ބީލަމަށް ނުލައި މަޝްރޫއުތައް ބަހައިލިކަމަށްބުނެ އެމްޑީޕީން ކޯޓަށް ދަނީ
ގައުމީ ތަރައްގީގެ 206 މަޝްރޫއެއް އަމިއްލަ ކުންފުނިތަކާ ސަރުކާރުން ހަވާލުކޮށްފައި ވަނީ ބީލަމަކާ ނުލައި ކަމަށް ބުނެ، އިދިކޮޅު އެމްޑީޕީން މައްސަލަ ކޯޓަށް ހުށަހަޅަން ނިންމައިފި އެވެ.
މިދިޔަ ބުރާސްފަތި ދުވަހު ބޭއްވި ރަސްމިއްޔާތެއްގައި ސަރުކާރުގެ ތަރައްގީގެ 206 މަޝްރޫއެއް 53 ކުންފުންޏަކާ ވަނީ ހަވާލުކޮށްފައެވެ. ކޮންޓްރެކްޓާ ފައިނޭންސިންގެ ދަށުން ހިންގާ މި މަޝްރޫއުތަކުގެ އަގު 2.7 ބިލިއަން ރުފިޔާއަށް ވުރެ މައްޗެވެ.
އެމްޑީޕީގެ ގައުމީ މަޖިލީހުން ރޭ ބޭއްވި ބައްދަލުވުމުގައި މި މައްސަލާގައި ކޯޓަށް ދިޔުމަށާއި މިކަމާ ގުޅިގެން ދެން އުފެދޭ އެމްޑީޕީގެ ސަރުކާރަކުން އަމަލުކުރާނެ ގޮތްތައް ހިމެނޭ ގަރާރެއް ހުށަހެޅުއްވައިފައި ވަނީ ހޯރަފުށީ ދާއިރާގެ ރައީސް އަދި އެ ދާއިރާގެ ކުރީގެ ރައްޔިތުންގެ މަޖިލީހުގެ މެމްބަރު އަހުމަދު ސަލީމެވެ.
އެ ގަރާރުގައި ސަލީމް ފާހަގަކުރައްވައިފައި ވަނީ، ސަރުކާރުގެ މަޝްރޫއުތައް ބީލަމަށް ނުލައި ދެވޭނެހެން މާލިއްތު ގާނޫނަށް ގެނައި ބަދަލު، މާލިއްޔަތު ގާނޫނާ ހިލާފު ކަމަށެވެ.
އަދި، މި މަޝްރޫއުތައް އިއުލާނު ނުކުރުމާއި އެ މަސައްކަތް ހަވާލުކުރި ސަރުކާރާއި ސަރުކާރުގެ ވެރިންނާއި ގުޅުން ހުރި ކުންފުނިތައް ފިޔަވައި އެހެން ބަޔަކަށް ފުރުސަތު ނުދިނުމާއި ކޮންޓްރެކްޓަރުންގެ ދަފުތަރުގައި ނުހިމެނޭ ކުންފުނިތަކާއި އުވާލުމުގެ މަރުހަލާގައިވާ ކުންފުނިތަކަށް މަޝްރޫއުތައް ދިނުން އެ ގަރާރުގައި ހިމަނާފައި ވެއެވެ.
އެ ގަރާރު ގައުމީ މަޖިލީހުގެ މެމްބަރުންގެ އިއްތިފާގުން ވަނީ ފާސްކޮށްފައެވެ.
