ވީއައިއޭގައި ހުއްދަ ނެތި ސިމްއާއި ބޭރު ފައިސާ ގަނެ ވިއްކާތީ ފިޔަވަޅު އަޅަނީ
ވެލާނާ އިންޓަނޭޝަނަލް އެއާޕޯޓު(ވީއައިއޭ)ގައި ހުއްދަ ނެތި ސިމް އާއި ބޭރު ފައިސާ ގަނެ ވިއްކާތީ ފިޔަވަޅު އަޅާނެ ކަމަަށް އެ އެއާޕޯޓު ހިންގާ މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އިން ބުނެފި އެވެ.
ބޭރު ފައިސާ ވިއްކުމަށާއި އަދި ސިމް ވިއްކުމަށް ހާއްސަ ކައުންޓަރުތަކެއް ވީއައިއޭގައި ގާއިމުކޮށްފައި ހުރެއެވެ. އެހެން ނަމަވެސް އެ އެއާޕޯޓުގައި ގަވައިދާ ހިލާފަށް އެފަދަ ވިޔަފާރިތައް ކުރާ މައްސަލަ ފެންމަތިވެފައިވާ އިރު ދާދި ފަހުން ބިދޭސީއަކު ހުއްދަނެތި އެއާޕޯޓުގައި ޑޮލަރު ގަނެ ވިއްކައިގެން ވަނީ ހައްޔަރުވެސްކޮށްފަ އެވެ.
އެ މައްސަލައާ ގުޅިގެން އެމްއޭސީއެލްއިން މިރޭ ނެރުނު ބަޔާނުގައި ބުނީ އެއާޕޯޓުގައި އެއްވެސް ވިޔަފާރިއެއް ކުރެވޭނީ ލައިސަންސް އޮވެގެން އެމްއޭސީއެލްއާއެކު އެއްބަސްވުމެއް ހަދާފައިވާ ފަރާތްތަކަށް އެކަނި ކަމަށެވެ.
އަދި ވިޔަފާރިތައް ކުރެވޭނީ އެކަަމަށް ހާއްސަކޮށްފައިވާ ވަކި ކައުންޓަރުތަކަކުން ކަމަށާއި އެ ކައުންޓަރުތަކުގައި ތިބޭ މުވައްޒަފުން ވަކި ޔުނީފޯމެއް ލައި ފާސްވެސް އޮންނަން ޖެހޭނެ ކަމަށް އެމްއޭސީއެލްއިން ބުންޏެވެ.
އަދި އެއާޕޯޓު ބޭނުންކުރާ އެންމެހާ ފަރާތްތަކާއި އަދި ފަތުރުވެރިންނަށް ރައްކާތެރި ތަނަކަށް ހެދުމަކީ އެމްއޭސީއެލްގެ ޒިންމާއެއް ކަމަށާއި ހުއްދަނެތި ވިޔަފާރިކުރާ ފަރާތްތަކާ ދެކޮޅަށް ކަމާ ބެހޭ ފަރާތްތަކާ ގުޅިގެން ގާނޫނީ ފިޔަވަޅު އަޅާނެކަމަށް ވެސް އެމްއޭސީއެލްއިން ބުންޏެވެ.
Ads by STO
