ސޯޝަލް މީޑިއާ ރެގިއުލޭޓްކުރުން މުހިންމު ކަމަށް އެއްމެން އެއްބަސްވޭ، އެއީ މިނިވަންކަން ނިގުޅައިގަތުމެއް ނޫން: ނާޒިމް
ސޯޝަލް މީޑިއާގެ ޕްލެޓްފޯމްތައް ރެގިއުލޭޓްކުރުމަކީ އެންމެންވެސް އެއްބަސްވާ ކަމެއް ކަމަށާއި، އެއީ މީޑިއާގެ މިނިވަންކަން ނިގުޅައިގަތުން ނޫން ކަމަށް ރައްޔިތުންގެ މަޖިލީހުގެ ނައިބް ރައީސް އަހުމަދު ނާޒިމް މިއަދު ވިދާޅުވެއްޖެ އެވެ.
މީޑިއާ އާއި އިންޓަނެޓް ރެގިއުލޭޓްކުރާ ބިލެއް މަޖިލީހަށް ހުށަހެޅުމަށް ތައްޔާރުވަމުންދާ ކަމަށް ނާޒިމް ވިދާޅުވުމާ ގުޅިގެން ކަންބޮޑުވުންތަކެއް ވަނީ އުފެދިފަ އެވެ. އެ ބިލުގެ ސަބަބުން މީޑިއާގެ މިނިވަންކަން ގެއްލޭނެ ކަމަށްވެސް އެއްބަޔަކު ދެކެ އެވެ.
އެ ވާހަކަތަކާ ގުޅޭ ގޮތުން "އެކްސް" ގައި ނާޒިމް ހިއްސާކުރެއްވި ބަޔާނެއްގައި ވިދާޅުވީ، މީޑިއާގެ މިނިވަންކަމަށް ހުރަސްއަޅާނެ ފަދަ ކަމަކަށް ދުވަހު ތާއިދުނުކުރާނެ ކަމަށެވެ.
ނާޒިމް ވިދާޅުވީ މީޑިއާތައް ރެގިއުލޭޓްކުރަން އުފައްދާފައިވާ މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) އާއި މޯލްޑިވްސް މީޑިއާ ކައުންސިލް (އެމްއެމްސީ) އިން އެންމެ ފުރިހަމަ ގޮތުގައި ހިނގަމުންނުދާކަން ހުދު މީޑިއާތައްވެސް ގަބޫލުކުރާ ކަމަށެވެ. އެެއީ ދައުލަތުގެ ރިސޯސްތައް ޑުޕްލިކޭޓްވުމުގެ އިތުރުން ނަތީއްޖާ ނުނެރެވޭ ފަދަ ގޮތަކަށް އޮތް 2 މުއައްސަސާކަން ފާހަގަކުރައްވައި ނާޒިމް ވިދާޅުވީ 2024 ވަނަ އަހަރުގެ ބަޖެޓުންވެސް އެ ދެ މުއައްސަސާއަށް ދައުލަތުން 18 މިލިއަން ރުފިޔާ ހޭދަކޮށްފައިވާ ކަމަށެވެ.
"އަޅުގަނޑުގެ މަގުސަދަކީ މި ފަދަ ދޯހަޅިކޮށް ހުރި މުއައްސަސާތައް ރިފޯމްކުރުމެވެ" ނާޒިމް ވިދާޅުވި ގޮތުގައި މީޑީއާތަކުންވެސް ބޭނުންވަނީ ހަގީގީ ބެލެނިވެރި ފަރާތަކީ ކޮބައިތޯ ދެނެގަތުން ކަމަށެވެ. އަދި ހަމައެއާއެކު މީޑިއާތަކުން ބޭނުންވަނީ އެ މީހުންގެ ހައްގުގައި އަޑުއުފުލާނެ ހަގީގީ ބާރުވެރި ފަރާތެއްކަން ޔަގީންކޮށް ކަށަވަރުކުރުން ކަމަށްވެސް ވިދާޅުވި އެވެ.
އެއަށް ފަހު ނާޒިމް ވިދާޅުވީ މި ފަހަކަށް އައިސް ސޯޝަލް މިޑިއާގެ އެކި ޕްލެޓްފޯމްތައް ޒުވާނުން ބޭނުންކުރާ މިންވަރު ވަރަށް ބޮޑަށް އިތުރުވެފައިވާއިރު ޒުވާނުން މުނިފޫހިފިލުވުމުގެ އިތުރުން އާމްދަނީ ހޯދުމާއި އެމީހުން ޝުއުރޫތައް ފާޅުކުރާ އެންމެ ވަރުގަދަ ވަސީލަތަކަށް ޝޯޝަލް މިޑިއާ ވެފައިވާ ކަމަށެވެ.
އެހެންކަމުން އެ ޕްލެޓްފޯމްތައް ރެގިއުލޭޓްކުރުމަކީ މުހިއްމުކަމެއްކަަން ހުރިހާ ފަރާތުން އެއްބަސްވެލައްވާނެ އެވެ. އެއީ އެއްވެސް ހާލަތެއްގައި އެފަދަ މަންސަތައް ބްލޮކްކޮށް ނުވަތަ މީޑިއާގެ މިނިވަންކަން ނިގުޅައިގަތުމެއް ނޫނެވެ. - ނާޒިމް
ނާޒިމް ހުށަހަޅުއްވަން ގަސްތުކުރައްވާ ބިލު ދިފާއުކުރައްވަމުން ވިދާޅުވީ ދުނިޔޭގެ ގިނަ ގައުމުތަކުގައި ޝޯޝަލް މިޑިއާތައް ރެގިއުލޭޓް ކުރުމުގެ މަސައްކަތް ފަށާފައިވާ ކަމަށެވެ. އެގޮތުން އަޔަލޭންޑުގައި 2022 ވަނަ އަހަރު އަމަލުކުރަން ފެށި "އޮންލައިން ސޭފްޓީ އެންޑް މީޑިއާ ރެގިއުލޭޝަން އެކްޓްސް 2022" ގާނޫނު އޭނާ ފާހަގަކުރެއްވި އެވެ.
ނާޒިމް ދެކިވަޑައިގަންނަވާ ގޮތުގައި އާޓީފިޝަލް އިންޓެލިޖެންސް (އޭއައި) މީޑިއާގެ އެކިއެކި ކަންކަމުގެ ތެރެއަށް އަންނައިރު އެންމެންގެ މަސްލަހަތު ހިމާޔަތްކުރެވޭނެ އޮނިގަނޑެއް އޮތުމަކީ މުހިއްމު ކަމެެކެވެ.
Ads by STO
