މިސްކިތް އަޅަން އެސްޖޭން ގެނައި މުދަލުން ޑިއުޓީ މާފެއް ނުކުރޭ: އިސްލާމިކް މިނިސްޓަރު
އެސްޖޭ ކުންފުނިން ހުޅުމާލެގައި އަޅަމުންދާ މިސްކިތަށް ގެނައި މުދަލުން ޑިއުޓީ މާފުކޮށްދީފައި ނުވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
އެ ކުންފުނިން ހުޅުމާލޭގައި މިސްކިތް އަޅަން ފެށީ މީގެ ދެ އަހަރު ކުރިން ޖެނުއަރީ 23، 2022ގަ އެވެ. އޭރު އެއްބަސްވީ 400އެއްހާ ދުވަހުން މަސައްކަތް ނިންމުމަށެވެ. މިހާތަނަށް ވެސް މިސްކިތުގެ މަސައްކަތް ނުނިމޭއިރު، ޑިއުޓީއެއް ނެތި އެތެރެކުރާ މުދަލުން އެހެން މަސައްކަތްތައް ކުރާ ކަމުގެ ތުހުމަތު ވެސް ސޯޝަލް މީޑިއާގައި އަމާޒުވެއްޖެ އެވެ.
މިނިސްޓަރު ޝަހީމް، މީޑިއާތަކަށް މައުލޫމާތު ދިނުމަށް އޮންނަ ވަޓްސްއެޕް ގްރޫޕަށް ފޮނުވި މެސެޖެއްގައި ވިދާޅުވީ މިނިސްޓްރީން ބާރު އަޅައިގެން މިސްކިތް އަވަހަށް ނިންމަންކުރަންޖެހޭ ކަންކަން ކުރަމުންދާ ކަމަށެވެ.
މިނިސްޓަރު ވެސް އެ ތަނަށް ޒިޔާރަތް ކުރައްވައި ދިމާވެފައި ހުރި ދަތިތައް ވެސް ބަލާފައިވާ ކަމަށް ވިދާޅުވި އެވެ. ހައްލު ކުރަން ޖެހޭ ކަންކަން ހައްލު ކޮށްދެމުންދާ ކަމަށް ވެސް ވިދާޅުވި އެވެ.
އޭގެ ފަހުގައި މިނިސްޓަރު ވަނީ ޑިއުޓީއެއް ނުދައްކާ ގޮތަށް ކުންފުނިން މުދާ އެތެރެކުރާ ކަމަށް ދެކެވޭ ވާހަކަތައް ދޮގު ކުރައްވައިފަ އެވެ.
"2022 ގައި މަސައްކަތް ފެށިފަހުން މިއަދާހަމަ އަށް މި މިސްކިތުގެ މަސައްކަތަށް ގެނައި އެއްވެސް އެއްޗަކުން ޑިއުޓީ މާފްކޮށްފައި ނުވޭ. މިސްކިތް ނިންމުމަށް ކުރެވޭ މަސައްކަތުގައި އެސްޖޭ ކުންފުނީގެ އެހީތެރިކަން ލިބެމުންދޭ،" އެސްޖޭ ކުންފުނީގެ ދިފާއުގައި މިނިސްޓަރު ލިޔުއްވާފައިވެ އެވެ.
މިނިސްޓަރު ވަނީ މިސްކިތުގެ މަސައްކަތުގެ ޓައިމްލައިނެއް ހިއްސާކުރައްވައިފަ އެވެ.
- 15/02/22 - ގައި ބިން ހަވާލުކުރެވުނު
- 23/03/22 - ގިބްލަ މާކްކޮށް ދޭން މިނިސްޓްރީގައި އެދުނު
- 20/11/22 - ގިބްލަ މާކްކޮށް ދޭން އެދުނުތާ 252 ދުވަސް ވީއިރުވެސް ގިބްލަ މާކް ނުކޮށްގެން ގިބްލަ މާކް ކޮށްދިނުމަށް އެދި ދެވަނަ ފަހަރަށް ސިޓީ ފޮނުވުނު
- 18/12/22 - މިނިސްޓްރީން ގޯތީގެ އިން ވަކިކޮށްދިން (ގިބުލަ ޖަހައިނުދޭ)
- 19/12/22 - މިނިސްޓްރީން ގޯތީގެ އިންވަކިކުރީ ނުބައިކޮށްކަމަށް އެޗްޑީސީން އެންގި
- 02/01/23 - ގޯތީގެ އިން ވަކިނުކުރެވި މަސައްކަތް ހުއްޓިވާތީ ގެއްލުންވާކަމަށް އެސްޖޭ އިން މިނިސްޓްރީއަށް އެންގި
- 24/01/23- 02/01/23 ގައި ފޮނުވި ސިޓީއަށް ޖަވާބު ނުލިބޭތީ އިތުރު ސިޓީއެއް ފޮނުވުނު
- 03/01/23 - އިންވަކޮށް އަލުން މަސައްކަތް ފަށަން އެންގި
- 09/02/23 - ކުރެހުމާއި ގޯތީގެ ބޮޑު މިން ދިމާނުވެގެން އެމައްސަލަ ހައްލު ކުރުމަށް އެދެނު
- 02/04/23 - ސެޓްބެކް މައްސަލަ ހައްލުކޮށްދީ އަލުން މަސައްކަތް ފަށަން އެންގި
- 17/05/23 ފައުންޑޭޝަން އިންޕެކްޝަނަށް ރިކްއެސްޓް ކުރެވުނު
- 28/05/23 އިންޕެކްޝަން ހަދާނުދީގެން ރިމައިންޑާ ފޮނުވުނު
- 24/06/23 ގައި ފައުންޑޭޝަން އިންޕެކްޝަން ހަދައިދީ ކޮންކްރީޓް އެޅުމަށް ހުއްދަދެވުނު
