ޒިޔާދުގެ ވަގު ފޯމް މިހާރު ވާނީ ބާތިލުކޮށްފައި: އީސީ
ވައިކަރަދޫ ދާއިރާގެ މެމްބަރު ހުސައިން ޒިޔާދު (ފިއްޓެ) ގެ ނަން މަތީގައި ވަގު ފޯމެއް ފުރައި ޕީއެންސީއަށް ވެއްދި ނަމަވެސް އެ ފޯމު މިހާރު ބާތިލުކޮށްފައިވާ ކަމަށް އިލެކްޝަންސް ކޮމިޝަނުން މިއަދު ބުނެފި އެވެ.
ޒިޔާދު ޕީއެންސީއަށް ވައްދަން ވަގު ފޯމެއް ހުށަހެޅި އިރު އެމްޑީޕީއާއި އެހެނިހެން ޕާޓީތަކުގެ މެމްބަރުން ޕީއެންސީއަށް ވަގަށް ވައްދާކަމަށް އެމްޑީޕީން ތުހުމަތުކުރަމުންދާތާ ދުވަސްތަކެއް ވަނީ ވެފަ އެވެ.
އަދި ޒިޔާދުގެ މައްސަލަ ފެންމަތިވުމުން އެމްޑީޕީން އެކަން ހަރުކަށި އިބާރާާތުން ކުށްވެރިކޮށް އެ މައްސަލަ ސީރިއަސް މައްސަލައެއްގެ ގޮތުގައި ތަހުގީގު ކުރުމަށް ކަމާ ގުޅުންހުރި އިދާރާތަކަށް އެމްޑީޕީން މިއަދު އޮތީ ގޮވާލައިފަ އެވެ.
އެ މައްސަލައާ ގުޅިގެން އިލެކްޝަންސްއިން މިއަދު ނެރުނު ބަޔާނުގައި ބުނީ ޒިޔާދަށް އެނގުމެއް ނެތި އޭނާ ޕީއެންސީއަށް ވައްދަން އުޅުނު މައްސަލަ އެ ކޮމިޝަންގެ ސަމާލުކަމަށް އައުމާއެކު ވަގު ފޯމު ބާތިލުކޮށްފައިވާ ކަމަށެވެ.
އަދި ޒިޔާދުގެ މެންބަރޝިޕް ހައިސިއްޔަތަށް އެއްވެސް ބަދަލެއް އައިސްފައިނުވާ ކަމަށް ވެސް އީސީން ބުނެފައިވެ އެވެ.
އެހެންނަމަވެސް އެ މައްސަލައިގައި އި ޒިންމާވާ ފަރާތްތަކުގެ މައްސަލަ އިތުރަށް ބަލައި ފިޔަވަޅުއަޅާނެ ކަމަށް ވެސް އީސީން ބުންޏެވެ.
އެމްޑީޕީން ބުނެފައިވާ ގޮތުން ޕީއެންސީއަށް ވަނުމަށް ފޯމު ފުރާފައި ނުވާ އެ ޕާޓީގެ ބައެއް އާންމު މެމްބަރުންނާއި ގައުމީ މަޖިލީހުގެ މެމްބަރުން ވެސް އެމްޑީޕީގެ ދަފްތަރުން އުނިކޮށް ޕީއެންސީގެ ހިމަނާފައިވާތީ އެ މައްސަލަ އީސީގެ ސަމާލުކަމަށް އެ ޕާޓީން ވަނީ އެކި ފަހަރު މަތިން އޮތީ ގެނެސްފަ އެވެ.
