ފެންހިންދާ ޕަމްޕް ނެގީ ނާންގާ: މުއްތަލިބު
މާލެ، މާފަންނު ސަހަރާ ކޮނުމުގެ މަސައްކަތް ކުރިއަށް ގެންދިޔައިރު އެ ސަރަހައްދުގައި ހުރި ސްޓޯމް ވޯޓާ ޕަމްޕުގެ ބައެއް ސިޓީ ކައުންސިލުން ނަގާފައިވަނީ ކޮންސްޓްރަކްޝަން މިނިސްޓްރީ އަށް ނާންގާ ކަމަށް ޑރ އަބްދުﷲ މުއްތަލިބް މިއަދު ވިދާޅުވެއްޖެ އެވެ.
މުއްތަލިބު "އެކްސް" ގައި ކުރި ޕޯސްޓެއްގައި ވިދާޅުވީ، ސިޓީ ކައުންސިލާ އެތަނުގެ ކޮންޓްރެކްޓަރުން މާފަންނު ސަހަރާ ކޮނުމުގެ މަސައްކަތް ކޮށްފައިވަނީ ޒިންމާދާރުކަން ކުޑަ ގޮތަކަށް ކަމަށެވެ.
"އަޅުގަނޑުމެން (މިނިސްޓްރީ) ގެ އެންގުމަކާ ނުލައި ފެން ހިންދާ ސްޓޯމްވޯޓާ ޕަމްޕް ސްޓޭޝަން ބައެއް ނަގާފައި" މުއްތަލިބު ވިދާޅުވީ އޭގެ ސަބަބުން ވަށައިގެންވާ ސަރަޙައްދުގައި ފެންބޮޑުވެފައިވާ ކަމަށެވެ. ޕަމްޕް އަލުން ބޭނުންކުރެވޭ ގޮތް ހެދުމުގެ މަސައްކަތް ކުރަމުންދާ ކަމަށް މުއްތަލިބު ވިދާޅުވި އެވެ.
މުއްތަލިބުގެ ޕޯސްޓު ރީޕޯސްޓްކޮށް މާލޭ މޭޔަރު އާދަމް އާޒިމް ވިދާޅުވީ ސްޓޯމްވޯޓާ ޕަމްޕް ސްޓޭޝަން ނެގުމާ ގުޅިގެން ހުރި ކަންބޮޑުވުންތައް ގަބޫލުކުރާ ކަމަށެވެ.
"އެހެންނަމަވެސް، އަޅުގަނޑު ދަންނަވާލަން ބޭނުންވަނީ، ޕަމްޕް ސްޓޭޝަން ނެގިއިރު ވެސް އެ ސްޓޭޝަން މަސައްކަތް ނުކުރާކަން" އާޒިމް ވިދާޅުވީ އެ ސްޓޭޝަނުގައި ބަހައްޓާފައި ހުރި ކަރަންޓް ސާމާނުތައް ހަލާކުކޮށްލާފައިވާ ކަމަށެވެ.
އެ ޕަމްޕު ސްޓޭޝަން މަސައްކަތްނުކުރާތާ 5 މަސް ވެފައިވާ ކަމަށް، ކައުންސިލުން މިނިސްޓްރީއަށް އެ މައްސަލާގައި ފޮނުވި ދެ ސިޓީއެއް ހިއްސާކޮށް އާޒިމް ވިދާޅުވި އެވެ.
ޕަމްޕު ސްޓޭޝަންގެ މަސައްކަތް ބެލެހެއްޓުމަށް ހަދާފައިވާ އެގްރީމެންޓުގެ މުއްދަތު ހަމަވެފައިވާ ކަމަށާ، އެ މެއިންޓެންކޮށް ބަލަހައްޓާނެ ފަރާތެއް ނެތް ކަމުގެ މައުލޫމާތު ލިބިފައިވާ ކަމަށް ސިޓީ ކައުންސިލުން ބުންޏެވެ.
ކައުންސިލުގެ ސިޓީގައި ބުނީ ވާރޭވެހޭ ދުވަސްތަކުގައި، ރަށު ތެރޭގައި ފެންބޮޑުވެ، އާއްމުންނަށް ދުވަހުގެ މަސައްކަތްތައް ކުރުމަށް ތަންތަނަށް ގޮސް، އައިސްވުމުގައި ބޮޑެތި ތަކުލީފުތައް އުފުލަން ޖެހިފައިވާ ކަމަށެވެ. އަދި އެކަން އެހެން ހުރުމާއެކު އެކަމުގެ ޝަކުވާތައްވެސް ހުށަހެޅުމުން ގެންދާ ކަމަށްވެސް ސިޓީގައިވެ އެވެ.
"ފެން ނުހިނދި ގިނައިރުވުމުގެ ސަބަބުން އާންމު ރައްޔިތުންގެ މުދަލަށް ބޮޑެތި ގެއްލުންތައް ލިބި، ފޫނުބެއްދޭވަރުގެ ދެރަ ލިބޭ ކަމުގައި ދަންނަވަމެވެ"
އާޒިމްގެ ޕޯސްޓު ނިންމާލަމުން ވިދާޅުވީ ބޭނުންވަނީ އެފަދަ މައްސަލަތައް ގުޅިގެން ހައްލުކުރުން ކަމަށެވެ.
Ads by STO
