މޯލްޑިވިއަންގެ ބޮޑު ބޯޓުން ޗައިނާގެ ގިނަ އަދަދެއްގެ ފަތުރުވެރިން ރާއްޖެއަށް
ގައުމީ އެއާލައިން، މޯލްޑިވިއަނުން ޗައިނާގެ ޗެންޑޫ ސިޓީ އާއި ރާއްޖެ އާ ދެމެދު ފެށި ސީދާ ވައިގެ ދަތުރުގެ ފުރަތަމަ ފްލައިޓް މިއަދު ވެލާނާ އިންޓަނޭޝަނަލް އެއާޕޯޓު (ވީއައިއޭ) އަށް ޖައްސައިފި އެވެ.
މި ތާރީހީ ވައިގެ ދަތުރުތައް މޯލްޑިވިއަނުން ގެނައި ފުރަތަމަ ވައިޑް-ބޮޑީ އެއާކްރާފްޓް (އެއާބަސް އޭ-330) ގައި ފެށުމާ ގުޅިގެން، ވީއައިއޭގައި މަރުހަބާ ކިޔުމުގެ ހާއްސަ ރަސްމިއްޔާތެއް ވަނީ ބާއްވާފަ އެވެ. މި ދަތުރު ވީއައިއޭއަށް ކޮށްފައި ވަނީ ޗައިނާގެ ޗެންގްޑޫއިންނެވެ.
މިއަދު ހެނދުނު އައި ފްލައިޓުން ޖުމްލަ 192 މީހަކު އައިސްފައިވާއިރު، އޭގެ ތެރޭގައި 172 ފަތުރުވެރިން ހިމެނެ އެވެ.
މަރުހަބާ ކިޔުމުގެ ރަސްމިއްޔާތުގައި ޓޫރިޒަމް މިނިސްޓަރު އިބްރާހިމް ފައިސަލް އާއި އިކޮނޮމިކް މިނިސްޓަރު މުހައްމަދު ސައީދު އަދި ޓްރާންސްޕޯޓް މިނިސްޓަރު މުހައްމަދު އަމީން ބައިވެރިވެ ވަޑައިގެންނެވި އެވެ. އޭގެ އިތުރުން މޯލްޑިވިއަން އާއި އެމްއޭސީއެލްގެ އިސްބޭފުޅުން ބައިވެރިވެ ވަޑައިގެންފައިވެ އެވެ.
ޓްރާންސްޕޯޓް މިނިސްޓްރީން ބުނީ މި އާ ވައިގެ ދަތުރުތައް ފެށުމަކީ ރާއްޖެ އާއި ޗައިނާ އާ ދެމެދު އޮންނަ ގުޅުން އިތުރަށް ބަދަހިވެގެންދާނެ ކަމެއް ކަމަށެވެ. އަދި މިކަމުގެ ސަބަބުން ދެ ގައުމުގެ ފަތުރުވެރިކަމާއި ވިޔަފާރީގެ ގުޅުން އިތުރަށް ކުރިއަރާނެ ކަމަށެވެ.
މީގެ އިތުރުން މި ދަތުރުތައް ފެށުމަކީ މޯލްޑިވިއަންގެ ހިދުމަތްތައް ފުޅާކުރުމުގެ މަސައްކަތުގައި ހާސިލުކުރެވުނު މުހިންމު ކާމިޔާބީއެއް ކަމަށް އެ މިނިސްޓްރީން ބުންޏެވެ. މިކަމުގެ ސަބަބުން ރާއްޖެއަށް އަންނަ ފަތުރުވެރިންގެ އަދަދު އިތުރުވެގެންދާނެކަން ފާހަގަކޮށްފައިވެ އެވެ.
ވައިޑް-ބޮޑީ އެއާކްރާފްޓުގެ ދަތުރުތައް ޗެންގްޑޫގެ އިތުރުން ޗައިނާގެ އެހެން ސިޓީތައް ކަމަށްވާ ބެއިޖިން އަދި ޝަންގްހާއިއަށް ވެސް ފަށާނެ އެވެ.
ޗައިނާގެ ޗެންގްޑޫއަށް ދެކޮޅު ޓިކެޓުގެ އަގަކީ 688 އެމެރިކާ ޑޮލަރެވެ. ބެއިޖިން ދެކޮޅު ޓިކެޓުގެ އަގު 788 އެމެރިކާ ޑޮލަރަށް އަރާއިރު، ޝެންހާއީ ދެކޮޅު ޓިކެޓުގެ އަގަކީ 777 އެމެރިކާ ޑޮލަރެވެ.
މި އާ ވައިގެ ދަތުރުތަކުގައި ހަފުތާއަކު 3 ފްލައިޓް ދަތުރު ކުރާނެ އެވެ. މިއީ ރާއްޖެ އާއި ޗައިނާ އާ ދެމެދު އޮންނަ ގުޅުން އިތުރަށް ހަރުދަނާކޮށް، ދެ ގައުމުގެ ރައްޔިތުންނަށް ފަސޭހަކަމާ އެކު ދަތުރުފަތުރު ކުރުމުގެ ފުރުސަތު ފަހިވެގެންދާނެ މުހިންމު ފިޔަވަޅެއް ކަމަށް ވެސް ޓްރާންސްޕޯޓް މިނިސްޓްރީން ބުންޏެވެ.
މޯލްޑިވިއަންގެ އާ މަތިންދާބޯޓު ރާއްޖެއަށް ގެނެސްފައި ވަނީ މި މަހުގެ 6 ވަނަ ދުވަހު އެވެ.
އެ ބޯޓަކީ 264 މީހުންގެ ޖާގައިގެ މަތިންދާ ބޯޓެކެވެ. ބިޒްނަސް، ޕްރިމިއަމް އިކޮނޮމީ އަދި އިކޮނޮމީ ކްލާސް ވެސް ހިމެނޭ ގޮތަށް ފަރުމާކޮށްފައިވާ ބޯޓުގައި 18 ބިޒްނަސް ސީޓާއި 36 ޕްރިމިއަމް އިކޮނޮމީ ސީޓުގެ އިތުރުން 210 އިކޮނޮމީ ސީޓު ހިމެނެ އެވެ. ބޯޓުގައި ކާގޯ އުފުލޭ ކެޕޭސިޓީއަކީ 10 ޓަނެވެ.
ވައިޑް-ބޮޑީ އެއާކްރާފްޓާ އެކު މޯލްޑިވިއަންގެ ފްލީޓުގައި ހިމެނޭ ބޯޓުތަކުގެ އަދަދު ވަނީ 25 އަށް އިތުރުވެފަ އެވެ. ޗައިނާ އާ ދެމެދު ފެށި ދަތުރުތަކާ އެކު މޯލްޑިވިއަނުން ދަތުރުކުރާ މަންޒިލްތަކުގެ އަދަދު 22 އަށް ވަނީ އިތުރުވެފަ އެވެ.
Ads by STO
