ޗައިނާއިން ރާއްޖެއަށް 3 ލައްކައަށްވުރެ ގިނަ ޓޫރިސްޓުން އަތުވެއްޖެ
މިއަހަރުގެ މިހާތަނަށް ޗައިނާއިން ރާއްޖެއަށް 300،000 އަށްވުރެ ގިނަ ޓޫރިސްޓުން އައިސްފައިވާ ކަމަށް ޓޫރިޒަމް މިނިސްޓްރީގެ ނަންބަރުތަކުން ދައްކައިފި އެވެ.
ޗައިނާއަކީ ރާއްޖެއަށް އެންމެ ގިނަ ޓޫރިސްޓުން އަންނަ ގައުމެވެ. ޓޫރިޒަމް މިނިސްޓްރީގެ ތަފާސްހިސާބުތަކަށް ބަލާއިރު، މިހާތަނަށް 300،352 ޗައިނާ ޓޫރިސްޓުން ވަނީ ރާއްޖެ ޒިޔާރަތް ކޮށްފަ އެވެ. މިދިޔަ އަހަރުތެރޭގައި ޗައިނާއިން ރާއްޖެއަށް އައިސްފައި ވަނީ 263،042 ޓޫރިސްޓުންނެވެ.
ތަފާސްހިސާބުތައް ދައްކާ ގޮތުގައި މިއަހަރުގެ މިހާތަނަށް ރާއްޖެއަށް ދެވަނައަށް އެންމެ ގިނައިން އައިސްފައި ވަނީ ރަޝިއާއިންނެވެ. އެގައުމުން 239،004 ޓޫރިސްޓުން ވަނީ ޒިޔާރަތްކޮށްފަ އެވެ. ތިންވަނައިގައި އޮތީ އިނގިރޭސިވިލާތެވެ. ޔޫކޭ އިން 168،597 ޓޫރިސްޓުން ވަނީ ޒިޔާރަތްކޮށްފަ އެވެ.
ތަފާސްހިސާބުތަކުން ދައްކާ ގޮތުގައި މިއަހަރުގެ މިހާތަނަށް ރާއްޖެއަށް ޒިޔާރަތްކޮށްފައިވާ ޓޫރިސްޓުންގެ 15% ހިއްސާ ކުރަނީ ޗައިނާ ޓޫރިސްޓުންނެވެ. އަދި މިއަހަރުގެ މިހާތަނަށް ޖުމްލަ 1.8 މިލިއަން ޓޫރިސްޓުން ވަނީ ޒިޔާރަތްކޮށްފަ އެވެ.
މިއީ މިދިޔަ އަހަރުގެ މި މުއްދަތުގައި ރާއްޖެ ޒިޔާރަތްކޮށްފައިވާ 1.7 މިލިއަން ޓޫރިސްޓުންނާ އަޅާބަލާއިރު 9.8 ޕަސެންޓްގެ އިތުރުވުމެކެވެ.
