ޣައްސާން އިންޑިއާއަށް ވަޑައިގަންނަވަނީ
ޑިފެންސް މިނިސްޓަރު މުހައްމަދު ޣައްސާން މައުމޫން އަންނަ އަންގާރަ ދުވަހު ރަސްމީ ދަތުރެއްގައި އިންޑިއާއަށް ވަޑައިގަތުމަށް ހަމަޖެހިއްޖެ އެވެ.
މިއީ ޑިފެންސް މިނިސްޓަރުގެ ހައިސިއްޔަތުން ރަސްމީ ދަތުރެއްގައި ޣައްސާން އިންޑިއާއަށް ވަޑައިގަންނަވާ ފުރަތަމަ ފަހަރެވެ.
އެ ގައުމުގެ "ވިއޯން" އަށް ދެއްވި އިންޓަވިއުއެއްގައި ފޮރިން މިނިސްޓަރު ޑރ. އަބްދުﷲ ހަލީލް ވިދާޅުވީ ޣައްސާން ވަރަށް އަވަހަށް އިންޑިއާއަށް ވަޑައިގަންނަވާނެ ކަމަށެވެ. ޑިފެންސް މިނިސްޓަރުގެ ދަތުރުގައި ސަލާމަތާއި ރައްކާތެރިކަމުގެ ދާއިރާއިން ރާއްޖެ އާއި އިންޑިއާ އާ ދެމެދު އޮންނަ ގުޅުން އިތުރަށް ބަދަހިވެގެންދާނެ ކަމަށް ވިދާޅުވެފައިވެ އެވެ.
ހަލީލުގެ އިންޓަވިއުއަށް ފަހު، ވިއޯންއިން ރިޕޯޓުކޮށްފައިވާ ގޮތުން ދެ ދުވަހުގެ މުއްދަތަކަށް ކުރައްވާ ދަތުރުގައި ޣައްސާން އިންޑިއާއަށް ވަޑައިގަންނަވާނީ އަންގާރަ ދުވަހު އެވެ. އޭނާ ވާނީ މި ފެށުނު އާ އަހަރު އިންޑިއާއަށް ރަސްމީ ދަތުރެއްގައި ވަޑައިގަންނަވާ ފުރަތަމަ ޑިފެންސް މިނިސްޓަރަށެވެ.
ޑިފެންސް މިނިސްޓަރު އިންޑިއާއަށް ދަތުރެއް ކުރައްވަން ނިންމަވާފައިވާއިރު، ފޮރިން މިނިސްޓަރު ޑރ. އަބްދުﷲ ހަލީލް ވަނީ އިންޑިއާއަށް މިފަހުން ރަސްމީ ދަތުރެއް ކުރައްވާފަ އެވެ. ތިން ދުވަހުގެ އެ ދަތުރުގައި ހަލީލް އިންޑިއާއަށް ވަޑައިގެންނެވީ މިދިޔަ ބުރާސްފަތި ދުވަހު އެވެ.
ހަލީލުގެ ދަތުރުގައި އިންޑިއާގެ އެކްސްޓާނަލް އެފެއާޒް މިނިސްޓަރު ޖައިޝަންކަރާ ހުކުރު ދުވަހު ބައްދަލުކުރެއްވި އެވެ. އެ ބައްދަލު ކުރެއްވުމަށްފަހު "ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓްސްގެ ފޭސް 3" ގެ އެއްބަސްވުމުގަ ސޮއިކުރެއްވި އެވެ. އެ އެއްބަސްވުމުގެ ދަށުން ކުރިއަށް ގެންދާ ޕްރޮޖެކްޓްތަކަކީ ސީދާ ރައްޔިތުންނަށް އޭގެ ފައިދާ ކުރާ ގޮތަށް އަތޮޅުތަކުގައި ކުރިއަށްގެންދާ ޕްރޮޖެކްޓްތަކެކެވެ.
