ކުރީގެ ފިލްމުތަކުން މަޝްހޫރުވި ނައީމް ނިޔާވެއްޖެ
ކުރީގެ ޑްރާމާތަކުންނާއި ފިލްމުތަކުން މަޝްހޫރުކަން ހޯދި މުހައްމަދު ނައީމް ނިޔާވެއްޖެއެވެ.
އުމުރުން 71 އަހަރުގައި ނައީމް ނިޔާވީ މިއަދުއެވެ. ކަށުނަމާދު ކުރުން އޮތީ މިއަދު މެންދުރު ނަމާދަށް ފަހު މާލޭ އާސަހަރާ މިސްކިތުގައެވެ. ނިޔާވި ސަބަބެއް ނޭނގެއެވެ.
ފިލްމީ ދާއިރާގައި ނައީމް އެންމެ ގިނައިން ފެނިފައި ވަނީ ބައްޕަގެ ރޯލުންނެވެ. ނައީމް އެންމެ ބޮޑަށް މަޝްހޫރުވެފައި ވަނީ ދިވެހި ފިލްމް "ޒުލޭހާ"ގައި ލީޑް ރޯލުން ފެނުނު ޔޫސުފް ޝަފީއު (ޔޫއްޕެ)ގެ ބައްޕަގެ ރޯލުންނެވެ. އޭނާ ފެނިފައި ވަނީ ވަރަށް ރުޅިގަދަ ބައްޕައެއްގެ ރޯލްތަކުންނެވެ.
އޭގެ އިތުރުން ޔޫއްޕެއާއި މަރިޔަމް ނިޝާ ކުޅެފައިވާ "ގޮވިއްޖެ ނަދުރު" ލަވައިން ވެސް ވަރަށް ރުޅިގަދަ ބައްޕައެއްގެ ގޮތުގައި ނައީމް ފެނިގެން ގޮސްފައި ވެއެވެ.
ނައީމްވަނީ ކުރީގެ ގިނަ ޑްރާމާތައް ވެސް ކުޅެފައެވެ. އެ ޑްރާމާތަކުގައި ވެސް ގިނައިން ކުޅެފައި ވަނީ ބައްޕަގެ ރޯލެވެ.
