ޕޮލިސް ކާރަކުން ޖެހި އަނިޔާވި ޒުވާނާ އޭޑީކޭ އަށް ބަދަލުކޮށްފި
މިދިޔަ މަހުގެ 27 ވަނަ ދުވަހުގެ ރޭ ދަންވަރު ހުޅުމާލެ ދެ ވަނަ ފިޔަވަހީގައި ފުލުހުންގެ ކާރަކާ ސައިކަލެއް ޖެހި ހިނގި ނުރައްކާތެރި އެކްސިޑެންޓުގައި އަނިޔާވި 18 އަހަރުގެ ޒުވާނާ އިތުރު ފަރުވާ އަށް އޭޑީކޭއަށް ބަދަލުކޮށްފި އެވެ.
އައިޖީއެމްއެޗުގެ މީޑިއާ އޮފިޝަލް "ދެން" އަށް މިއަދު ވިދާޅުވީ އެ ހޮސްޕިޓަލުގެ އައިސީޔޫގައި ވެންޓިލޭޓަރުގައި ބާއްވައިގެން ޒުވާނާ އަށް ފަރުވާދިނުމަށް ފަހު މިދިޔަ ހަފްތާގައި އޭޑީކޭއަށް ބަދަލުކޮށްފައިވާ ކަމަށެވެ. އޭޑީކޭއަށް ބަދަލުކުރީ އާއިލާ އިން ބޭނުންވެގެން ކަމަށް މީޑިއާ އޮފިޝަލް ވިދާޅުވި އެވެ. އިތުރު ތަފްސީލެއް ނުދެ އެވެ. އޭނާގެ މިހާރު ހާލަތާ ގުޅޭ ގޮތުން އޭޑީކޭގެ ބަހެއްވެސް ނުލިބެ އެވެ.
އެ އެކްސިޑެންޓް ހިނގީ ފުލުސް ކާރު، ގުލްއަލާމަގު އިރުން ހުޅަނގަށް ނިރޮޅުމަގު ހުރަސްކުރި ވަގުތު ބާރު ސްޕީޑުގައި ނިރޮޅުމަގުން އުތުރުން ދެކުނަށް ދުއްވާފައި އައި ސައިކަލަކާ ޖެހިގެން ކަމަށް ފުލުހުން މައުލޫމާތު ދީފައިވެ އެވެ.
އެކްސިޑެންޓުގައި އަނިޔާވި ޒުވާނާ، އެއްގަމު ދަތުރުފަތުރު ކުރުމުގެ ގާނޫނާ ހިލާފުވެގެން އެ ގާނޫނުގެ ދަށުން ޑިސެންބަރު 21 ވަނަ ދުވަހު ލައިސަންސް ހިފަހައްޓާފައިވާ ކަމަށް މީގެ ކުރިން ފުލުހުން ވަނީ ބުނެފަ އެވެ. އަދި ކާރު ދުއްވަން އިން އޮފިސަރުގެ އިހުމާލެއް ވޭތޯ ބެލުމަށް ތަހުގީގެއް ހިންގާނެ ކަމަށްވެސް ބުންޏެވެ. އެކަމަކު ފިޔަވަޅެއް އެޅިކަމެއް ނުވަތަ ނޫންކަމެއް އަދި މިހާތަނަށް އެނގިފައެއް ނުވެ އެވެ.
އެކްސިޑެންޓް ހިނގި ވަގުތު މަންޒަރު ދުށް މީހުން ހޯދަން ވެސް އިއުލާނު ކޮށްފަ އެވެ. ފުލުހުން އެދުނީ އެ މަންޒަރު ދުށް މީހެއްވާނަމަ، ޓްރެފިކް އިންވެސްޓިގޭޝަންގެ ނަންބަރު 9444880 އަށް ގުޅައި މައުލޫމާތު ހިއްސާކުރުމަށްވެސް ފުލުހުން އެދިފައިވެ އެވެ.
