މާލޭގައި އުޅޭ ބިދޭސީންގެ ބަޔޮމެޓްރިކް ޑޭޓާ ނަގަން ބޮޑު ހަރަކާތެއް
ރާއްޖޭގައި މަސައްކަތްކުރާ ބިދޭސީންގެ މައުލޫމާތު އެއްކުރުމަށް ހޯމްލޭންޑް ސެކިއުރިޓީ އެންޑް ޓެކްނޮލޮޖީން ގްރޭޓާ މާލެ ސަރަހައްދުގައި ބޮޑު އޮޕަރޭޝަނެއް މިއަދު ފަށައިފި އެވެ.
ހޯމްލޭންޑް މިނިސްޓްރީން ބުނީ މިއަދު ހެނދުނު 9:15 އިން ހަވީރު 6 އަށް ކުރިއަށްގެންދާ "ކުރަނގި" އޮޕަރޭޝަންގައި އެ މިނިސްޓްރީގެ 75 އޮފިޝަލުން ބައިވެރިވާނެ ކަމަށެވެ.
އެ ހަރަކާތުގައި އެޑިއުކޭޝަން ސެކްޓާއަށް ނިސްބަތްވާ މައިގްރެންޓް ވޯކާސްގެ އިތުރުން ބޮޑެތި ބައެއް ކުންފުނިތަކުގެ ބިދޭސީ މަސައްކަތްތެރިންގެ މައުލޫމާތު އެއްކުރުމަށް ހަމަޖެހިފައިވާއިރު، ތިލަފުއްޓާއި ގުޅީފަޅުގައި ހަރަކާތްތެރިވުމަށް ހަމަޖެހިފައިވާ ކަމަށް މިނިސްޓްރީން ބުންޏެވެ. މައިގްރެންޓް ވޯކާސް ސްކްރީން ކުރުމުގެ މަސައްކަތް އެންޓިޓިޕް އޮފީހުން ކުރިއަށް ގެންދިއުމަށްވެސް ރޭވިފައިވެ އެވެ.
އެއް އަހަރު ދުވަހުގެ ތެރޭގައި ރާއްޖޭގައި އުޅޭ ބިދޭސީންގެ މައުލޫމާތު އެއްކުރުމަށް އަމާޒުހިފައި ކުރަނގި އޮޕަރޭޝަން ފެށީ ހުސްވި އަހަރުގެ މޭމަހުގެ 2 ވަނަ ދުވަހު އެވެ. ހޯމްލޭންޑް މިނިސްޓްރީން ހިއްސާކޮށްފައިވާ ތަފާސްހިސާބުތައް ދައްކާ ގޮތުން 2024 ވަނަ އަހަރުގެ އޮކްޓޫބަރުގެ 22 ގެ ނިޔަލަށް 6891 ބިދޭސީންގެ ބަޔޮމެޓްރިކް ޑާޓާ އެއްކޮށްފައިވެ އެވެ.
ޕްރޮގްރާމުގެ ފުރަތަމަ މަރުހަލާގައި ބިދޭސީ މަސައްކަތްތެރިންގެ މައުލޫމާތު އެއްކުރި ނަމަވެސް އެ ފަރާތްތަކާ މެދު ފިޔަވަޅު އެޅުމަކީ މަގުސަދެއް ނޫން ކަމަށް މިނިސްޓަރު އަލީ އިހުސާން މީގެ ކުރިން ވިދާޅުވެފައިވެ އެވެ. އެގޮތުން ގަވާއިދާ ހިލާފަށް އުޅޭ ބިދޭސީންގެ ތެރެއިން ގަވާއިދުގެ ތެރެއަށް ވަންނަން ބޭނުންވާ ބިދޭސީންނަށް އެ ފުރުސަތު ފަހިކޮށްދެވޭނެ ކަމަށް އިހުސާން ވިދާޅުވި އެވެ.
ފުރަތަމަ މަރުހަލާ ނިމުމަށްފަހު ރަސްމީ ލިޔެކިޔުން ނެތި، ގަވާއިދާއި ހިލާފަށް އުޅޭ ބިދޭސީންގެ ބަޔޯ މެޓްރިކް އައިޑެންޓިފިކޭޝަނެއް ހަދައި، ގައުމުތަކުގެ އެމްބަސީތަކާއި ގުޅިގެން އެމީހުން ފޮނުވާލުމަށް ވަނީ ނިންމާފަ އެވެ.
އިމިގްރޭޝަނުން ހާމަކޮށްފައިވާ ގޮތުން ގާނޫނާއި ގަވާއިދާ ހިލާފަށް މަސައްކަތް ކުރަމުންދާ ބިދޭސީންގެ މައްސަލަ ހައްލުކުރުމަށްޓަކައި ތަންފީޒީ އިދާރާތައް ގުޅިގެން މިދިޔަ އަހަރު 5613 އަށްވުރެ ގިނަ ބިދޭސީން ޑީޕޯޓްކޮށްފައިވެ އެވެ.
އޭގެ ތެރޭގައި ގަވާއިދާ ހިލާފަށް އުޅެމުންދިޔަ ބިދޭސީންނާއި ގަވާއިދާ ހިލާފަށް މަސައްކަތް ކުރަމުންދިޔަ ބިދޭސީން ހިމެނެ އެވެ. ގިނަ މީހުންނަކީ އިމިގްރޭޝަނުން ހިންގި އޮޕަރޭޝަންތަކުގައި އެ އިދާރާގެ ބެލުމުގެ ދަށަށް ގެންދިޔަ މީހުންނެވެ.
