުވަހު އިންޑިއާއަށް ވަޑައިގެންނެވީ ހަލީލް ވަނީ ވެރިރަށް ދިއްލީގައި އެގައުމުގެ އެކްސްޓާނަލް އެފެއާސް މިނިސްޓަރު ޑރ ސުބްރަމަނަޔަމް ޖައިޝަންކަރާ ބައްދަލުކުރައްވާފަ އެވެ. ދެ ގައުމުގެ ސަރުކާރުގެ ދެމެދުގައި ކުރިއަށް ދިޔަ އެ ބައްދަލުވުމުގައި ރާއްޖެއާ އިންޑިއާއާ ދެމެދުގައި ހެދިފައިވާ އެއްބަސްވުންތަކާއި ލިބިފައިވާ ކުރިއެރުންތަކާ ގުޅޭ ގޮތުން މަޝްވަރާ ކުރެވުނެވެ.
އެ ބައްދަލުކުރެއްވުމުގައި ހަލީލް ވިދާޅުވީ "ނެއިބަހޫޑް ފަސްޓް" ސިޔާސަތުގެ ދަށުން އިންޑިއާ އަކީ ރާއްޖޭގެ މުހިއްމު ބައިވެރިއެއްގެ އިތުރުން ބޮޑު އަހައްމިޔަތުކަމެއްދޭ ގައުމެއް ކަމަށެވެ. އެގޮތުން އިންޑިއާ ސަރުކާރުން އަބަދުވެސް ރާއްޖެއަށް އެއްބާރުލުން ދީ، ކަންކަމުގައި ބޭނުންވާ ދަނޑިވަޅެއްގައި އެހީވެދެމުންދާކަން މިނިސްޓަރު ފާހަގަކުރެއްވި އެވެ.
"ރައީސް މުއިއްޒު އުއްމީދު ކުރައްވަނީ އިންޑިއާ ސަރުކާރާ ގުޅިގެން މި ޕާޓްނާޝިޕް އިތުރަށް ހަރުދަނާ ކުރުމަށް މަސައްކަތް ކުރައްވާނެ ކަމަށް. އަޅުގަނޑު މިއަދު މިއައީ ރާއްޖެ-އިންޑިއާ އެކުވެރިކަން އިތުރަށް ބަދަހިކުރުމަށް ރައީސް ދެއްވާ މެސެޖު ތަކުރާރުކުރަން،" ހަލީލްއާ ހަވާލާދެއްވައި އިންޑިއާގެ ނޫހެއްގައި ބުންޏެވެ.
ރާއްޖެއަށް މިވަގުތު ކުރިމަތިވެފައިވާ މާލީ ގޮންޖެހުންތަކުން އަރައިގަތުމަށް އިންޑިއާއިން ވެދެއްވަމުން ގެންދަވާ އެހީތެރިކަމަށް ދިވެހި ސަރުކާރުގެ ފަރާތުން މިނިސްޓަރު ޝުކުރު އަދާކުރެއްވި އެވެ.
ހަލީލަށް މަރުހަބާ ދަންނަވަމުން ޖައިޝަންކަރު ސިފަކުރެއްވީ ރާއްޖެއަކީ އިންޑިއާގެ "ނެއިބަހޫޑް ފަސްޓް" ސިޔާސަތުގެ މުހިންމު މިސާލެއްގެ ގޮތުގަ އެވެ. ވިދާޅުވީ ރާއްޖެއަށް އެއްބާރުލުން ދިނުމުގައި އިންޑިއާ ދެމިއޮންނާނެ ކަމަށެވެ.
އިންޑިއާގެ ހިލޭ އެހީ އާއި، ލައިން އޮފް ކްރެޑިޓްގެ ދަށުން ހިނގަމުންދާ މަޝްރޫއުތައް ކުރިއަށްދާ ގޮތާމެދު ދެ ބޭފުޅުން މަޝްވަރާކުރެއްވި އެވެ. އަދި، ރާއްޖޭގެ ތަރައްގީގައި އިންޑިއާގެ އިސްދައުރު ފާހަގަކޮށް، އިގްތިސާދީ ރޮނގުން ދެ ގައުމުގެ ގުޅުން އިތުރަށް ބަދަހިކުރެވޭނެ ގޮތްތަކާމެދު މަޝްވަރާކުރެއްވި ކަމަށްވެސް ފޮރިން މިނިސްޓްރީން ބުންޏެވެ.
އެ ބައްދަލުވުމަށް ފަހު، ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓްސްގެ ފޭސް 3ގެ ފަހުމުނާގައި ދެ މިނިސްޓަރުން ސޮއިކުރެއްވި އެވެ. އެ ޕްރޮޖެކްޓްތަކަކީ ސީދާ ރައްޔިތުންނަށް އޭގެ ފައިދާ ކުރާ އަތޮޅުތަކުގައި ކުރިއަށްގެންދާ ޕްރޮޖެކްޓްތައް ކަމަށް ފޮރިން މިނިސްޓްރީން މައުލޫމާތުދެ އެވެ.
Ads by STO
