ފައިނުގައި އެއާޕޯޓް އަޅަން އެމްޓީސީސީއާ ހަވާލުކުރީ
އެމަނިކުފާނުގެ ރިޔާސީ ވައުދުފުޅު ތެރޭގައި ހިމެނޭ ރ. ފައިނުގައި އެއާޕޯޓު އެޅުމުގެ މަސައްކަތް އަންނަ މަހު އެމްޓީސީސީއާ ހަވާލުކުރަން ނިންމާފައިވާ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
މާޅޮސްމަޑުލު އުތުރުބުރީގެ ބައެއް ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގައި އެ އަތޮޅު ފައިނު ރައްޔިތުންނާއެކު ބޭއްވި ބައްދަލުވުމުގައި ރައީސް ވިދާޅުވީ، ފައިނުގައި އެއާޕޯޓެއް އެޅުމަކީ އެ ރަށުގެ އިތުރުން އެ ސަރަހައްދުގެ ރައްޔިތުންގެ ވަރަށް ބޮޑު އުއްމީދެއްގެ އިތުރުން އިގްތިސާދީ ކުރިއެރުމުގައި މުހިއްމު ދައުރެއް އަދާކުރާނެ ކަމެއް ކަމަށެވެ.
އެހެންވެ އެއާޕޯޓް އެޅުމުގެ އަމަލީ މަސައްކަތް ވަރަށް އަވަހަށް ފެށުމަށް ނިންމާފައިވާކަން ހާމަކުރެއްވި އެވެ.
"... އެ މަސައްކަތް (އެއާޕޯޓް) ކުރުމަށް އެމްޓީސީސީއާ އެކީގައި ފެބްރުއަރީ މަހުގެ ތެރޭގައި އެގްރީމެންޓު ކުރުމަށް ނިންމާފައިވާ ވާހަކަ. އިރާދަކުރެއްވިއްޔާ އެއަށް ފަހު އަމަލީ މަސައްކަތް ވަރަށް އަވަހަށް އެއާޕޯޓު އެޅުމަށް ފަށާނެކަމުގެ ޔަގީންކަން ތިބޭފުޅުންނަށް އަރުވަން" ރައީސް މުއިއްޒު
އެމަނިކުފާނު ވިދާޅުވި ގޮތުގައި އެއާޕޯޓު އަޅާ ސަރަހައްދަކީ ފެނާއި ނަރުދަމާ ނިޒާމުގެ މަސައްކަތްތައް ކޮށްފައިވާ ސަރަހައްދަކަށްވާތީވެ ބަދަލުތަކެއް ގެންނަން ޖެހޭ ކަމަށެވެ. އެއާޕޯޓު އަޅަން ބޭނުންވާ ސަރަހައްދުގައި ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ފެނާއި ނަރުދަމާ މަޝްރޫއުގެ ބައެއްކަންކަން ކުރިއަށް ގެންދިޔައީ އެއާޕޯޓް އެޅުމަށް ހުރަސް އެޅުމުގެ ގޮތުންކަން ރައީސް ފާހަގަކުރެއްވި އެވެ.
"އެންމެ ކުޑަ ހަރަދެއް ކޮށްގެން ކުރެވޭނެ ގޮތަށް އެއާޕޯޓު އެޅުމަށް ބޭނުންވާ ޖާގަ ހުސްކޮށް ފެނާއި ނަރުދަމާ ނުހުއްޓި، ހިދުމަތް ނުހުއްޓި ކުރިއަށް ގެންދެވޭ ގޮތަށް ތަރުތީބުކޮށްގެން ވަރަށް އޮމާންކޮށް މަސައްކަތް ކުރިއަށް ގެންދާނެކަމުގެ ޔަގީންކަން ތިބޭފުޅުންނަށް އަރުވަން" ވިދާޅުވި އެވެ.
ރައީސް ވިދާޅުވީ އެއާޕޯޓް އެޅިގެން ދިޔުމުން އެ ސަރަހައްދަށް ގިނަ ރިސޯޓްތަކެއް އައުމަށް މަގުފަހިވެގެންދާނެ ކަމެއް ކަމަށާއި، ޓޫރިޒަމް އިންޑަސްޓްރީއަށް އިތުރު ކުރިއެރުމެއްވެސް ލިބޭނެ ކަމަށެވެ.
ފައިނުގައި އެއާޕޯޓެއް އެޅުމަށް ރައީސް ނިންމެވީ ހުސްވި އަހަރުގެ މާޗު މަހު ނެރެއްވި ގަރާރަކުންނެވެ.
އެ ގަރާރަކީ އާންމު މަންފާއަކަށްޓަކައި ހާސިލުކުރަން ބޭނުންވާ އިގްތިސާދީ ސިޔާސަތެއްގެ ދަށުން ހިންގާނޭ މުހިންމު މަޝްރޫއުތައް ކަނޑައެޅުމުށް ނެރެފައިވާ ގަރާރެކެވެ.
އިސްލާހުތަކާ އެކު އާންމުކުރި ގަރާރުގައި ބުނެފައިވަނީ، އިގުތިސާދަށް ނަފާ ހޯދުމަށްޓަކައި ރާއްޖޭގެ އެކި ސަރަހައްދުތަކުގައި އެއާޕޯޓުތައް ގާއިމްކުރަން ނިންމާފައިވާއިރު އެ ތަންތަނުގެ އެންމެ ކުޑަ އިންވެސްޓްމަންޓްގެ އަދަދަށް ރައީސް ބަދަލުތަކެއް ގެންނަވާފައިވާ ކަމަށެވެ.
އެގޮތުން ފައިނު ހިމެނޭގޮތަށް 9 ސަރަހައްދެއްގައި އެއާޕޯޓު އެޅުމުގެ މަޝްރޫއުގެ އިންވެސްޓްމަންޓްގެ އެންމެ ކުޑަ އަގެއްގެ ގޮތުގައި 5،000،000 މިލިއަން ޑޮލަރު ވަނީ ހިމަނުއްވާފަ އެވެ.
