ދައުރުން ބޭރު ޖަލްސާ އަންނަ ހަފްތާގައި
ރައްޔިތުންގެ މަޖިލީހުގެ ދައުރުން ބޭރު ޖަލްސާއެއް އަންނަ ބުރާސްފަތި ދުވަހު ބާއްވާ ގޮތަށް ނިންމައިފި އެވެ.
މަޖިލީހުގެ ގަވާއިދު ބުނާ ގޮތުން މަޖިލީހުގެ ތިން ވަނަ ދައުރަކީ އޮކްޓޯބަރު 1 އިން ފެށިގެން ނޮވެމްބަރު ނިޔަލަށެވެ. ނަމަވެސް މަޖިލީހުގައި މަސައްކަތްތައް ހުރުމުން މަޖިލީހުގެ މިއަހަރުގެ ތިން ވަނަ ދައުރު ނިންމާލީ މިދިޔަ މަހުގެ 12 ވަނަ ދުވަހު އެވެ.
މަޖިލީހުގެ މަސައްކަތްތައްސް އަދިވެސް ހުރުމާއެކު ދައުރުން ބޭރުން ޖަލްސާއެއް ބާއްވަން ނިންމާފައިވެ އެވެ.
މަޖިލީހުގެ ނައިބް ރައީސް އަހުމަދު ނާޒިމް "ދެން" އަށް މިއަދު ވިދާޅުވީ މި މަހުގެ 16 ވާ ބުރާސްފަތި ދުވަހުގެ އިތުުރުން މި މަހުގެ 20 ވަނަ ދުވަހުވެސް ދައުރުން ބޭރު ޖަލްސާއެއް އޮންނާނެ ކަމަށެވެ.
ޖަލްސާގެ އެޖެންޑާ އަދި މިހާތަނަށް އާއްމުކޮށްފައި ނުވިނަމަވެސް އެ ދުވަހުގެ މަސައްކަތްތަކުގެ ތެރޭގައި ހުސްވެފައިވާ އިލެކްޝަންސް ކޮމިޝަން (އީސީ) ގެ ދެ މެމްބަރުންގެ މަގާމަށް ބޭފުޅުން އައްޔަނުކުރުމަށް ވޯޓު ނެގުނުް އޮންނާނެ އެވެ.
އީސީގެ ދެ މެމްބަަރެއްގެ މަގާމު ހުސްވީ އަލީ ނަޝާތު އާއި މުހައްމަދު އާސިފް މަގާމުން ވަކިކުރަން މިިދޔަ ނޮވެމްބަރު މަހުގެ 25 ވަނަ ދުވަހު މަޖިލީހުން ފާސްކުރުމުންނެވެ.
އީސީގެ ގާނޫނު ބުނާގޮތުން އީސީގެ މެންބަރުކަމުގެ މަގާމު ހުސްވާތާ 60 ދުވަހުގެ ތެރޭގައި އެ މަގާމަށް މެންބަރަކު އައްޔަންކުރަން ޖެހޭނެ އެވެ.
އެެހެން ނަމަވެސް މަޖިލީހުގެ ދައުރު ދެން ފެށޭނީ 1 ފެބްރުއަރީގައި ކަމަށްވާތީ ދައުރުން ބޭރުން މަޖިލީހުގެ ޖަލްސާއެއް ބާއްވައިގެން މަޖިލީހުން ފާސްކޮށްގެން ނޫނީ މެމްބަރަކު އައްޔަނެއް ނުކުރެވޭނެ އެވެ.
އެ ދެ މަގާމަށް އައްޔަންކުރަން ރައީސް ފޮނުވީ ހިއުމަން ރައިޓްސް ކޮމިޝަން (އެޗްއާރުސީއެމް) ގެ ކުރީގެ ނައިބު ރައީސް, މުހައްމަދު ޒާހިދާއި ހޯމްލޭންޑް މިނިސްޓްރީގެ ކުރީގެ ޕާމަނަންޓް ސެކްރެޓަރީ އަބްދުއްރަހްމާން ސަލާހު ރަޝީދުގެނަމެވެ.
Ads by STO
