ވީޑިއޯ ވަނީ އެޑިޓްކޮށްފައި، މިސްކިތުގެ ހުރުމަތް ކެނޑޭ ފަދަ ކަމެއް ނުހިނގާ: ވިލުފުށީ ކައުންސިލް
ނަލަހިޔާ އިސްލާމީ މަރުކަޒު (ވިލުފުށީ މަސްޖިދުލް އުމަރުފާރޫގު މިސްކިތް) ގެ ގަދަރު ގެއްލޭ ގޮތަށް އެއްވެސް ކަމެއް ހިނގާފައި ނުވާާ ކަމަށް ތ. ވިލުފުށީގެ ކައުންސިލުން ބުނެފި އެވެ.
ސޯޝަލް މީޑިއާގައި ދައުރުވަމުން އަންނަ ވީޑިއޯއިން ފެންނަނީ މިސްކިތެއް ކަމަށް ބެލެވޭ ތަނެއްގައި ބަޔަކު ކުޅިވަރު ހަރަކާތެއް ކުރިއަށް ގެންދާ މަންޒަރެވެ. ދެ ޖިންސުގެ މީހުން ކުޅިވަރު ކުޅުމުގައި ހަރަކާތްތެރިވާ ތަން ވީޑިއޯއިން ފެނެ އެވެ. ވީޑިއޯ ޕޯސްޓުކުރި ފަރާތުން ލިޔެފައި ވަނީ އެ ހަރަކާތް ބާއްވާފައި ވަނީ ވިލުފުށީގައި ހުންނަ މަސްޖިދުލް އުމަރު ފާރޫގްގައި ކަމަށެވެ.
އެ ވީޑިއޯ އާ ގުޅިގެން އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު "އެކްސް" ގައި ކުރެއްވި ޕޯސްޓެއްގައި ވިދާޅުވީ މިސްކިތެއް ކަމަށް ބެލެވޭ ތަނެއްގައި މިސްކިތެއްގެ ގަދަރާއި އިހްތިރާމާ ނުގުޅޭ ކަންތައްތަކެއް ކުރާ ތަން ފެންނަ ވީޑިއޯގެ މައްސަލަ މިނިސްޓްރީގެ ސަމާލު ކަމަށް އައިސްފައިވާ ކަމަށެވެ.
އެއީ ކިހިނެއް ހިނގާފައިވާ ކަމެއްތޯ ބެލުމުގެ ކަންކަން މިނިސްޓްރީން ފަށާފައިވާ ކަމަށް ވިދާޅުވި އެވެ. މިސްކިތްތަކުގެ ހުރުމަތް ކަނޑާ ފަރާތްތަކަށް ދީނީ އެއްބައިވަންތަކަން ހިމާޔަތް ކުރުމުގެ ގާނޫނާއި ގަވާއިދުގެ ދަށުން ފިޔަވަޅު އަޅުއްވާނެ ކަމުގައި މިނިސްޓަރު ފާހަގަކުރެއްވި އެވެ.
ވިލުފުށީ ކައުންސިލުގެ އިދާރާއިން މިއަދު ނެރުނު ބަޔާނުގައި ބުނީ ސޯޝަލް މީޑިއާގައި ދައުރުވަމުންދާ ވީޑިއޯއަކީ ނަލަހިޔާ އިސްލާމީ މަރުކަޒާ ގުޅުވައި ސަރުކާރާއި ކައުންސިލް އަދި ވިލުފުށީ ސްކޫލް ބަދުނާމުކޮށް ކަމުގެ ހަގީގަތް އޮޅޭ ގޮތަށް ސޯޝަލް މީޑިއާގައި ފަތުރަމުންދާ ވީޑިއޯއެއް ކަމަށެެވެ.
އަދި އެ ވީޑިއޯއިން ފެންނަ މަންޒަރުތަކަކީ މިދިޔަ އަހަރު ޓީޗަރުންގެ ދުވަސް ފާހަގަކުރުމަށް ގެންދިޔަ ހަފުލާގެ ތެރެއިން ކުރިއަށް ގެންދިޔަ ޓީމް ބިލްޑިން ހަރަކާތެއް ކަމަށެވެ. ނަމަވެސް މިހާރު ދައުރުވަމުންދާ ވީޑިއޯއަކީ މިއުޒިކް އަޅައިގެން އެޑިޓްކޮށްފައިިވާާ ވީޑިއޯއެއް ކަމަށް ވެސް ވިލުފުށީ ކައުންސިލުން ބުންޏެވެ.
"މިކަމުގެ ސަބަބުން ރައްޔިތުންގެ ހިތްތަކުގައިވަނީ ނުތަނަވަސްކަން އުފެދިގެން ގޮސްފަ އެވެ. އެހެންކަމުން ކަމުގެ ހަގީގަތް އޮޅޭ ގޮތަށް މި ވީޑިއޯ ފަތުރަމުންދާ މައްސަލަ ހަރުކަށި އިބާރާތުން ކައުންސިލްގެ ފަރާތުން ކުށްވެރިކުރަމެވެ،"
ބަޔާނުގައި ބުނީ ޓީޗަރުން ކުރަމުންދާ ބުރަ މަސައްކަތުގެ އަގުވަޒަން ކުރުމަށް ކައުންސިލުން ބޭއްވި ހަފުލާއެއްގެ ތަންކޮޅެއް ނަގައިގެން ކަމުގެ ހަގީގަތް އޮޅޭ ގޮތަށް އެއަށް މިޔުޒިކް އަޅައިގެން ރައްޔިތުންގެ މެދުގައި ސަރުކާރާއި ކައުންސިލާއި އަދި ސްކޫލުގެ ޓީޗަރުންގެ އަގުވައްޓާލައި، ނަފުރަތު އުފެއްދުމަށް މިފަދަ ނާތަހުޒީބު ދަށުދަރަޖައިގެ އަމަލެއް ހިންގުމަކީ ހިތާމަކުރާ ކަމެއް ކަމަށެވެ.
ވިލުފުށީ ކައުންސިލުން ބުނީ ނަލަހިޔާ އިސްލާމީ މަރުކަޒުގެ ނަލަމާލަމަކީ ދީނީ އަދި އިޖުތިމާއީ އެކިއެކި ބޭނުންތަކަށް ބޭނުންކުރަމުންދާ ތަނެއް ކަމަށެވެ. ރަށު ފެންވަރުގައި އަދި އަތޮޅު ފެންވަރުގައި ބާއްވާ އެކިއެކި މުބާރާތްތަކާއި ހަރަކާތްތަކަށް މީގެކުރިން ވެސް އެ ތަން ބޭނުންކޮށްފައިވާ ކަމަށެވެ. އަދި އެ ތަން ސެމިނާ ހޯލްތަކަށް ބަދަލުކުރުމުގެ ކުރިން ބޭނުން ކުރަމުން ގޮސްފައިވަނީ އަންހެނުން ނަމާދުކުރާ ބައިގެ ގޮތުގައި ކަމަށް ވެސް ކައުންސިލުން ބުންޏެވެ.
"ނަމަވެސް މިހާރު އަންހެނުން ނަމާދުކުރަނީ މިސްކިތުގެ މަތީބައިގައި އަންހެނުންނަށް ހާއްސަކޮށް ޕާޓިޝަން ޖަހައިގެން ހަދާފައިވާ ބައެއްގަ އެވެ. ނަލަމާލަމުގައި މިވަގުތު އަޅާފައިވާ ކާޕެޓަކީ މިސްކިތުގެ ނަމާދުކުރާ ބައިގައި ކުރިން އަޅާފައިވާ ކާޕެޓެވެ،"
ވިލުފުށީ ކައުންސިލުން ބުނީ އެ ކައުންސިލަކީ ދީނީ ކަންކަމަށް ހާއްސަ އިސްކަމެއްދީގެން ދީނުގެ އިލްމުވެރިންގެ ލަފަޔާއި އިރުޝާދުގެ ދަށުން ކަންކަން ކުރުމަށް އަބަދުވެސް މަސައްކަތް ކުރަމުންދާ ކައުންސިލެއް ކަމަށެވެ.
ކުރިއަށް އޮތް ތަނުގައި ވެސް ކައުންސިލުން މިސްކިތުގެ ހުރުމަތް ކެނޑޭނެ ފަދަ އަމަލެއް ނުކުރާނެ ކަމަށާއި އެފަދަ ކަމަކަށް ތަރުހީބު ނުދޭނެކަމުގެ ފުރިހަމަ ޔަގީންކަން ވިލުފުށީ ކައުންސިލުން ވަނީ ދީފަ އެވެ.
