ގަވާއިދާ ހިލާފަށް ހިނގަމުން ދިޔަ 11 ވިޔަފާރިއެއް ބަންދު ކޮށްފި
ބިދޭސީން ގަވާއިދާ ހިލާފަށް ހިންގާ ވިޔަފާރިތައް ރިޕޯޓުކުރަން ހުޅުވާލާފައިވާއިރު މިހާތަނަށް ގަވާއިދާ ހިލާފަށް ހިންގާ 125 ވިޔަފާރިއެއްގެ ރިޕޯޓު ލިބިފައިވާކަމަށް އިގްތިސާދީ ތަރައްގީއާއި ވިޔަފާރިއާއި ބެހޭ ވުޒާރާއިން ބުނެފިއެވެ.
މިގޮތުން 20 ކެފޭ، 12 ރީޓެއިލް އައުޓްލެޓް، ދެ ގަރާޖު އަދި އެއް ގެސްޓްހައުސް ހިމެނޭހެން 35 ތަނެއް އިންސްޕެކްޓް ކުރެވި، 11 ވިޔަފާރިއެއް ވަނީ ބަންދުކޮށްފަ އެވެ. އަދި ގަވާއިދާ ހިލާފަށް ބިދޭސީން ހިންގާ ވިޔަފާރިތައް ހުއްޓުވުމަށްޓަކަައި، އެ ވުޒާރާއިން ގައުމީ ފެންވަރުގައި އެކުލަވާލާފައިވާ ނޭޝަނަލް ޓާސްކްފޯސްއިން އަންނަނީ ވިޔަފާރިތައް އިންސްޕެކްޓް ކުރުމުގެ މަސައްކަތް ކުރަމުންނެވެ.
ގަވާއިދާ ހިލާފަށް ވިޔަފާރި ކުރާ ބިދޭސީންނާ ގުޅޭ މައުލޫމާތު ރިޕޯޓްކުރުމަށް 27 ނޮވެމްބަރ 2025 ގައި ވުޒާރާއިން ކުރި އިއުލާނާ ގުޅިގެން މިހާތަނަށް 125 ރިޕޯޓެއްވަނީ ލިބިފައިވާއިރު މީގެތެރޭގައި 20 ކެފޭ، 12 ރީޓެއިލް އައުޓްލެޓް، 2 ގަރާޖް އަދި 1 ގެސްޓްހައުސް ހިމެނޭހެން ޖުމްލަ 35 ތަނެއް އިންސްޕެކްޓްކުރެވި، 11 ވިޔަފާރިއެއް ވަނީ ބަންދުކުރެވިފައިކަމަށް ވުޒާރާއިން ވަނީ ބުނެފައެވެ. ވިޔަފާރި ބަންދުކުރުމަށް ނޯޓިސްތައް ދީފައިވާ ސަބަބުތަކުގެ ތެރޭގައި، ވިޔަފާރީގެ ކުރުމުގެ ހުއްދަ ނެތުމާއި އަދި ދުންފަތުގެ ބާވަތް ވިއްކުމުގެ ހުއްދަ ނެތުން ހިމެނޭކަމަށާއި މީގެ އިތުރުން، ދިވެހިން ނިވާފަތްގަނޑަކަށް ބޭނުންކޮށްގެން ބިދޭސީން ހިންގަމުންދާ ވިޔަފާރިތައް ދެނެގަތުމަށް ތަހުގީގީ އިދާރާތަކާއެކު ދަނީ މަސައްކަތް ކުރަމުންކަމަށް ވުޒާރާގެ ބަޔާނުގައިވަނީ ފާހަގަކޮށްފައެވެ.
ބިދޭސީން ގަވާއިދާ ހިލާފަށް ވިޔަފާރި ހިންގާކަމުގެ އެއްވެސް މައުލޫމާތެއް ލިބިއްޖެނަމަ، ރަސްމީ ބަންދު ނޫން ކޮންމެ ދުވަހެއްގެ ހެނދުނު 8:00 އިން ރޭގަނޑު 8:00 އާ ދެމެދު 3333199 އަށް ގުޅުއްވައިގެން ނުވަތަ ވުޒާރާގެ ވެބްސައިޓް trade.gov.mv މެދުވެރިކޮށް ކޮންމެ ވަގުތެއްގައިވެސް ރިޕޯޓުކުރެވޭނެގޮތްވަނީ ހަމަޖެހިފައެވެ.
