ރ. އަތޮޅަށް ރައީސް ކުރެއްވި ދަތުރުފުޅުން ރައްޔިތުންނަށް އުންމީދު އާވެއްޖެ: މެންބަރު ޒާހިރު
ނިމިގެން ދިޔަ ހަފްތާގައި ރައީސް ޑރ. މުހައްމަދު މުއިއްޒު ރ. އަތޮޅަށް ކުރެއްވި ދަތުރުފުޅަކީ ރ. އަތޮޅު ރައްޔިތުންނަށް އުއްމީދީ، އުފާވެރި ހަބަރުތަކެއް ލިބިގެންދިޔަ ކާމިޔާބު ދަތުރެއްކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު އަހުމަދު ޒާހިރު ވިދާޅުވެއްޖެ އެވެ.
މެމްބަރު ޒާހިރު ވިދާޅުވީ އެ ދަތުރުފުޅުގެ ތެރެއިން އަތޮޅުގެ އެކި ރަށްތަކަށް ބޭނުންވާ ކަންކަމުގެ މަޢުލޫމާތު ހޯއްދަވާ، އެކަންކަން ކުރިއަށް ގެންދެވޭނެ ގޮތްތަކާއިމެދު ކައުންސިލްތަކާއި ރައީސް މަޝްވަރާކުރެއްވި ކަމަށެވެ.
އަދި އޭގެން އެނގިގެންދަނީ މިއަދުގެ ސަރުކާރަކީ ކައުންސިލްތަކާއި ގުޅިގެން މަސައްކަތްކުރާ، އަދި ކައުންސިލްތައް ބާރުވެރި ކުރުވާ ސަރުކާރެއްކަން ކަމަށް ޒާހިރު ވިދާޅުވި އެވެ.
އަދި އެ ދަތުރުފުޅުގެ ތެރެއިން މަޑުއްވަރީއަށް ވަޑައިގެން ރައްޔިތުންގެ އެދިލެއްވުމާއި އެއްގޮތަށް ރ. އުފުލަންދޫ މަޑުއްވަރީގެ އިހުތިސާސްގައި އަދި ރ. ތާވަތާ މީދޫގެ އިހުތިސާސްގައި ހިމެނެއްވުމަށް ރައީސް ނިންމެވި ނިންމެވުމަށް ޒާހިރު ޝުކުރުއަދާ ކުރެއްވި އެވެ.
ޒާހިރު ވިދާޅުވީ އޭގެން ހާމަވެގެންދިޔައީ ރައީސް މުއިއްޒުއަކީ ރައްޔިތުންގެ އަޑުއައްސަވާ، ރައްޔިތުން އެދިލައްވާ ގޮތަށް ކަންކަން ނިންމަވާ ވެރިއެއްކަން ކަމަށެވެ.
ރ. އަތޮޅަށް ކުރެއްވި ދަތުރުފުޅުގައި ރައީސް ވަނީ އެ އެއަތޮޅުގެ ދެކުނު ބިތުގައި އަޅާ ފައިނު އެއާޕޯޓުގެ މަސައްކަތް ފެބްރުއަރީ މަހުގެ ތެރޭގައި އެމްޓީސީސީއާއި ހަވާލުކުރައްވާނެކަން އިއުލާން ވެސް ކުރައްވައިފަ އެވެ.
އޭގެ އިތުރުން، ރ. އުނގޫފާރަކީ އާބަން ސެންޓަރެއްގެ ގޮތުގައި ހުރިހާ ހިދުމަތެއް އެންމެ މަތީ ފެންވަރަށް ލިބޭ ރަށަކަށް ހެދުމާއި ޖޫން މަހުގެ ކުރިން ރ. އަތޮޅުގައި އާރުޓީއެލް ފެރީގެ ހިދުމަތް ފައްޓަވައި ދެއްވާނެ ކަމުގެ އުފާވެރި ހަބަރު ވެސް ރައީސް ދެއްވި އެވެ.
