ނޮޅިވަރަމް ވެސް މޮނީޓަރިންގެ ހާލަތުން ނަގައިފި
ކޮވިޑް-19 އާއި ގުޅިގެން ހދ. ނޮޅިވަރަމް ގައި ވެސް އިއުލާނު ކުރި މޮނީޓަރިންގެ ހާލަތު އުވާލައިފިއެވެ.
ނޮޅިވަރަމް މޮނީޓަރިންގެ ހާލަތައް ގެނައީ ހދ. ކުޅުދުއްފުށިން ފައްސިވީ "ފާޅު" ބޯޓުގެ ކޭހާ ގުޅިގެންނެވެ. އެބޯޓު ނޮޅިވަރަމްގައި ވެސް ޖައްސާފައިވާތީ އެ ދެ ރަށް ވެސް އެޗްޕީއޭ އިން ވަނީ މޮނީޓަރިންގަށް ލާފައެވެ.
ނަމަވެސް މިރޭ ކުޅުދުއްފުށީގެ މޮނީޓަރިންގެ ހާލަތު އުވާލުމާއި ގުޅިގެން ނޮޅިވަރަމް ގެ އެހާލަތު ވެސް ވަނީ އުވާލާފައެވެ. އެރަށުން ކޮވިޑަށް ފައްސި ކޭހެއް ވެސް ފެނިފައެއް ނުވެއެވެ.
ކުޅުދުއްފުށި މޮނީޓަރިންގެ ހާލަތުން ނަގާފައިވާކަން އެޗްޕީއޭ އިން އަންގާ އެރަށު ކައުސިލަށް ފޮނުވާފައިވާ ލިޔުމެއްގައި ބުނެފައި ވަނީ މޮނީޓަރިން އުވާލެވިފައި މިވަނީ އެހާލަތު އިތުރަށް ދަމަހައްޓަންވީ ސަބަބެއް ނެތުމުން ކަމަށެވެ.
ކުޅުދުއްފުށި މޮނީޓަރިންގަށް ލާފައި ވަނީ މިމަހުގެ 25 ވަނަ ދުވަހުގެ 20:45 ގައެވެ. އަދި އެހާލަތު އުވާލާފައިވަނީ މިރޭ 20:48 ގައެވެ. ނޮޅިވަރަމް ވެސް އެހާލަތަށް ލާފައިވަނީ އެދުވަހުގެ އެވަގުތުގައެވެ.
އެނގިފައިވާ ގޮތުގައި މޮނީޓަރިންގެ ހާލަތު އުވާލިއިރު އެރަށުން ކޮވިޑް-19 އަށް ފައްސި ވެފައިވަނީ ޖުމްލަ ފަސް މީހުންނެވެ. އެއީ "ފާޅު" ބޯޓުގެ ކައްޕިއާއި އެބޯޓުގެ ތިން ފަޅުވެރިއެއްގެ ޑައިރެކްޓް ކޮންޓެކްޓެކެވެ
"ދެން" އިން ގުޅުމުން، ކޮވިޑް ކަންތައްތަކާއި ގުޅިގެން މީޑިއާތަކަށް މައުލޫމާތު ދެއްވާނީ ހެލްތު އެމަޖެންސީ އޮޕަރޭޝަން ސެންޓަރ (އެޗްއީއޯސީ) އިން ކަމަށް ބުނި ކުޅުދުއްފުށީ ހޮސްޕިޓަލުގެ މެނޭޖަރު "ފެށުން" އޮންލައިން އަށް މައުލޫމާތު ދެއްވަމުން ވިދާޅުވެފައި ވަނީ ފާޅު ބޯޓު ކޭހާ ގުޅިގެން ކުޅުދުއްފުށިން ރޭ ނެގި ޑައިރެކްޓް ކޮންޓެކްޓްސްގެ 16 ސާމްޕަލް ނެގެޓިވް ވެފައިވާކަމާއި ނޮޅިވަރަމުން ނެގި 1 ސާމްޕަލް ވެސް ނެގެޓިވް ވެފައިވާ ކަމަށެވެ.
