އަންނަ އަހަރު ގްރޭޑް 8 އާއި 9 ގެ ދަރިވަރުން އޯލެވެލް ހަދާގޮތަށް ހަމަޖައްސަނީ
އަންނަ އަހަރު ގްރޭޑް 8 އަދި 9 ގެ ދަރިވަރުން އޯލެވެލް އިމްތިހާން ހަދާގޮތަށް ބަދަލު ގެނެސްފައިވާކަން އެޑިއުކޭޝަން މިނިސްޓްރީން ސްކޫލުތަކަށް އަންގައިފި އެވެ.
އެޑިއުކޭޝަން މިނިސްޓަރު މިނިސްޓަރު އިސްމާއިލް ޝަފީއު ސޮއިކުރައްވައި، އިއްޔެ ހުރިހާ ސްކޫލުތަކަށް ފޮނުވި ސާކިއުލާގައި ވަނީ ދިރާސީ އަހަރަށް ގެނައި ބަދަލާ ގުޅިގެން ސާނަވީ ނިންމާ އިމްތިހާންތަކަށް ބަދަލުތަކެއް ގެނެސްފައިވާކަން ފާހަގަކޮށްފަ އެވެ.
މި އަހަރު ގްރޭޑް 10 ގައި ކިޔަވަމުންދާ ދަރިވަރުންގެ އޯލެވެލް އިމްތިހާނު އޮންނާނީ ކޮވިޑަށް ފަހު އަމަލު ކުރަމުން އަންނަ ގޮތަށް މެއި/ ޖޫން ގައި ކަމަށް މިނިސްޓްރީން ބުންޏެވެ.
ނަމަވެސް މިހާރު ގްރޭޑް 9 ގައި ކިޔަވާ ދަރިވަރުންނަށް އަންނަ އަހަރުގެ ފެބްރުއަރީ/ މާޗް ގައި އޯލެވެލް އިމްތިހާން އޮންނާނެ ކަމަށެވެ. އަދި ގްރޭޑް 8 ގައި ކިޔަވާ ކުދިންނަށް އޯލެވެލް އިމްތިހާން އޮންނާނީ އޮކްޓޯބަރު/ ނޮވެންބަރު މަހު ކަމަށެވެ.
އެޑިއުކޭޝަން މިނިސްޓްރީން އިތުރަށް ބުނީ މި ބަދަލާ އެކު، މި އަންނަ އަހަރުގެ ދިރާސީ އަހަރު ނިންމާ އިމްތިހާނުތައް ބާއްވާނީ އޮކްޓޯބަރު/ ނޮވެންބަރު މަހު ކަމަށެވެ. އެގޮތަށް ދެން ހުރިހާ އަހަރެއްގައި ވެސް އަމަލު ކުރާނެކަން ފާހަގަކޮށްފައިވެ އެވެ.
ސްކޫލުތަކުގެ ދެވަނަ ޓާމްގެ މިޑް ބްރޭކަށްފަހު ކިޔެވުން ފަށާފައިވަނީ މިދިޔަ އާދިއްތަ ދުވަހު އެވެ. އަދި ދިރާސީ އާ އަހަރުގެ ކިޔެވުން ފެށުމަށް ހަމަޖެހިފައިވަނީ އަންނަ އެޕްރީލު މަހުގެ 6 ވަނަ ދުވަހު އެވެ.
