25 މިލިއަނަށް ވުރެ ގިނަ ޑޮލަރު ބޭންކުތަކަށް މާރުކޮށްފި
ރާއްޖޭގެ ބޭންކުތަކަށް 25 މިލިއަނަށް ވުރެ ގިނަ ޑޮލަރު މާރުކޮށްފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ހއ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން މިރޭ ހއ. ހޯރަފުއްޓަށް ވަޑައިގެން ރައީސް ވިދާޅުވީ ސަރުކާރުން އެންމެ ބޮޑަށް ކުރަން ފެށި މަސައްކަތަކީ ޑޮލަރުގެ ތާށިކަން ހައްލުކުރަން އެޅި ފިޔަވަޅުތައް ކަމަށެވެ.
އެގޮތުން ބޭރު ފައިސާއާ ބެޙޭ ގާނޫނެއް ހަދައި އެ ގާނޫނު ތަންފީޒުކުރަން ފަށާފައިވާކަން ރައީސް ފާހަގަކުރެއްވި އެވެ.
ރައީސް ވިދާޅުވީ ބޭރު ފައިސާގެ ގާނޫނަށް ގިނަ ރިސޯޓުތަކުން ތަބާވެ މާރުކުރަން ފަށާފައިވާ ކަމަށެވެ.
"މިހާތަނަށް ވެސް އެމްްއެމްއޭގެ ގަވަރުނަރު ފަހުން އަޅުގަނޑަށް ދިން މައުލޫމާތު އެއީ ހޯމަ ދުވަހު ދިން އަޕްޑޭޓްގައި ވެސް އެއީ 25 މިލިއަނަށް ވުރެ ގިނަ ޑޮލަރު ބޭންކުތަކަށް ވަނީ މާރުކޮށްފައި. އެއީ އެއް މަހުގެ ތެރޭގައި" ރައީސް ވިދާޅުވި އެވެ.
އެ ގާނޫނު ފުރިހަމައަށް ތަންފީޒުކޮށް ބޭރު ފައިސާގެ ތެރެއިން ޑޮލަރު މާރުކުރަން ޖެހޭ އެއްވެސް ވިޔަފާރިވެރިއަކަށް އިސްތިސްނާ ނުދެއްވާނެ ކަމަށް އެމަނިކުފާނު ވިދާޅުވި އެވެ.
ރައީސް ފާހަގަކުރެއްވި ގޮތުގައި ޑޮލަރު މާރުކުރަން ފެށުމާއެކު ރާއްޖޭގެ އިގުތިސާދަށް ވަރަށް ބޮޑަށް ފަސޭހަވެގެން ދާނެ ކަމަށެެވެ.
"ވިޔަފާރިވެރިންނަށް ވެސް އަޅުގަނޑުމެން ރާވާފައި އޮތް ގޮތަށް މި ހައެއްކަ މަހުން ފެށިގެން ކުރިއަށް އޮތްއަހަރުގެ ތެރޭގައި ވަރަށް ގިނަ ކަންކަން ފަހިވެ އާންމު ރައްޔިތުންނަަށް ވެސް އޭގެން އެތައް ފައިދާތަކެއް ބޭރުގެ ރައްޔިތުންނަށް، ކިޔަވާކުދިންނަށް، ޖުމްލަކޮށް ހުރިހާ ރައްޔިތުންނަށް ފައިދާ ވާނެ" ރައީސް ވިދާޅުވި އެވެ.
ޑޮލަރު މާރުކުރަން މަޖުބޫރުކުރާ, ބޭރު ފައިސާއާ ބެހޭ ގާނޫނަށް އަމަލުކުރަން ފެށީ މި މަހުގެ އެއްވަނަ ދުވަހުން ފެށިގެން ނެވެ.
އެ ގާނޫނުގެ ދަށުން ބޭރު ފައިސާއިން އާމްދަނީ ލިބޭ، ޓޫރިޒަމް ދާއިރާގެ މުދާ ވިއްކާ ފަރާތްތަކާއި ހިދުމަތް ފޯރުކޮށްދޭ ފަރާތްތަކާއި އެހެން ފަރާތަކުން ވިއްކާ ނުވަތަ ފޯރުކޮށްދޭ މުދަލާއި ހިދުމަތަށް އަހަރެއްގެ ތެރޭގައި ބޭރު ފައިސާއިން މަދުވެގެން 15 މިލިއަން ޑޮލަރަށް ނިސްބަތްވާ އަދަދެއް ލިބޭ ފަރާތްތަކުން ވަކި މުއްދަތުތަކެއްގައި އެމްއެމްއޭގައި ރަޖިސްޓްރީކުރަން ޖެހެ އެވެ.
އެ ފަރާތްތަކުން ވިއްކާ ނުވަތަ ފޯރުކޮށްދޭ މުދަލާއި ހިދުމަތްތަކުން ލިބޭ ބޭރު ފައިސާގެ އާމްދަނީ, ރާއްޖޭގައި ގާއިމުކޮށްފައިވާ ބޭންކެއްގައި ހުޅުވާފައިވާ ބޭރު ފައިސާގެ އެކައުންޓަކަށް ޓްރާންސްފާކުރާ ގޮތަށް ގާނޫނުގައި ކަނޑައަޅާފައިވެ އެވެ.
ކެޓަގަރީ އޭ ގައި ޓޫރިސްޓް ރިސޯޓްތަކާއި އިންޓަގްރޭޓަޑް ޓޫރިސްޓް ރިސޯޓްތަކާއި ފްރައިވެޓް އައިލެންޑްތަކާއި ރިސޯޓް ހޮޓާތަކާއި އެނޫންވެސް އެފަދަ ތަންތަން ހިމެނޭއިރު، ކެޓަގަރީ ބީ ގައި ހިމެނެނީ ޓޫރިސްޓް އުޅަނދުތަކާއި ޓޫރިސްޓް ހޮޓާތަކާއި ޓޫރިސްޓް ގެސްޓްހައުސްތަކެވެ.
ކެޓަގަރީ އޭއަށް ލިބޭ ފައިސާ މާރުކުރެވޭނެ ދެ ގޮތެއް ގާނޫނުގައި ބުނެފައިވެ އެވެ. އެއް ގޮތަކީ އެ ތަންތަނަށް އަންނަ ކޮންމެ ޓޫރިސްޓަކަށް 500 ޑޮލަރުގެ ރޭޓުން މާރުކުރުމާއި ކޮންމެ މަހެއްގެ ތެރޭގައި ލިބޭ ބޭރު ފައިސާގެ އާމްދަނީން 20 އިންސައްތަ މާރުކުރުމެވެ.
ކެޓަގަރީ ބީ އަށް ލިބޭ ފައިސާ މާރުކުރެވޭނީ ކޮންމެ ޓޫރިސްޓަކަށް 25 ޑޮލަރުގެ ރޭޓުން ނުވަތަ ކޮންމެ މަހެެއްގެ ބޭރު ފައިސާގެ އާމްދަނީގެ 20 އިންސައްތައިން މާރުކުރަން ޖެހޭނެ ކަމަށް ބުނެފައިވެ އެވެ.
އޭގެ އިތުރުން ޓޫރިޒަމް ދާއިރާ އާއި މާލީ އިދާރާތައް ފިޔަވާ އެހެން ފަރާތަކުން ވިއްކާ ނުވަތަ ފޯރުކޮށްދޭ މުދަލާއި ހިދުމަތަކުން 15 މިލިއަން ލިބޭ ފަރާތްތަކުން އެ ފައިސާގެ ތެރެއިން ކޮންމެ އަހަރަކު ލިބޭ އާމްދަނީގެ 20 އިންސައްތަ ބޭންކަށް މާރުކުރަން ޖެހެ އެވެ.
Ads by STO
