ފަތިހުން ފެށިގެން ކުރަމުންދާ ވިއްސާރާގައި ގަމުގެ 15 ގެއަކަށް ފެންވަދެއްޖެ
ރޭ ފަތިހުން ފެށިގެން ހުއްޓާނުލައި ލ. ގަމަށް ވެހެމުންދާ ބޯވާރޭގައި އެ ރަށުގައި ފެންބޮޑުވެ، 15 ގެއަކަށް ފެންވަދެއްޖެ އެވެ.
ގަމު ކައުންސިލުގެ އެކްޒެކްޓިވް އިބްރާހިމް ޝަރީފް "ދެން" އަށް މިއަދު ވިދާޅުވީ އެންމެ ބޮޑަށް ފެންބޮޑުވީ އެރަށު ތުނޑީ އަވަށާއި މަތިމަރަދޫ އަވަށުގައި ކަމަށެވެ.
އެ ދެ އަވަށުން 15 ގެއަކުން ފެންވަދެގެން ކައުންސިލަށް ރިޕޯޓްކޮށްފައިވެ އެވެ. އެކަމަކު އެ ގެތަކަށް ދިރިނުޅޭވޭ ވަރުގެ ގެއްލުމެއް ނުލިބޭ ކަމަށް ޝަރީފް ވިދާޅުވި އެވެ.
ގޭގެއަށް ފެންވަނުމުގެ ސަބަބުން ނަރުދަމާ ނިޒާމުގެ މައްސަލަ ދިމާވިކަން އޭނާ ފާހަގަކުރި އެވެ.
"ސީދާ ލިބުނު ގެއްލުންތައް އެނގޭނީ އެސެސްމެންޓަށް ފަހު" އިތުރު ގެތަކަށް ފެން ނުވަންނާނެހެން ވެލިބަސްތާ ޖެހުމުގެ މަސައްކަތް ކައުންސިލާ ސިފައިން ކުރަމުންދާއިރު 3 ޕަމްޕެއް ބޭނުންކޮށްގެން ފެން ހިންދުމުގެ މަސައްކަތް ކުރަމުންނެވެ.
ފެންގަނޑު ހިންދުމަށްޓަކައި ތުނޑީ އަވަށުގެ ހުޅަނގު ފަރާތުން މޫދާ ދިމާލަށް ކޯރެއް ކަނޑާފައިވެ އެވެ.
ކުރިއަށް އޮތް ދެ ދުވަހުވެސް މޫސުން ގޯސްވާނެ ކަމަށް ލަފާކޮށްފައިވާތީ އެކަމަށް ތައްޔާރުވަމުންދާ ކަމަށް ޝަރީފް ވިދާޅުވި އެވެ.
މޫސުން ގޯސްވާނެ ކަމަށް ލަފާކޮށް ގއ އަތޮޅުން ފެށިގެން އައްޑޫ ސިޓީއަށް ވައިޓް އެލާޓް މެޓުން ވަނީ ނެރެފަ އެވެ. އެ އަތޮޅުތަކަށް އެލާޓް ނެރެފައިވަނީ މިރޭ 10 ޖެހުމާ ހަމަޔަށެވެ. މެޓުން ވަނީ އެ ސަރަހައްދުގައި ގަޑިއަކު 19 މޭލާއި 24 މޭލާ ދެމެދު ބާރުމިނެއްގައި ވައިޖެހި ކަނޑުގަދަވާނެ ކަމަށް ލަފާކޮށްފަ އެވެ.
Ads by STO
