އިސްތިއުފާ ދެއްވި ފަނޑިޔާރު ފައިސަލްގެ މައްސަލަތަކެއް އޭސީސީން ބަލަން ފަށައިފި
ހައިކޯޓުގެ ފަނޑިޔާރުކަމުން އިސްތިއުފާ ދެއްވި ފަނޑިޔާރު މުހައްމަދު ފައިސަލްގެ މައްސަލަތަކެއް އެންޓި ކޮރަޕްޝަން ކޮމިޝަން(އޭސީސީ)އިން ބަލަން ފަށައިފި އެވެ.
ހަތް އަހަރު ހައި ކޯޓުގެ ފަނޑިޔާރުކަމުގެ މަގާމު ފުރުއްވުމަށް ފަހު ފައިސަލް އިސްތިއުފާ ދެއްވީ މިއަދު އެވެ. ފައިސަލް އިސްތިއުފާ ދެއްވިއިރު އޭނާއާ ގުޅޭ މައްސަލަތަކެއް ޖޭއެސްސީން ދަނީ ބަލަމުން ނެވެ.
އޭސީސީގެ އޮފިޝަލަކު "ދެން"އަށް މިއަދު ވިދާޅުވީ ފައިސަލްގެ މައްސަލައެއް އެ ކޮމިޝަނުން ވެސް މިހާރު ބަލަން ފަށާފައިވާ ކަމަށެވެ.
އެއީ މަނީ ލޯންޑަރިންއާއި ކޮރަޕްޝަންގެ މައްސަލައެއް ކަމަށް ވެސް އޮފިޝަލު ވިދާޅުވި އެވެ. ނަމަވެސް އިތުރު ތަފްސީލެއް ނުދެއްވަ އެވެ.
ފައިސަލްގެ މައްސަލަތަކެއް ޖޭއެސްސީން ބަލަމުންދާ އިރު ހައިކޯޓުގެ އިތުރު ހަތަރު ފަނޑިޔާރެއްގެ މައްސަަލަވެސް ޖޭއެސްސީން ދަނީ ބަލަމުން ނެވެ.
ފައިސަލް އިސްތިއުފާ ދެއްވުމާ ގުޅިގެން ހައިކޯޓު ހިންގުން ވަގުތީ ގޮތުން ހަވާލުކޮށްފައިވަނީ ފަނޑިޔާރު އަބްދުﷲ ޖަމީލު މޫސާއާ އެވެ.
Ads by STO
