ލޯކަލް ކައުންސިލް އިންތިޚާބުގައި ވާދަކުރުމަށް 1633 ފޯމު ހުށަހަޅައިފި
ކުރިއަށް އޮތް ލޯކަލް ކައުންސިލް އިންތިޚާބުގައި ވާދަކުރުމަށް 1633 ފޯމު ހުށަހަޅައިފިއެވެ.
އިލެކްޝަންސް ކޮމިޝަން (އީސީ) ބުނީ، ހަފްތާއެއްގެ ތެރޭގައި އެ ކޮމިޝަނަން ހުށަހަޅާފައި ވަނީ ކައުންސިލްތަކަށް ވާދަކުރުމަށް 933 ފޯމާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަށް ވާދަކުރުމަށް ހުށަހެޅުނު 700 ފޯމު ކަމަށެވެ.
ސިޔާސީ ޕާޓީތަކުގެ ފަރާތުން ކައުންސިލްތަކަށް ވާދަކުރުމަށް މިހާތަނަށް 750 ފޯމު ހުށަހެޅުނުއިރު، އޭގެތެރެއިން ޝަރުތުހަމަވެ، ބަލައިގަނެފައި ވަނީ 617 ފޯމު ކަމަށާއި 113 ފޯމެއްގެ ޝަރުތު ހަމަނުވާ ކަމަށް އީސީން ބުނެއެވެ. އަދި ޝަރުތުހަމަނުވާ ކަމަށް ކަނޑައެޅުނު 41 ފަރާތަކުން އަލުން ފޯމު ހުށަހަޅާފައިވާ ކަމަށް ވެސް އެ ކޮމިޝަނުން މަޢުލޫމާތުދެއެވެ.
އަމިއްލަ ގޮތުން ކައުންސިލްތަކަށް ވާދަކުރުމަށް 203 ފޯމެއް ހުށަހަޅާފައިވާ ކަމަށާއި އޭގެތެރެއިން ޝަރުތުހަމަވެ ބަލައިގަނެފައި ވަނީ 133 ފަރާތެއްގެ ފޯމު ކަމަށް އީސީން ބުނެއެވެ. އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީއަށް ސިޔާސީ ޕާޓީތަކުގެ ފަރާތުން 565 ހުށަހެޅުނު ކަމަށާއި ޝަރުތުހަމަވާ 488 ފޯމެއް، އަމިއްލަ ގޮތުން ހުށަހެޅުނު 135 ފަރާތުގެ ތެރެއިން 86 ފަރާތެއްގެ ފޯމު ބަލައިގަނެފައިވާ ކަމަށް އެ ކޮމިޝަނުން ބުނެފައިވެއެވެ.
އިލެކްޝަންސް ކޮމިޝަނުން މި އިންތިޚާބަށް ފޯމު ހުށަހެޅުމުގެ ފުރުސަތު ހުޅުވާލާފައި ވަނީ މި މަހުގެ 17ވަނަ ދުވަހުއެވެ. އެގޮތުން ހުކުރު ދުވަސް ފިޔަވައި ކޮންމެ ދުވަހެއްގެ ހެނދުނު 8:30 އިން 15:30 އަށް ފޯމް ބަލައިގަންނާނެ ކަމަށާއި ހުކުރު ދުވަހު ފޯމު ބަލައިގަތުމަށް ހަމަޖެހިފައި ވަނީ 15:30 އިން 18:00 އަށް ކަމަށް ކޮމިޝަނުން މަޢުލޫމާތުދެއެވެ.
