ރޭސިން ކާރު ދިޔައީ މީހާވެސް ގޮވައިގެން!

ގއ. ވިލިނގިލީގައި ރޭސިން ކާރަކާ ބައިސްކަލެއް ޖެހި ނުރައްކާތެރި އެކްސިޑެންޓެއް ހިނގައިފި އެވެ.

ފުލުހުންގެ މީޑިއާ އޮފިޝަލް "ދެން" އަށް ވިދާޅުވީ އިއްޔެ 17:30 ހާއިރު ވިލިނގިލީ އަލިކަތީބު މަގު އިރުން ހުޅަނގަަށް ދުއްވާފައި ދިޔަ ކާރެއް، އޯކިޑުމަގުން އުތުރުން ދެކުނަށް ދިޔަ ބައިސްކަލަކާ ޖެހި އެކްސިޑެންޓުވެފައިވާ މައްސަލައެއް ލިބިފައިވާ ކަމަށެވެ.

ފުލުހުން ބުނީ އެ އެކްސިޑެންޓުގައި ކާރު އާއި ބައިސްކަލު ދުއްވި ދެ މީހުންނަށްވެސް އަނިޔާވެގެން ގއ. ހޮސްޕިޓަލުގައި ފަރުވާދެމުންދާ ކަމަށެވެ.

"މި އެކްސިޑެންޓާ ގުޅިގެން ކާރު ޓޯ ކުރެވިފައިވޭ، އަދި ކާރު ދުއްވަން އިން މީހާ އަތުގައި ލައިސެންސެއް ނެތް" ފުލުހުން ބުނީ އެ މައްސަލަ އިތުރަށް ބަލަމުންދާ ކަމަށެވެ.

އާއްމުވެފައިވާ ސީސީޓީވީ ފުޓޭޖުން ފެންނަނީ ރަތް ކުލައިގެ ރޭސިން ކާރެއް ބާރު ސްޕީޑުގައި ދުއްވާފައި ދާ މަންޒަރެވެ. އެ ވީޑިއޯއިން ދެން ފެންނަނީ ގޯޅިއަކުން، ބައިސްކަލެއްގައި މީހަކު ނިކުންނަ މަންޒަރެވެ.

ގޯޅިން ނިކުމެ އެ މީހާ އަށް މާ ދުރަށް ދުއްވާނުލެވެނީސް ބާރު ސްޕީޑުގައި އަންނަ ކާރު ގޮސް އޭނާ ގައިގައި ޖެހެ އެވެ. ކާރު ޖެހުމާއެކު ބައިސްކަލު ދުއްވި މީހާ ވިއްސާއިގެން ގޮސް ޖެހެނީ ކާރުގެ މަތީގަ އެވެ. ކާރު މަޑުކުރަނީ އެ މީހާ ކާރުއާ ޕޭމަންޓާ ދެމެދަށް ވެއްޓުމުންނެވެ.