ބްރޯޑްކޮމްގެ ރައީސްއަކަށް ސަފާ އިންތިހާބުކޮށްފި
މޯލްޑިވްސް ބްރޯޑްކާސްޓިން ކޮމިޝަނުގެ ހުސްވެފައިވާ ރައީސްގެ މަގާމަށް އެ ކޮމިޝަނުގެ މެމްބަރު ސަފާ ޝަފީގް އިންތިހާބުކޮށްފި އެވެ.
ބްރޯޑްކޮމްގެ ރައީސްގެ މަގާމު ހުސްވެފައި ވަނީ އެ މަގާމުގައި ހުންނެވި މަރިޔަމް ވަހީދާގެ ދައުރު މިދިޔަ މަހު ހަމަވުމުންނެވެ.
ބްރޯޑްކޮމްއަށް ރައީސަކު އިންތިހާބުކުރީ ކޮމިޝަނުން ހުސްވެފައިވާ ދެ މެމްބަރުންގެ މަގާމަށް އެ ކޮމިޝަނުގެ ކުރީގެ މެމްބަރު އާމިނަތު ސަރާހަތު އިއްޒަތާ އަދި މުހައްމަދު އަބްދުالله (މުހައްމާ) އައްޔަންކުރުމަށް ފަހުގަ އެވެ.
އެ ކޮމިޝަނުގެ ރައީސަކަށް ސަފާ އިންތިހާބުކޮށްފައި ވަނީ މިއަދު ބޭއްވި ކުއްލި ބައްދަލުވުމުގަ އެވެ. މަގާމަށް ސަފާ އެކަނި ކުރިމަތިލެއްވުމުން މެމްބަރުންގެ މެދުގައި ނެގީ ފެންނަ ނުފެންނަ ވޯޓެކެވެ. ބައްދަލުވުމުގައި ބައިވެރިވެވަޑައިގެންނެވި ހަތް މެމްބަރުންގެ އިއްތިފާގުން ނިންމީ ސަފާ ބްރޯޑްކޮމްގެ ރައީސަކަށް އިންތިހާބު ކުރުމަށެވެ.
ސަފާ ވަނީ ރާއްޖޭގެ ގައުމީ ޔުނިވާސިޓީން މާސްޓަ އޮފް އާޓްސް އިން ސޯޝަލް ޕޮލިސީ އަދި ލިމްކޮކްވިންގް ޔުނިވާސިޓީ އޮފް ކްރިއޭޓިވް ޓެކްނޮލޮޖީން މާސްޓަ އޮފް ކޮމިއުނިކޭޝަން ހާސިލުކުރައްވާފަ އެވެ.
ޓީވީއެމްގައި 2006 ވަނަ އަހަރުން ފެށިގެން ޕްރޮގްރާމްތައް ހުށަހަޅުއްވަން ފެއްޓެވިއިރު، ސަފާ ވަނީ އެ ސްޓޭޝަނުގައި ޕްރޮޑިއުސަރެއްގެ މަގާމު ވެސް އަދާކުރައްވާފަ އެވެ.
ބްރޯޑްކޮމްގެ މެމްބަރު ކަމަށް ސަފާ އައްޔަންކޮށްފައި ވަނީ 2023 ވަނަ އަހަރު މެއި މަހުގެ 9 ވަނަ ދުވަހު އެވެ.
