ރިސޯޓުތަކުން 40 މިލިއަން ޑޮލަރު މާރުކުރާނެ ކަމަށް ލަފާކޮށްފި
ރާއްޖޭގެ ރިސޯޓުތަކުން ބޭންކުތަކަށް ޑޮލަރު މާރުކުރަން މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އެކުލަވައިލައި އަމަލުކުރަން ފެށި ބޭރުފައިސާގެ ގަވާއިދުގެ ދަށުން މިހާތަނަށް 30 މިލިއަން ޑޮލަރާއި 40 މިލިއަންއާ ދެމެދުގެ އަދަދެއް މާރުކުރާނެ ކަމަށް އެމްއެމްއޭއިން ލަފާކޮށްފި އެވެ.
ހުސްވި 2024 ވަނަ އަހަރުގެ އޮކްޓޫބަރު މަހުގެ އެކަކުން ފެށިގެން ރިސޯޓުތަކަށް އަންނަ ކޮންމެ ޓޫރިސްޓަކު 500 ޑޮލަރުގެ ރޭޓުން ޑޮަލަރު މާރުކުރާ ގަވައިދަށް އަމަލުކުރަން ފަށާފައިވެ އެވެ.
އެމްއެމްއޭއިން މިއަދު މީޑިއާތަކަށް ފޮނުވި މެސެޖެއްގައި ބުނީ، 175 ރިސޯޓްގެ ތެރެއިން 138 ރިސޯޓްގެ އޮކްޓޫބަރު މަހުގެ ސޭލްސް ރިޕޯޓް ލިބިފައިވާ ކަމަށެވެ. ސޭލްސް ރިޕޯޓް ނުލިބެނީ 37 ރިސޯޓްގަ އެވެ.
"މިހާތަނަށް ހުށަހަޅާފައިވާ ސޭލްސް ރިޕޯޓްތަކަށް ބަލާއިއިރު 30 މިލިއަން ޑޮލަރާއި 40 މިލިއަން ޑޮލަރާއި ދެމެދުގެ އަދަދެއް، ބޭރުފައިސާ މާރުކުރުމުގެ ގަވާއިދުގެ ސަބަބުން ބޭންކުތަކަށް މާރުކުރެވިގެންދާނެ ކަމަށް ލަފާކުރެވެއެވެ" އެމްއެމްއޭގެ މެސެޖުގައި ބުންޏެވެ. ޑޮލަރު މާރުކުރަން ދިން ތާރީހު ހަމަވާނީ މި މަހުގެ 28 ވަނަ ދުވަހު އެވެ.
ޑޮލަރު މާރުކުރަން މަޖުބޫރުކުރާ, ބޭރު ފައިސާއާ ބެހޭ ގާނޫނަށް މި މަހުގެ އެއްވަނަ ދުވަހުން ފެށިގެން އަމަލުކުރަން ފަށާފައިވާއިރު، ބޭރު ފައިސާއިން އާމްދަނީ ލިބޭ، ޓޫރިޒަމް ދާއިރާގެ މުދާ ވިއްކާ ފަރާތްތަކާއި ހިދުމަތް ފޯރުކޮށްދޭ ފަރާތްތަކާއި އެހެން ފަރާތަކުން ވިއްކާ ނުވަތަ ފޯރުކޮށްދޭ މުދަލާއި ހިދުމަތަށް އަހަރެއްގެ ތެރޭގައި ބޭރު ފައިސާއިން މަދުވެގެން 15 މިލިއަން ޑޮލަރަށް ނިސްބަތްވާ އަދަދެއް ލިބޭ ފަރާތްތަކުން ވަކި މުއްދަތުތަކެއްގައި އެމްއެމްއޭގައި ރަޖިސްޓްރީކުރަން ޖެހެ އެވެ.
އެ ފަރާތްތަކުން ވިއްކާ ނުވަތަ ފޯރުކޮށްދޭ މުދަލާއި ހިދުމަތްތަކުން ލިބޭ ބޭރު ފައިސާގެ އާމްދަނީ, ރާއްޖޭގައި ގާއިމުކޮށްފައިވާ ބޭންކެއްގައި ހުޅުވާފައިވާ ބޭރު ފައިސާގެ އެކައުންޓަކަށް ޓްރާންސްފާކުރާ ގޮތަށް ގާނޫނުގައި ކަނޑައަޅާފައިވެ އެވެ.
ކެޓަގަރީ އޭ ގައި ޓޫރިސްޓް ރިސޯޓްތަކާއި އިންޓަގްރޭޓަޑް ޓޫރިސްޓް ރިސޯޓްތަކާއި ފްރައިވެޓް އައިލެންޑްތަކާއި ރިސޯޓް ހޮޓާތަކާއި އެނޫންވެސް އެފަދަ ތަންތަން ހިމެނޭއިރު، ކެޓަގަރީ ބީ ގައި ހިމެނެނީ ޓޫރިސްޓް އުޅަނދުތަކާއި ޓޫރިސްޓް ހޮޓާތަކާއި ޓޫރިސްޓް ގެސްޓްހައުސްތަކެވެ.
Ads by STO
