ހައުސިން މިނިސްޓްރީގެ މުވައްޒަފުން މަދުކޮށްފާނެކަމުގެ އިޝާރާތެއް

ހައުސިން މިނިސްޓްރީގެ މުވައްޒަފުން މަދުކުރާނެ ކަމުގެ އިޝާރާތެއް ދީފި އެވެ.
ކެބިނެޓަށް ބަދަލުތަކެއް ގެނެސް މެންޑޭޓްގައި ހިމެނޭ ކަންތައްތަކެއް ދާދިފަހުން ވަނީ ބަދަލުކޮށްފަ އެވެ. އެގޮތުން ހައުސިން މިނިސްޓްރީގެ ޕްލޭނިންގެ މެންޑޭޓް ފިނޭންސް މިނިސްޓްރީއަށް ބަދަލުކޮށްފައިވާއިރު، ހައުސިންގެ މެންޑޭޓު ހަވާލުކޮށްފައިވަނީ ކޮންސްޓްރަކްޝަންސް މިނިސްޓްރީއަށެވެ.
އެ ބަދަލާއެކު މުވައްޒަފުންގެ ވަޒީފާ ގެއްލިދާނެ ކަމުގެ ވާހަކަތަކެއް ދަނީ ފެތުރެމުންނެވެ.
އެކަމާ ގުޅޭގޮތުން ސިވިލް ސާވިސް ކޮމިޝަން (ސީއެސްސީ) ގެ ރައީސް މުހައްމަދު ނާސިހު މިއަދު "ދެން" އަށް ވިދާޅުވީ މިނިސްޓްރީއެއް އުވާލުމުން އޮންނަނީ ގަވާއިދުގެ ތެރެއިން މެންޑޭޓް ބަދަލުވާ މިނިސްޓްރީތަކަށް މުވައްޒަފުން ބަދަލުކުރުން ކަމަށެވެ.
ނާސިހު ވިދާޅުވީ އާ މިނިސްޓްރީތަކުގެ އޮނިގަނޑު ހެދުމަށްފަހު އެ މަގާމުތަކަށްވުރެ މުވައްޒަފުން ގިނަވާ ކަމުގައިވާ ނަމަ، ސީއެސްސީގެ އެހެން އިދާރާތަކުން އެ މުވައްޒަފުންނަށް ފުރުސަތު ލިބޭތޯ ބަލާނެ ކަމަށެވެ.
"އެ ބަދަލުވާ މިނިސްޓްރީތަކަށް މުވައްޒަފުން ލިބުމުގެ މަސައްކަތް. އެ ނިންމާފައި ބާކީ މުވައްޒަފުން ތިބިއްޔާ ދެން އަދި ސިވިލް ސާވިސްގެ އެހެން އިދާރާތަކުގައި އެ މީހުންނަށް ޖާގަ ލިބޭތޯ ބަލާނީ. އެ ޕްރޮސެސް ނިމުނީމަ އިނގޭނީ އެ މުވައްޒަފުން ބާކީ ވާނެކަން ނޫނީ ނޫންކަން،"ހައުސިން މިނިސްޓްރީގެ ހައުސިން ޑިޕާޓްމަންޓްގެ މުވައްޒަފުން ކޮންސްޓްރަކްޝަން މިނިސްޓްރީއަށް ބަދަލުކޮށް, އާބަން ޑިޕާޓްމަންޓް މުވައްޒަފުން ފިނޭންސް މިނިސްޓްރީއަށް ބަދަލުކޮށް އަދި ޕްލޭނިން ޑިޕާޓްމަންޓް މުވައްޒަފުން ފިނޭންސް މިނިސްޓްރީއަށް ބަދަލުކުރަން ވަނީ ނިންމާފަ އެވެ. އޭގެ އިތުރުން ކޯޕަރޭޓް ޑިޕާޓްމަންޓްގައި ހިމެނޭ ފިނޭންސް މުވައްޒަފުންނާއި އާއި ޕީއާރް މުވައްޒަފުންނާއި ފްރޮކިއުމަންޓް މުވައްޒަފުންނާއި އެޗްއާރް އަދި އެޑްމިން މުވައްޒަފުން 50 އަށް ވުރެ ގިނައިރު އެ މުވައްޒަފުން އެކި މިނިސްޓްރީތަކަށް ބަދަލުކުރަން ނިންމާފައިވެ އެވެ. އެ މަސައްކަތް ކުރިއަށް ގެންދިއުމަށް ހުރިހާ މުވައްޒަފުން ސީވީ ފޮނުވަން މި ހަފްތާ ފެށުނުއިރު އަންގާފައިވާކަން "ދެން" އަށް ވަނީ އެނގިފަ އެވެ.



.jpg)
.jpeg)
ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.