ކުދިންގެ ސްކޫލް ފޮތް ދަބަހުގައި ހުންނަން ޖެހެނީ ކިހާ ބަރުދަނެއް؟
ސްކޫލް ކުދިންގެ ފޮތް ދަބަސް ބަރުވުމަކީ އަބަދުވެސް ކުރާ ޝަކުވާއެކެވެ. ހާއްސަކޮށް ޕްރައިމަރީ ގްރޭޑް ކުދިންގެ ފޮތް ދަބަސް ވަކިން ބަރެވެ. ދަބަސް ބަރުވުމުގެ ސަބަބުން ކުދިންގެ ސިއްހަތަށް ކުރާ ނޭދެވޭ އަސަރުތައްވެސް ގިނައެވެ.
އިންޑިއާގެ ސައިފީ ހޮސްޕިޓަލުގައި މަސައްކަތްކުރާ ސްޕައިން އެންޑޮސްކޮޕިސްޓް، ޑރ. އަގަމް ގާރިޔާ ވިދާޅުވަނީ ކުޑަކުދިންގެ ފޮތް ދަބަސް ވަކިވަރަކަށްވުރެ ބަރުވުމަކީ އެކުދިންގެ މައިބަދައަށް ގެއްލުން ލިބިދާނެ ކަމެއްކަމަށެވެ.
އެގޮތުން 3-5 އަހަރުގެ ކުދިންގެ ފޮތް ދަބަސް 700 ގްރާމަށްވުރެ ބަރުވެގެން ނުވާނެއެވެ. އަދި 6-8 އަހަރުގެ ކުދިންގެ ފޮތް ދަބަސް 900 ގްރާމަށްވުރެ ބަރުވެގެން ނުވާނެއެވެ. 9-12 އަހަރުގެ ކުދިންގެ ފޮތް ދަބަސް ހުންނަންވާނީ 1.2 ކިލޯއަށްވުރެ ބަރު ނުވާ ގޮތަށެވެ. އަދި 13-15 އަހަރުގެ ކުދިންގެ ފޮތް ދަބަސް 2 ކިލޯއަށްވުރެ ބަރުވެގެން ނުވާނެ ކަމަށް ޑރ. އަގަމް ވިދާޅުވެއެވެ.
އެގޮތަށް ބަރުދަން ކަނޑައަޅާފައިވަނީ އެކި އުމުރުފުރާގެ ކުދިންގެ ގައިގައި އާންމުކޮށް ހުންނަ ބަރުދަނަށް ބަލައިފައެވެ. އެގޮތުން ފޮތް ދަބަހުގައި އާންމުކޮށް ހުންނަންވާނީ އެކުދިންގެ ބަރުދަނުގެ 15 ޕަސެންޓަށްވުރެ ދަށްކޮށެވެ. އެހެންނޫންނަމަ، މައިބަދަ އިންބެލެންސްވުމާއި އިތުރު މަސްކުލަސްކެލެޓަލް އިޝޫތައް ދިމާވާނެ ކަމަށް ސިއްހީ މާހިރުންނާ ހަވާލާދީ ޑރ. އަގަމް ވިދާޅުވެފައިވެއެވެ.
ފޮތް ދަބަސް ކުދިންގެ ކޮނޑުގައި ރަނގަޅަށް އެޅުވުމަކީވެސް މުހިންމު ކަމެކެވެ. އެގޮތުން ދަބަސް ހުންނަންވާނީ ކުދިންގެ އުނުގަނޑުން 4-6 އިންޗި މަތީގައެވެ. އަދި ދަބަހުގެ ވާގަނޑު ހުންނަންވާނީ ކުއްޖާގެ ހަށިގަނޑު ސީދަލަށް ހުންނާނެހެން ރަނގަޅަށް ބާރުކޮށްފައެވެ. އޭގެ ސަބަބުން ހަށިގަނޑު ކުރިމައްޗަށް ބަޅުވެ، މައިބަދައިގެ މައްސަލަތައް ޖެހުމުން ދުރުކޮށްދެއެވެ. އަދި ދަބަސް އަޅުވައިގެން ހިނގާއިރު ހަށިގަނޑު ސީދަލަށް ދަމާލައިގެން ހުންނަން ބެލެނިވެރިންވެސް ކުދިންނަށް ހަނދާންކޮށްދިނުމަކީ މުހިންމު ކަމެކެވެ.
ސިއްހީ މާހިރުން ލަފާދޭ ގޮތުގައި ކުދިންނަށް ގަނެދޭންވާނީ ކޮނޑުމަތީ ސްޕަންޖް ލާފައި، ވާގަނޑު ފުޅާކޮށް ހުންނަ ދަބަހެވެ. އޭގެ ސަބަބުން ކޮނޑަށް ކުރާ ބާރާއި ކަރަށް ތަދުވުން ކުޑަކޮށްދޭނެއެވެ.
އާ އަހަރުގެ ކިޔެވުން ފެށެން ކައިރިވަމުންދާއިރު، ކުދިންނަށް ފޮތް ދަބަސް ގަންނައިރު މިއީ ބެލެނިވެރިން ސަމާލުކަން ދިނުން މުހިންމު ކަމެކެވެ.
