ޖަލުތައް ބަލަހައްޓަން 60 އޮފިސަރުން ހޯދަނީ

ތިން ޖަލެއް ބަލަހައްޓަން 60 އޮފިސަރުން ހޯދުމަށް މޯލްޑިވްސް ކަރެކްޝަނަލް ސާވިސްއިން އިއުލާނުކޮށްފި އެވެ.

Ads by STELCO

"ޕްރިޒަން ޕްރައިވެޓް" ގެ މަގާމަށް ބޭނުންވާ އޮފިސަރުން ހޯދުމަށް ކަރެކްޝަންސްއިން އިއުލާނުކުރީ މިދިޔަ ބުރާސްފަތި ދުވަހު އެވެ. އަލަށް ނަގާ އޮފިސަރުން މަސައްކަތް ކުރަން ޖެހެނީ ހުޅުމާލެ ޖަލާއި އައްސޭރި ޖަލު އަދި މާފުށި ޖަލުގަ އެވެ.

އޮޕަރޭޝަނަލް އޮފިސަރުންގެ ގޮތުގައި ނަގާ އޮފިސަރުންނަށް މުސާރަ އާއި އިނާޔަތްތަކާ އެކު މަހަކު 15،000 ރުފިޔާ ލިބޭނެ ކަމަށް އިއުލާނުގައިވެ އެވެ. އެއީ ސާވިސް އެލަވަންސްގެ 3،500 ރުފިޔާ އާއި ލިވިން އެލަވަންސްގެ ގޮތުގައި ދޭ 2،500 ރުފިޔާ ހިމަނައިގެނެވެ. އެ ދެ އިނާޔަތް ވެސް ދޭނީ މަގާމުގެ ހުވާ ކުރުމަށް ފަހުގަ އެވެ.

މަގާމަށް ކުރިމަތިލާ ފަރާތްތަކުގެ ކިބައިގައި ހުންނަން ޖެހޭ ޝަރުތުތަކުގެ ތެރޭގައި ސާނަވީ އިމްތިހާނަކުން މަދުވެގެން 2 މާއްދާއިން ދަށްވެގެން 'ޑީ' ފާސް ލިބިފައިވުމާ އެކު، ސެކަންޑްރީ އިމްތިހާނުން ދިވެހި އަދި އިސްލާމް މި ދެ މާއްދާއިން ދަށްވެގެން 'ސީ' ފާސް ލިބިފައިވުން ހިމެނެ އެވެ. ނުވަތަ
ޕްރިޒަން އޮފިސަރުންގެ ވަޒީފާއަށް ބޭނުންވާ ނުވަތަ ގުޅުންހުރި ދާއިރާއަކުން ރާއްޖޭގެ ގައުމީ ސަނަދުގެ އޮނިގަނޑުގެ ލެވެލް 3 ގެ ސަނަދެއް ނުވަތަ އެއަށްވުރެ މަތީ ސަނަދެއް ހާސިލު ކޮށްފައިވާ މީހަކަށް ވާން ޖެހެ އެވެ.

ކަރެކްޝަނުން ބުނީ އޮފިސަރުން ހޮވުމުގައި ހަށިހެޔޮކަން ދެނެގަތުމަށް ފިޒިކަލް ފިޓްނަސް އާއި ފެތުމުގެ ޓެސްޓުން އަދި މެޑިކަލް އެގްޒަމިނޭޝަން، ކުރެވޭ އިންޓަވިއު އާއި ބެކްގްރައުންޑް އެސެސްމަންޓުން ފާސްވާ މީހުންނަށް އިސްކަންދޭނެ ކަމަށެވެ.

ޖަލު އޮފިސަރުގެ މަގާމަށް ޝައުގުވެރިވާ ފަރާތްތަކުން ލިޔެކިޔުންތައް ހުށަހެޅުމުގެ ސުންގަޑިއަކީ އަންނަ މަހުގެ 16 ވަނަ ދުވަހުގެ މެންދުރުފަހު 3:00 އެވެ. ވަޒީފާއަށް އެދޭ ފޯމާއި ކަމާ ގުޅުންހުރި ލިޔެކިޔުންތައް އެ ހިދުމަތުގެ އީމެއިލް [email protected] އަށް ނުވަތަ ރޭޑިއޯ ބިލްޑިންގައި ހުންނަ އޮފީހުގެ ކައުންޓަރަށް ހުށަހެޅޭނެ ކަމަށް އިއުލާނުގައިވެ އެވެ.