އެންމެ ގިނައިން ހެދީ ކަށީގެ ސާޖަރީ، ގިނައީ 35 އަހަރުން މަތީގެ މީހުން
މިދިޔަ 2022 އާއި 2023 ގައި ރާއްޖޭގައި ގިނަ އަދަދެއްގެ ކަށީގެ ސާޖަރީ ހަދާފައިވާކަން ހެލްތް މިނިސްޓްރީގެ ތަފާސް ހިސާބުތަކުން ދައްކައިފި އެވެ.
ހެލްތު މިނިސްޓްރީން އިއްޔެ އާންމުކުރި "ސާޖަރީ ޑޭޓާ ސްނެޕްޝޮޓް 2022 އަދި 2023" އިން ދައްކާ ގޮތުގައި އެ ދެ އަހަރު ޖުމްލަ 40،325 ސާޖަރީއެއް ރާއްޖޭގައި ހަދާފައިވެ އެވެ.
ތަފާސް ހިސާބުތަކުން ފެންނަ ގޮތުން 2022 ވަނަ އަހަރު 19،732 ސާޖަރީއެއް ހެދި އެވެ. އަދި 2023 ވަނަ އަހަރު 20،593 ސާޖަރީއެއް ހަދާފައިވެ އެވެ.
ތަފާސް ހިސާބުތައް 2022 ވަނަ އަހަރު އަތޮޅު ހޮސްޕިޓަލްތަކާއި ރީޖަނަލް ހޮސްޕިޓަލްތަކުން 2،925 ސާޖަރީއެއް ހެދި އެވެ. އަދި 2023 ވަނަ އަހަރު އަތޮޅުތެރެއިން ހަދާފައިވަނީ 3،399 ސާޖަރީ އެވެ.
އަތޮޅުތެރޭގައި އެންމެ ގިނައިން ސާޖަރީ ހަދާފައިވަނީ ހދ. އަތޮޅާއި އައްޑޫ ސިޓީންނެވެ.
މި ދެ އަހަރު ވެސް ޖެނެރަލް ސާޖަރީއަށް ފަހު، ދެ ވަނައަށް އެންމެ ގިނައިން ހަދާފައިވަނީ ކަށީގެ ސާޖަރީތަކެވެ. 2022 ވަނަ އަހަރުގެ 2،875 ހަދާފައިވާއިރު، އޭގެ ތެރެއިން 1،670 މީހުންނަކީ ފިރެހެނުންނެވެ. އަދި 1،198 އަންހެނުންނެވެ.
2023 ވަނަ އަހަރު ރާއްޖޭގައި މުޅި ޖުމްލަ 3،312 ކަށީގެ ސާޖަރީއެއް ހެދިއިރު، އޭގެ ތެރެއިން 1،902 މީހުންނަކީ ފިރެހެނުންނެވެ. އަދި 1،410 އަކީ އަންހެނުންނެވެ.
މިނިސްޓްރީން މައުލޫމާތުދޭ ގޮތުން އެ ދެ އަހަރު ވެސް އެންމެ ގިނައިން ސާޖަރީ ހެދީ އުމުރުން 35 އަހަރުން މަތީގެ މީހުންނެވެ.
Ads by STO
