Monday, 16 November 2026
Advertisement
Allied Insurance (leaderboard)
ޚަބަރު

ފަނޑިޔާރުން ވަކިކުރާ ބިލު ކޮމިޓީން ފާސްކޮށްފި

ފަނޑިޔާރުން ވަކިކުރާ ބިލު ކޮމިޓީން ފާސްކޮށްފި
ރާއްޖޭގެ އެންމެ މަތީ ކޯޓު، ސުޕްރީމް ކޯޓުގެ ފަނޑިޔާރުންގެ އަދަދު ފަހަކަށް މަދުކުރަން ކޯޓުތަކުގެ ގާނޫނަށް އިސްލާހު ގެނައުމަށް ރައްޔިތުންގެ މަޖިލީހަށް ހުށަހެޅި ބިލުގެ ކޮމިޓީގެ މަސައްކަތް މިއަދުން މިއަދަށް ނިންމައި، ތަޅުމަށް ފޮނުވަން ޖުޑިޝަރީ ކޮމިޓީން ފާސްކޮށްފި އެވެ. އެ ބިލު ހުށަހެޅުއްވީ ހޮޅުދޫ ދާއިރާގެ ކޮންގްރެސް ޕާޓީ މެމްބަރު އަބްދުއްސައްތާރު މުހައްމަދު (ސަޓޯ) އެވެ. ސަޓޯ، ބިލު ހުށަހެޅުއްވީ އަމިއްލަ ހައިސިއްޔަތުންނެވެ. މައްސަލަ ބޮޑުވެފައިވާ މި ބިލު ދިރާސާކުރަން މިއަދު ބޭއްވި ކޮމިޓީ ބައްދަލުވުމުގައި އެމްޑީޕީއަށް ނިސްބަތްވެވަޑައިގަންނަވާ ކެންދޫ ދާއިރާގެ މެންބަރު މައުރޫފް ޒާކިރު (މަޓޭ) އާ ހިތަދޫ ދެކުނު ދާއިރާގެ މެންބަރު އެމްޑީޕީގެ މެންބަރު އިބްރާހިމް ނާޒިލް އިސްލާހުތަކެއް ހުށަހެޅި އެވެ. ބިލުގައިވާ ކޮންމެ މާއްދާއަކަށް ކަހަލަ ގޮތަށް އެ ދެ މެންބަރުން ހުށަހެޅި އެއްވެސް އިސްލާހެއް ފާހެއްނުވެ އެވެ. އެންމެ މުހިއްމު ހުށަހެޅުމެއްގެ ގޮތުގައި ނާޒިލް ހުށަހެޅީ ސުޕްރީމް ކޯޓުގެ ބެންޗަށް ދެ ފަނޑިޔާރުން އިތުރުކުރުމަށެވެ. އެއާއެކު ޖުމްލަ ފަނޑިޔާރުންގެ އަދަދު 9 އަށް ބަދަލުކުރުމަށް ހުށަހެޅި އެވެ. އިދިކޮޅުގެ އެއްވެސް ހުށަހެޅުމެއް ފާސްވެފައިނުވާތީ އިތުރު ބަދަލެއް ނުގެނެސް ކޮމިޓީން ވަނީ ތަޅުމަށް ފޮނުވަން ބިލު ފާސްކޮށްފަ އެވެ. ކޮމިޓީން ބިލު ފާސްކޮށްފައިވަނީ ޕީއެންސީގެ 5 މެންބަރުންގެ ވޯޓުންނެވެ.

ސަޓޯގެ ބިލުގެ ހުލާސާ

މިހާރު ސުޕްރީމް ކޯޓުގެ ބެންޗުގައި 7 ފަނޑިޔާރުން ތިއްބަވަ އެވެ. މެމްބަރު ސަޓޯ ކޯޓުތަކުގެ ގާނޫނަށް އިސްލާހު ހުށަހެޅުއްވީ ސުޕްރީމް ކޯޓުގެ ފަނޑިޔާރުންގެ އަދަދު 5 އަށް ބަދަލުކުރުމަށެވެ. ވަކިކުރަން ޖެހޭ ދެ ފަނޑިޔާރުން ޖުޑީޝަލް ސާވިސް ކޮމިޝަން (ޖޭއެސްސީ) އިން ކަނޑައެޅުމަށް ފަހު ރައްޔިތުންގެ މަޖިލިހަށް ފޮނުވަން ޖެހޭނެ ކަމަށް ބިލުގައިވެ އެވެ. ބިލު ގާނޫނަކަށްވެ ގާނޫނަށް އަމަލުކުރަން ފަށާތާ 5 ދުވަސް ތެރޭގައި ޖޭއެސްސީން މަޖިލިހަށް ފޮނުވަން ޖެހޭނެ ކަމަށް ބިލުގައިވެ އެވެ. ރައްޔިތުންގެ މަޖިލިހަށް އެ ހުށަހެޅުން ލިބޭތާ 7 ދުވަސް ތެރޭގައި ވަކިކުރުމާ މެދު މަޖިލިހުން ގޮތެއް ނިންމަން ޖެހޭނެ އެވެ. މި ބިލު ހުށަހެޅިފައި މި ވަނީ، ސިޔާސީ ޕާޓީން ވަކިކުރުމުން މަޖިލިހުގެ ގޮނޑި ގެއްލޭ ގޮތަށް މަޖިލިހުން މިފަހުން ގާނޫނު އަސާސީއަށް ގެނައި ބަދަލު ބާތިލު ކުރުމަށް އެދި ސުޕްރީމް ކޯޓަށް މައްސަލައެއް ހުށަހަޅައި، އެ މައްސަލަ ކުރިއަށް ގެންދަން އެ ކޯޓުން ނިންމާފައި ވަނިކޮށެވެ. މިހާރު ވެރިކަންކުރާ ކޮންގްރެސް ޕާޓީގެ ސުޕަ މެޖޯރިޓީ އޮންނަ މަޖިލިހުގެ ނިންމުމަކާ ދެކޮޅަށް ހުށަހަޅާފައިވާ އެ މައްސަލަ ސުޕްރީމް ކޯޓުގައި ބައްލަވަނީ 7 ފަނޑިޔާރުންގެ ފުލް ބެންޗުންނެވެ. ސުޕްރީމް ކޯޓުގެ ބެންޗު ބަދަލުކުރަން ހުށަހެޅިއިރު، ބައެއް ފަނޑިޔާރުންގެ ވަކިކުރަން ސަރުކާރުން މަސައްކަތްކުރާ ކަމަށް ވަނީ އަޑު ފެތުރިފަ އެވެ. ސަރުކާރުން އޭރު ވަނީ އެ ވާހަކަތައް ދޮގުކޮށްފަ އެވެ.  

ރިއެކްޝަން

Advertisement
Allied Insurance — Square (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.