ހަންކެޑެ ބްރިޖް ހޮނިހިރު ދުވަހު ހުޅުވާލަނީ
އައްޑޫ ސިޓީގެ ހަންކެޑެ ޑީޓުއަ ލިންކް ރޯޑް އަންނަ ހޮނިހިރު އާންމުންނަށް ހުޅުވާލާނެ ކަމަށް ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާ މިނިސްޓްރީން ބުނެފި އެވެ.
ހަންކެޑެ ބްރިޖް މަޝްރޫއަކީ އައްޑޫ ރޯޑް އެންޑް ސްޓޯމް ވޯޓަ ޑްރެއިނޭޖް ޑިވެލޮޕްމަންޓް ޕްރޮޖެކްޓުގެ ދަށުން ކުރިއަށް ގެންގޮސްފައިވާ މަޝްރޫއެކެވެ. އެ މަސައްކަތް ކޮށްފައި ވަނީ އިންޑިއާގެ އެގްޒިމް ބޭންކުން ދިން 800 މިލިއަން ޑޮލަރުގެ ލައިން އޮފް ކްރެޑިޓުގެ ދަށުންނެވެ.
އިންޑިއާގެ އެފްކޮންސް އާ ހަވާލުކޮށްގެން ކުރިއަށް ގެންދިޔަ މަޝްރޫއުގެ މަސައްކަތް ފެށީ 2021 ވަނަ އަހަރު އެވެ. ދެ އަހަރުގެ ދުވަހުގެ ތެރޭގައި ނިންމާ ގޮތަށް އެ ކުންފުންޏާ މަސައްކަތް ހަވާލުކޮށްފައި ވަނީ 77.6 މިލިއަން ޑޮލަރަށެވެ.
އައްޑޫ ސިޓީގެ ގައުކެޑި އާއި މަރަދޫ ގުޅާލަން ހަދާފައިވާ ބްރިޖާ ގުޅޭގޮތުން އިންފްރާސްޓްރަކްޗާ މިނިސްޓްރީން މިއަދު "އެކްސް" ގައި ކުރި ޕޯސްޓެއްގައި ބުނީ ހަންކެނޑެ ޑީޓުއާ ލިންކް ރޯޑް އަންނަ ހޮނިހިރު ދުވަހު އާންމުންނަށް ހުޅުވާލާނެ ކަމަށެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ހިންގި މަޝްރޫއުގެ މަސައްކަތް ނިންމައި، އެ ތަން ދިވެހި ސަރުކާރާ ރަސްމީކޮށް ހަވާލުކޮށްފައި ވަނީ މިދިޔަ އޮގަސްޓު މަހުގެ 12 ވަނަ ދުވަހު އެވެ.
ހަންކެޑެ ބްރިޖް ނުހުޅުވައި ދިގުދެމެމުންދާތީ އެކަމުގެ ކަންބޮޑުވުން އައްޑޫ ސިޓީގެ މޭޔަރު އަލީ ނިޒާރު މިފަހުން ވެސް ވަނީ ފާޅުކުރައްވާފަ އެވެ. ވިދާޅުވީ ބްރިޖުގައި ކުރަން ޖެހޭ ހުރިހާ މަސައްކަތެއް ކޮންޓްރެކްޓަރު ނިންމާފައިވާއިރު، ބްރިޖް ނުހުޅުވި ލަސްވާން ޖެހޭ އެއްވެސް ސަބަބެއް ނެތް ކަމަށެވެ.
ނިޒާރު ވިދާޅުވި ގޮތުގައި ބްރިޖް ހުޅުވުމާއި ވީރާނާވެފައިވާ ލިންކްރޯޑް އަލުން ހެދުމުގެ އިތުރުން ހަންކެޑެ ސަރަހައްދުގައި ހަދާފައިވާ ވަގުތީ ވެލި މަގު މަރާމާތު ކުރުމުގެ ޒިންމާ އޮތީ އިންފްރާސްޓްރަކްޗާ މިނިސްޓްރީއަށް ކަމުގަ އެވެ. އެ މަސައްކަތްތަކަކީ އައްޑޫ މަގު ހެދުމުގެ މަސައްކަތުގައި ހިމެނޭ މަސައްކަތްތައް ކަމަށާއި ސިޓީ ކައުންސިލުން އެ މަސައްކަތްތައް އަވަސްކުރުމަށް ތަކުރާރުކޮށް އެދެމުންދާ ކަމަށެވެ.
އެހެންނަމަވެސް މިނިސްޓްރީގެ ފަރާތުން އެކަމުގައި އެދެވޭ ޖަވާބެއް ލިބިފައި ނުވާ ކަމަށް އަންގާރަ ދުވަހު މޭޔަރު ވިދާޅުވެފައިވެ އެވެ.
Ads by STO
