ގައުމީ ކޮމްޕިއުޓާ ވިއުގަ އަޕްގްރޭޑްކުރަން ބޭނުންވާ ދިރާސާތައް ހަދަން ލަންކާ ކުންފުންޏަކާ ހަވާލުކޮށްފި
ގައުމީ ކޮމްޕިއުޓާ ވިއުގަ (ނޭޝަނަލް ކޮމްޕިއުޓާ ނެޓްވޯކް (އެންސީއެން) ގެ ހިދުމަތް ހަރުދަނާކޮށް، ކެޕޭސިޓީ އިތުރުކުރުމަށްޓަކައި ބޭނުންވާ ދިރާސާ ހެދުމަށް ބޭރުގެ ކުންފުންޏަކާ ހޯމްލޭންޑް އެންޑް ސެކިއުރިޓީ މިނިސްޓްރީން މިއަދު ހަވާލުކޮށްފި އެވެ.
އެ މަސައްކަތް ސްރީލަންކާގެ ކުންފުންޏެއް ކަމަށްވާ އެން-އޭބަލް ޕްރައިވެޓް ލިމިޓެޑާއި ހަވާލުކުރުމަށް ހާއްސަ ރަސްމިއްޔާތެއް ވެސް ބާއްވައިފަ އެވެ. އެ އެއްބަސްވުމުގައި ރާއްޖޭގެ ފަރާތުުން ސޮއިކުރީ ހޯމް މިނިސްޓްރީން ނެވެ.
މިއީ ވޯލްޑް ބޭންކްގެ ހިލޭ އެހީގެ ދަށުން ހޯމް މިނިސްޓްރީން ކުރިއަށްގެންދާ ޑިޖިޓަލް މޯލްޑިވްސް ފޯ އެޑަޕްޓޭޝަން، ޑީސެންޓްރަލައިޒޭޝަން އެންޑް ޑައިވަރސިފިކޭޝަން (ޑީމެޑް) ޕްރޮޖެކްޓްގެ ދަށުން ފޯރުކޮށްދޭ ފަންނީ އެހީތެރިކަމެއް ކަމަށް ހޯމް މިނިސްޓްރީން ބުންޏެވެ.
މިނިސްޓްރީން ބުނީ އެ މަޝްރޫއުގެ ދަށުން ގައުމީ ކޮމްޕިއުޓާ ވިއުގަ އަޕްގްރޭޑްކުރަން ނިންމާފައި ވަނީ ސޮފްޓްވެއާ ޑިފައިންޑް ވައިޑް އޭރިއާ ނެޓްވޯކް (އެސްޑީވޭން) ޓެކްނޯލޮޖީއަށް ބިނާކޮށް ކަމަށެވެ.
އެސްޑީވޭން ޓެކްނޯލޮޖީއަކީ އިންޓަނެޓް މެދުވެރިކޮށް ރައްކާތެރިކަމާއެކު އެކި ޖިއޯގްރަފިކް ލޮކޭޝަންތަކުގައި ހުންނަ ބްރާންޗް އޮފީސްތައް ގުޅާލުމަށް ބޭނުންކުރާ ނެޓްވޯކް ޓެކްނޯލޮޖީއެކެވެ.
ނަމަވެސް ސަރުކާރުގެ ވަކިވަކި އިދާރާތަކާއި، އެ އިދާރަތުގެ ބްރާންޗް އޮފީސްތަކާއި، އަދި ބޭނުންކުރާ ސިސްޓަމްތަކުގެ އެކްސެސް ކައުންސިލްތަކަށް، އެއް ވިއުގައެއްގެ ތެރެއިން ދިނުމަށްޓަކައި މި ޓެކްނޯލޮޖީއަކީ ޓެކްނިކަލް އަދި މާލީގޮތުން ފީޒިބަލް ޓެކްނޯލޮޖީއެއްތޯ ދެނެގަތުމަށް އިތުރަށް ދިރާސާކުރަންޖެހޭ ކަމަށް ހޯމް މިނިސްޓްރީން މައުލޫމާތުދޭ އެވެ.
އެގޮތުން އެން-އޭބަލް ޕްރައިވެޓް ލިމިޓެޑް އަށް އެންސީއައިޓީ އިން ފޯރުކޮށްދީފައިވާ ރިކުއަޔަމަންޓާއި އެއްގޮތަށް މި ޓެކްނޯލޮޖީ ބޭނުންކުރެވޭތޯ ބެލުމަށް ޕްރޫފް އޮފް ކޮންސެޕްޓް ހެދުމުގައި އެންސީއައިޓީއަށް ފަންނީ އެހީތެރިކަން އެ ކުންފުނިން ފޯރުކޮށްދޭނެ ކަމަށް ހޯމް މިނިސްޓްރީން ބުންޏެވެ.
އެން-އޭބަލްއާ އެ މަސައްކަތް ހަވާލުކޮށްފައި ވަނީ 4 މަސް ދުވަހުން ނިންމާ ގޮތަށެެވެ.
އެންސީއެން އަކީ ސަރުކާރުގެ އިދާރާތަކުން ދޭ ހިދުމަތްތައް ޑިޖިޓަލައިޒް ކުރުމަށް އޮފީހުގެ އެތެރޭގައި ބޭނުންކުރާ އިންފޮމޭޝަން ސިސްޓަމްތައް ރަށު ކައުންސިލްތަކާއި ބްރާންޗް އޮފީސްތަކަށް ފޯރުކޮށްދިނުމާއި އަދި އެކި އިދާރާތަކުގެ މެދުގައި ޑޭޓާ ރައްކާތެރިކަމާއި ހިއްސާކުރުމަށްޓަކައި ނޭޝަނަލް ސެންޓަރ ފޯ އިންފޮމޭޝަން ޓެކްނޯލޮޖީ (އެންސީއައިޓީ) އާއި ލޯކަލް ގަވަންމަންޓް އޮތޯރިޓީ (އެލްޖީއޭ) އިން ގާއިމްކޮށްފައިވާ ކޮމްޕިއުޓާ ވިއުގައެކެވެ.
ދެހާހުގެ އަހަރުތަކުގެ ތެރޭގައި ސެޓެލައިޓް މެދުވެރިކޮށް އެ ވިއުގަ ގާއިމުކުރި ނަމަވެސް ޓެކްނޯލޮޖީއަށް އައި ކުރިއެރުމާއި އަގުތަކަށް އައި ބަދަލާއެކު 2014 އިން ފެށިގެން އެ ނެޓްވޯކް އޮޕަރޭޓްކުރަނީ ދިރާގު އަދި އުރީދޫއިން ގާއިމްކޮށްފައިވާ މުވާސަލާތީ ބިނާވެށީގަ އެވެ. ނަމަވެސް އަދި މިއީ އަގުބޮޑު ހިދުމަތަކަށްވުމާއި، އަދި އޮފީސްތަކުގެ ޑިޖިޓަލް ހިދުމަތްތަށް ގިނަވެފައިވާތީ މި ނެޓްވޯކްގެ ކެޕޭސިޓީ ވަނީ އިތުރުކުރަން ޖެހިފަ އެވެ.
އަދި މީގެ އިތުން އުމްރާނީ ތަރައްގީގެ މަސައްކަތްތައް ކުރާއިރު ރަށްރަށުގައި އަޅާފައިވާ ނެޓްވޯކް އިންފްރަސްޓްރަކްޗާ ހަލާކުވުމުގެ ސަބަބުން ހިދުމަތްތައް މެދުކެޑި އަލުން ހިދުމަތް ދޭން ފެށުމަށް ގިނަ ގޮންޖެހުންތަކެއް ކުރުމަތިވެ އެވެ.
މިއީ އެކަށީގެންވާ ޓެކްނޯލޮޖީއެއްނަމަ، ސަރުކާރުން މި ވަގުތު އެންސީއެން އަށް ކުރާ ހަރަދު އެތައްގުނައެއް ކުޑަވުމުގެ އިތުރުން ނެޓްވޯކްގެ ކެޕޭސިޓީ އިތުރުކުރެވޭނެ ކަމަށް މިނިސްޓްރީން ބުންޏެވެ. އަދި މި ނެޓްވޯކް ގާއިމްކޮށް ބެލެހެއްޓުމަށް އެންސީއައިޓީއަށް ފަސޭހަވުމާއެކު، ކައުންސިލްތަކުން ސަރުކާރާއި ގުޅިގެންދޭ އިތުރު ހިދުމަތްތަކަށް ހިދުމަތްތަކަށް މަގުފަހިވެގެންދާނެ އެވެ. އަދި މީގެ އިތުރުން އަތޮޅުތަކުގެ ތެރޭގައި ހިމެނޭ ސްކޫލް އަދި ހޮސްޕިޓަލްތަކަށްވެސް ކުޑަ ހަރަދަކުން ގައުމީ ކޮމްޕިއުޓަރުގެ ހިދުމަތް ފުޅާކުރުމުގެ ފުރުސަތުފަހިވެގެންދާނެ އެވެ.
Ads by STO
