ދަރަނި ނެގުމުގެ ބަދަލުގައި އެތެރޭގެ އިސްލާހު ގެނައުން މުހިންމު: ޕާކިސްތާނު ރިޕޯޓް
ޕާކިސްތާނުގެ ދާއިމީ މާލީ ހީނަރުކަން ރަނގަޅުކުރުމަށް ދަރަނި ނެގުމުގެ ބަދަލުގައި އެތެރޭގެ އިސްލާހު ގެނައުމަކީ މުހިންމުކަމެއް ކަމަށް ޕާކިސްތާނުގެ މާހިރުން ބުނެފި އެވެ.
ޕާކިސްތާނުގެ މާހިރުން ބުނީ ބޭރުގެ ފަރާތްތަކުން ދަރަނި ނެގުމުގެ ބަދަލުގައި، އެތެރޭގެ ނިޒާމުތައް ހަރުދަނާކޮށް، ކޮރަޕްޝަން ހުއްޓުވުމަކީ މިހާރު އޮތް އެންމެ މުހިންމު ހައްލު ކަމަށެވެ.
އަފްގާން ޑައިސްޕޯރާ ވެބްސައިޓުގައި ޝާއިއުކޮށްފައިވާ ރިޕޯޓެއްގައި ބުނީ ޕާކިސްތާނުގެ އިގްތިސޯދީ ހާލަތު ދަށަށް ދިއުމުގެ މައިގަނޑު ސަބަބުތަކުގެ ތެރޭގައި ހިމެނެނީ ސަރުކާރުގެ އިދާރާތަކުގައި އޮންނަ ކޮރަޕްޝަނާއި، ޓެކްސް ނުދެއްކުމާއި، އަދި ސަރުކާރުގެ ހަރަދުތައް ބޮޑުވެފައިވުން ކަމަށެވެ. އަދި ސިޔާސީ ހަމަނުޖެހުންތަކާއި، ބޭރުގެ އެހީއަށް ބަރޯސާވުން ވެސް ވަނީ މައްސަލަ ގޯސްވާން މަހުފަހިކޮށްދީފައި ކަމަށް ރިޕޯޓުގައި ބުންޏެވެ.
މީގެ އިތުރުން ރިޕޯޓުގައި ބުނީ ޕާކިސްތާނުގެ އިގްތިސޯދު ރަނގަޅުކުރުމަށް އައިއެމްއެފް ފަދަ ބައިނަލްއަގްވާމީ މާލީ އިދާރާތަކުން ދަރަނި ނެގުމަކީ ވަގުތީ ހައްލެއް ކަމުގައި ވިޔަސް، ދާއިމީ ހައްލެއް ނޫން ކަމަށެވެ.
މީގެ ބަދަލުގައި، އެތެރޭގެ އިސްލާހުތަކެއް ގެނެސް، ކޮރަޕްޝަން ހުއްޓުވައި، ޓެކްސް ނިޒާމު ހަރުދަނާކޮށް، އަދި ސަރުކާރުގެ ހަރަދުތައް ކުޑަކުރުމަކީ މުހިންމު ކަމެއް ކަމަށްވެސް ރިޕޯޓުތަކުން ދައްކަ އެވެ.
މި މައްސަލައަށް ހައްލު ހޯދުމަށް ޕާކިސްތާނުގެ ސަރުކާރުން އަވަސް ފިޔަވަޅުތަކެއް އަޅަންޖެހޭ ކަމަށް މާހިރުން ވަނީ އިންޒާރުދީފަ އެވެ. އެ ނޫންނަމަ ގައުމުގެ އިގްތިސޯދީ ހާލަތު އިތުރަށް ދަށަށް ގޮސް، އާންމު ރައްޔިތުންނަށް އޭގެ ނޭދެވޭ އަސަރުތައް ކުރާނެ ކަމަށްވެސް މާހިރުން ފާހަގަކުރެ އެވެ.
Ads by STO
