ސްކޭމްކޮށްގެން މިދިޔަ ހަފުތާގައި ހަތަރު ލައްކަ އަށްޑިހަ އެއްހާހަށް ވުރެ ގިނަ ރުފިޔާ ގެއްލުނު

ސްކޭމްކޮށްގެން ފާއިތުވި ހަފުތާގެ ތެރޭގައި ހަތަރު ލައްކަ އަށްޑިހަ އެއްހާހަށް ވުރެ ގިނަ ރުފިޔާ ގެއްލިފައިވާ ކަމަށް ދިވެހި ފުލުހުންގެ އެންޓި ސްކޭމް ސެންޓަރުން ހާމަކޮށްފި އެވެ. އެންޓި ސްކޭމް ސެންޓަރުން ވަނީ މި މަހުގެ 13 ވަނަ ދުވަހުން ފެށިގެން 19 ވަނަ ދުވަހުގެ ނިޔަލަށް ސްކޭމް މައްސަލަތަކުގެ ތަފާސް ހިސާބުތައް ހިއްސާކޮށްފަ އެވެ. ތަފާސް ހިސާބުތަކުން ދައްކާ ގޮތުގައި އެ ސެންޓަރަށް ހަތް ދުވަހުގެ ތެރޭގައި 45 މައްސަލައެއް ރިޕޯޓުކޮށްފައިވެ އެވެ. އެ މައްސަލަތަކުގައި ޖުމްލަ 481,520.67 ރުފިޔާ ގެއްލިފައިވާއިރު، އޭގެ ތެރެއިން 383,610.08 ރުފިޔާ ވަނީ އަނބުރާ ހޯދާފަ އެވެ. ގެއްލުނު ފައިސާގެ ތެރެއިން 80 އިންސައްތަ ހޯދިއިރު، އެންމެ ގިނައިން ހިންގާފައި ވަނީ އީ-ކޮމާސް ސްކޭމްގެ މައްސަލަތައް ކަމުގައި އެ ސެންޓަރުން ފާހަގަކުރެ އެވެ. އެ ބާވަތުގެ 26 މައްސަލަ ހުށަހަޅާފައިވެ އެވެ. އެންމެ ގިނައިން ސްކޭމަރުން ބޭނުންކޮށްފައި ވަނީ ފޭސްބުކް މާކެޓްޕްލޭސް އެވެ. އެންޓި ސްކޭމް ސެންޓަރަށް ފޭސްބުކް މާކެޓްޕްލޭސް އާ ގުޅުންހުރި 20 މައްސަލައެއް ހުށަހެޅި އެވެ.

ސްކޭމްގެ ބާވަތްތައް:

• ބޭރު ފައިސާ މާރުކުރުމުގެ ސްކޭމް - 10 މައްސަލަ
• ފޯނު މެދުވެރިކޮށް ހިންގާ ސްކޭމް - 5 މައްސަލަ
• އިމްޕާސަނޭޝަން، ފިޝިން، ރޮމޭންސް ސްކޭމް އަދި ފައިސާ ޖަމާކުރުމުގެ މައްސަލަ - ކޮންމެ ބާވަތަކުން 1 މައްސަލަ

ސްކޭމް ކުރުމަށް ބޭނުންކޮށްފައިވާ އެހެނިހެން ވަސީލަތްތައް:

• ވައިބާ - 9 މައްސަލަ
• ފޯނު ކޯލް - 6 މައްސަލަ
• އައިބޭ، މެސެންޖާ، ޓެލެގްރާމް އަދި އިންސްޓަގްރާމް

މިފަދަ ސްކޭމްތަކުން ރައްކާތެރިވުމަށް އިތުރަށް ސަމާލުކަން ދިނުމަށް އެދި އެ ސެންޓަރުން ވަނީ ޝައްކު ހިތުގައި އުފެދޭ ނަމަ، ޔަގީން ކުރުމަށް އެދިފަ އެވެ. ސްކޭމްއިން ރައްކާތެރިވުމަށް ހުރިހާ ފަަރާތްތަކެއް ގުޅިގެން މަސައްކަތް ކުރުމަށް އެންޓި ސްކޭމް ސެންޓަރުން އަންނަނީ ތަކުރާރުކޮށް އިލްތިމާސް ކުރަމުންނެވެ. މިފަދަ ކަންކަމުން ރައްކާތެރިވުމަށް އެއްވެސް ލިންކަކަށް ނުފިތުމަށާއި ވެރިފިކޭޝަން ކޯޑު އެއްވެސް ފަރާތަކާ ހިއްސާ ނުކުރުމުގެ އިތުރުން ދަންނަ މީހެއްގެ ފަރާތުން އައި މެސެޖެއް ކަމުގައި ވިނަމަވެސް ސަމާލުވުމަށާ އަދި މި މެސެޖު އެހެން ފަރާތްތަކަށް ވެސް ހިއްސާ ކޮށްދިނުމަށް އެ ސެންޓަރުން އެދެ އެވެ.

ސްކޭމްގެ ޝިކާރައަކަށް ވެއްޖެ ނަމަ އަޅަން ޖެހޭ ފިޔަވަޅުތަކުގެ ތެރޭގައި:

• ވަގުތުން އީމެއިލް އަދި ގުޅުންހުރި އެކައުންޓުތަކުގެ ޕާސްވޯޑު ބަދަލުކުރުން
• ޝައްކުކުރެވޭ ކަންތައްތައް ބޭންކް ނުވަތަ ކާޑު ދޫކުރި ފަރާތަށް ރިޕޯޓުކޮށް ބްލޮކްކުރުން
• ހުރިހާ މުއާމަލާތްތަކެއްގެ ތަފުސީލާ އެކު އެ އެޕްލިކޭޝަނަށް ނުވަތަ ޕްލެޓްފޯމަށް ރިޕޯޓުކުރުން
• ފުލުހުންނާއި ކަމާ ބެހޭ އިދާރާތަކަށް ރިޕޯޓުކުރުން
• އެހެން މީހުން ސަމާލު ކުރުވުމަށް ތަޖުރިބާ ހިއްސާކުރުން

އެންޓި ސްކޭމް ސެންޓަރުން ބުނި ގޮތުގައި އޮންލައިންކޮށް ވިޔަފާރި ކުރާއިރު ރައްކާތެރިވުމުގެ ގޮތުން އެކަމަށް ވަކި އީމެއިލް އެޑްރެހެއް ބޭނުން ކުރުމާއި ކްރެޑިޓް ކާޑު ނުވަތަ ވާޗުއަލް ކާޑު ފަދަ ރައްކާތެރި ފައިސާ ދެއްކުމުގެ ގޮތްތައް ބޭނުން ކުރެވިދާނެ ކަމުގަ އެވެ. އަދި އެޕްލިކޭޝަންތައް ޑައުންލޯޑުކުރަނީ ހަމައެކަނި ގޫގުލް ޕްލޭ ސްޓޯރު ނުވަތަ އެޕަލް އެޕް ސްޓޯރުންކަން ކަށަވަރު ކުރުމުގެ އިތުރުން ރައްކާތެރި ކަމަށް އެންޓި-ފިޝިން ސޮފްޓްވެއާ ބޭނުން ކުރުމަކީ ކުރެވިދާނެ ކަންކަމުގެ ގޮތުގައި ފާހަގަކުރި އެވެ. އޮންލައިން ޝޮޕިން ޕްލެޓްފޯމްތަކުގެ ނަމުގައި ހިންގޭ ސްކޭމްތަކާ މެދު ސަމާލުކަން ދިނުމާ އެކު އާންމުން މި ކަމަށް ހޭލުންތެރިވެ، ރައްކާތެރިކަމުގެ ފިޔަވަޅުތައް އެޅުމަކީ މިފަދަ ސްކޭމްތަކުން ސަލާމަތްވުމަށް އެޅިދާނެ އެންމެ މުހިންމު ފިޔަވަޅު ކަމުގައި އެ ސެންޓަރުން ބުނެ އެވެ.