ޓޫރިޒަމް ކުރިއަރުވަންޏާ އުދުހުންތައް އިތުރުކުރަން ޖެހޭ: އަމީން
ރާއްޖޭގެ ޓޫރިޒަމް ކުރިއެރުވޭނީ އެއާލައިންތަކުން ބޭރަށްކުރާ ދަތުރުތައް އިތުރުކޮށްގެން ކަމަށް ޓްރާންސްޕޯޓް އެންޑް ސިވިލް އޭވިއޭޝަން މިނިސްޓަރު މުހައްމަދު އަމީން މިއަދު ވިދާޅުވެއްޖެ އެވެ.
ގައުމީ އެއާލައިން, މޯލްޑިވިއަންގެ ފުރަތަމަ ވައިޑް- ބޮޑީ މަތިންދާބޯޓު (އެއާބަސް އޭ-330) މިއަދު ރާއްޖެ ގެނެސްފައިވާއިރު އެކަމަށް ހާއްސަ ރަސްމިއްޔާތެއް ވަނީ ބާއްވާފަ އެވެ.
އެ ރަސްމިއްޔާތުގައި މިނިސްޓަރު އަމީން ވިދާޅުވީ ރާއްޖޭގައި ދުރުު ރާސްތާ ގައުމުތަކަށް ދަތުރުކުރެވޭ އެއާލައިނެއް އޮތުމަކީ ގިނަ ބަޔަކު އުއްމީދުކުރަމުން އައިކަމެއް ކަމަށާއި، ކުރީގެ ސަރުކާރުތަކުގެ ޕޮލިސީތައް ރޭވިފައި އޮތް ގޮތުން އެކަންކަން އޮތީ މިހާތަނަށް ހާސިލުނުކުރެވި ކަމަށް މިނިސްޓަރު ވިދާޅުވި އެވެ.
އަމީން ވިދާޅުވީ އަލަށް ގެނައި ބޮޑު ބޯޓާއެކު ރިސޯޓް އޮކިއުޕަންސީއާއި ސީޕްލޭން އޮޕަރޭޝަންސްތައް އަދި އެތެރޭގެ އުދުހުންތައް ވެސް އިތުރުވެގެންދާނެ ކަމަށެވެ.
"ޓޫރިޒަމް އިންޑަސްޓްރީ އިތުރަށް ތަރައްގީކުރަން ބޭނުންވާނަމަ އޭވިއޭޝަން ސެކްޓާ އިތުރަށް ތަރައްގީނުކޮށް އެކަން ކުރުމަކީ ވަރަށް ދަތިކަމެއް. އެއާބަސް އޭ330ގެ އުދުހުންތައް ފެށުމާއެކު މޯލްޑިވިއަންގެ ބައިނަލްއަގުވާާމީ މަންޒިލްތައް އިތުރުވެ ރާާއްޖެއަށް އަންނަ ޓޫރިސްޓުުންގެ އަދަދުވެސް އިތުރުވެގެންދާނެ" މިނިސްޓަރު ވިދާޅުވި އެވެ.
ޖާގަ ތަނަވަސް ލޯންގު ރޭންޖް މަތިންދާބޯޓު ހޯދުމުގެ ބޭނުމަކީ ހަމައެކަނި މޯލްޑިވިއަންގެ ފްލީޓް އިތުރުކުރުން އެކަނި ނޫން ކަމަށް ވިދާޅުވި އެވެ.
"މި ބޯޓުގެ ދަތުރުކުރަން ފެށުމުން ކަނެކްޓިވިޓީ އިތުރުވެ ރާއްޖޭގެ ޓޫރިޒަމްއާއި ބައިނަލްއަގުވާމީ ވިޔަފާރިތަކަށް ގިނަ ދޮރުތަކެއް ހުޅުވެ އޭގެ ފައިދާ މުޅި ގައުމަށް ކުރާނެކަން ޔަގީން. " މިނިސްޓަރު ވިދާޅުވި އެވެ.
ވައިޑް ބޮޑީ އެއާކްރާފްޓު ގެނައުމުގެ ރަސްމިއްޔާތުގައި ރައީސް ޑރ މުހައްމަދު މުއިއްޒު ވިދާޅުވީ އޮޕަރޭޝަންތައް ފެށުމާއެކު މޯލްޑިވިއަނުން ދަތުރުކުރާ މަންޒިލްތައް އިތުރުވުމުން ލިބޭ ކުރިއެރުމަކީ، ރާއްޖޭޣެ އިގްތިސާދު ފުޅާކުރުމަށްޓަކައި ފައްޓަވާފައިވާ މަސައްކަތަށް ލިބޭ ވަރަށް ބޮޑު ކުރިއެރުމެއް ކަމަށެވެ.
އެމަނިކުފާނު ވިދާޅުވީ، އެ ގޮތުގައި ފަތުރުވެރިކަމާއި، އުދުހުމުގެ ސިނާއަތަށް ކުރިއެރުންތައް ލިބިގެންދާނެ ކަމަށެވެ. އަދި މި އަހަރު ވެގެންދާނީ، ކުޑަ ދުވަސްކޮޅެއްގެ ތެރޭގައި ވަރަށް ގިނަ ހަރުފަތްތަކެއް ގިރާކޮށްގެން، އައިލެންޑް އޭވިއޭޝަނާއި އެމްއޭސީއެލަށް އިތުރު ކުރިއެރުންތަކެއް ގެނެސްދޭނޭ އަހަރަކަށް ކަމުގައިވެސް ރައީސް ވިދާޅުވި އެވެ.
މި އަހަރުގެ އޮކްޓޯބަރު މަހުގެ ތެރޭގައި ދެވަނަ، ވައިޑް-ބޮޑީ މަތިންދާބޯޓު ރާއްޖޭގައި އުދުހެންފަށާނޭ ކަމަށް ރައީސް ވިދާޅުވި އެވެ.
Ads by STO
