ކުރިމަތީ ހީލައެ ފަސް އެނބުރި ވިކާލާ ރޮއްވާލައެވެ.
ޙަޔާތުގައި ވަރަށް ގިނަ އަޑުތައް އިވިއްޖެއެވެ. ވަރަށް ގިނަ މަންޒަރުތައް ފެނިއްޖެއެވެ. ހިތްއެދޭ ކަންކަމާއި ، ހިތްނޭދޭ ކަންކަން ކަމެވެ. ތަފާތު އެކިކަހަލަ އެކި މިޒާޖުގެ މީހުންނާއި ދިމާވެސް ވެއްޖެއެވެ. އެކަމަކު ބުނަން ހެއްޔެވެ. މި ހުރިހާ ކަމަކުން ވެސް ދަސްވި އެއް ކަމެއް އެބައޮތެވެ. އެއީ "ވަރަށް މަދު މީހަކު ނޫނީ އެދުމެއްގައި ނޫނީ ވެދުމެއް ނުކުރެއެވެ." މީ އަހަރުމެންގެ ތެރެއިިން ހަމަ ގިނަ މީހުންގެ ހާލު ވެސް މެއެވެ.
ކުރިމަތީ ދައްކަނީ އެހެން މަންޒަރެކެވެ. ފަސް އެނބުރުމުން އެ މަންޒަރު ބަދަލުވެގެން ދެއެވެ. ހިތުގައިވާ ޙަސަދައާއި ނަފުރަތުގެ ސަބަބުން ކަމަށް ވެސް ވެދާނެއެވެ. ހަޤީގަތް އެ ފޮރުވެނީ ހަމައެކަނި އަމިއްލަ ނަފުސަށެވެ. ދެ މޫނުގެ އެކުވެރިން ގިނަ ޒަމާނެކެވެ. ފުރަތަަމަ ވިހެލާނީ ކޮން އަތަކުން ކަން ދެނެގަންނަށް ވަރަށް ވެސް ދައްޗެވެ.
ކުރިމަތީގައި އަހަންނަށް ވަފާތެރިނުވެވޭ މީހާ ފަހަތުގައި އަހަރެން ހިމާޔަތް ކޮށްފާނޭ ހީވުމަކީ މުޅި ޙަޔާތުގައި ވެސް ކުރެވުނު އެންމެ ބޮޑު ކުށްހީއެވެ. އަނެކުންނަށް ހެޔޮ އެދެވޭ ވަރަށް ވުރެން އަމިއްލަ އެދުން ބޮޑު ޒަމާނެއްގައި ވާނީ ވެސް އެހެންނެވެ. އެންމެ ވެސް ބޭނުން ވަނީ އެމީހަކާއި އެމީހެއްގެ ނަފުސެވެ. ދެންތިބި މީހުންނާއި މެދު ވިސްނާ ލެވެނީ ވަރަށް މަދު މީހަކަށެވެ. އެ ފަދަ މީހަކު ހޯދަން ވެސް އެހާ ތަދެވެ.
ކުރާނެ ކަމެއް ނެތެވެ. ދުނިޔެ އެކި ދުވަހު ދައްކާނީ އެކި މަންޒަރެވެ. އިއްވާނީ އެކި އަޑުތަކެވެ. މީ ބަދަލު ނުވާނޭ ހަޤީގަތެކެވެ. ހިތި ނަމަވެސް މިއަދު ހަޤީގަތް ޤަބޫލުކުރަން މަޖުބޫރު ވެއްޖެއެވެ. ކުރިމަތީގައި ހީލައި ފަސް އެނބުރުމުން ވިކާލައި ރޮއްވާލާ މީހުން ގިނަވެއްޖެއެވެ. އެކުވެރިޔާއެވެ. ތިބާ ވެސް މިކަން ދަނެގެން މި ދުނިޔޭގައި ދިބާގެ ދައުރު ފުރިހަމަ ކުރައްޗެވެ.
