ލަންކާގެ އަރުގަމްބޭގައި ހަމަލާދޭން އުޅުނު މައްސަލާގައި ދިވެއްސަކު ހައްޔަރުކޮށްފި
ހުސްވި އަހަރުގެ އޮކްޓޫބަރު މަހު ސްރީލަންކާގެ މަޝްހޫރު ޓޫރިސްޓު ސަރަހައްދު ކަމަށްވާ އަރުގަމްބޭ ގައި ހަމަލާދޭން އުޅުނު މައްސަލާގައި ހައްޔަރުކުރި މީހުންގެ ތެރޭގައި ދިވެއްސަކު ހިމެނޭކަން "ދެން" އަށް އެނގިިއްޖެ އެވެ.
އޮކްޓޫބަރު 23، 2024 ގައި އަރުގަމްބޭގައި ހަމަލާދޭން އުޅުނު ކަމުގެ ތުހުމަތަށް ދިވެއްސަކު ހައްޔަރުކޮށްފައިވެ އެވެ. އޭނާ ހައްޔަރުކުރި ދުވަހެއް ސީދާ ނޭނގެ އެވެ.
ރާޅާ އެޅުންތެރިންގެ މެދުގައި މަޝްހޫރު އަރުގަމްބޭގައި ހަމަލާދޭން އުޅޭ މައްސަލައާ ގުޅިގެން ލަންކާ ފުލުހުންގެ ބެލުމުގެ ދަށަށް ދިވެއްސަކު ގެންގޮސްފައިވާކަން ރާއްޖެއިން ލަންކާއަށް ކަނޑައަޅުއްވާފައިވާ ސަފީރު މަސްއޫދު އިމާދު ވަނީ "ދެން" އަށް ޔަގީންކޮށްދީފަ އެވެ. އޭނާގެ ހައްޔަރާ ގުޅިގެން ލަންކާ ސަރުކާރާ ގުޅިގެން ބަލަންޖެހޭ ކަންކަން ބަލަމުންދާ ކަމަށް މަސްއޫދު ވިދާޅުވި އެވެ.
އަރުގަމްބޭ ގައި ހަމަލާދޭން އުޅުނުކަމުގެ ތުހުމަތަށް ދިވެއްސަކު ހައްޔަރުކޮށްފައިވާއިރު، އެ މައްސަލާގައި ދިވެއްސެއްގެ ދަރިއަކުވެސް ހިމެނެ އެވެ.
ލަންކާގައި ހަމަލާއެއް ދޭން އުޅޭކަމުގެ އިންޓެލް ލިބިފައިވާކަން ހާމަކުރީ އެ ގައުމުގައި ހުންނަ އެެމެރިކާގެ އެމްބަސީންނެވެ. ބައެއް މީޑިއާ ރިޕޯޓްތައް ބުނާ ގޮތުން ހަމަލާ އަމާޒުކުރަން އުޅުނީ އިޒްރޭލުގެ ފަތުރުވެރިންނަށެވެ. ހަމަލާ ރޭވީ އަފްގާނިސްތާނުގެ ފަރްހާދު ޝަކެރީ ނަމަކަށް ކިޔާ މީހެކެވެ.
ޓެރަރިސްޓު ހަމަލާއެއްގެ އިންޒާރަށް ފަހު ފަތުރުވެރިންގެ މެދުގައި މަޝްހޫރު މަންޒިލްތައް ކަމަށްވާ އެލާ އާއި ވެލިގަމާގައި ލަންކާ ފުލުހުން ވަނީ ސަލާމަތީ ފިޔަވަޅުތައް ވަރުގަދަކޮށްފަ އެވެ.
