އެޕެއް މެދުވެރިކޮށް ޓެކްސީ ޚިދުމަތްދޭ ނަމަ ހުއްދައެއް އޮތުން މަޖުބޫރުކޮށްފި
މޮބައިލް އެޕްލިކޭޝަނެއް މެދުވެރިކޮށް ޓެކްސީ ޚިދުމަތްދޭ ފަރާތްތަކުން ވެސް ދަތުރުފަތުރާއި މަދަނީ އުދުހުންތަކާ ބެހޭ ވުޒާރާގެ ހުއްދައެއް އޮތުން މަޖުބޫރުކޮށްފިއެވެ.
ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން ބުނީ، ޓެކްސީ ސެންޓަރުތައް ހިންގުމާ ބެހޭ ޤާނޫނަށް އިޞްލާޙުތަކެއް ގެނެސްފައިވާ ކަމަށެވެ. އެ ގޮތުން:
އެޕްލިކޭޝަނެއް މެދުވެރިކޮށް ޚިދުމަތް ދިނުމަށް ގެނެވުނު އިޞްލާޙު:
ސެންޓަރުތަކުގެ އިތުރުން އެޕްލިކޭޝަނެއް މެދުވެރިކޮށް ޚިދުމަތްދޭ ނަމަ، ޚާއްޞަ ހުއްދައެއް އޮންނަން ޖެހޭނެ ކަމަށާއި ކާރުގައި ޚިދުމަތްދޭ ފަރާތްތަކަށް މަސައްކަތް ކުރެވޭނީ ގިނަވެގެން 2 ސެންޓަރުގައެވެ. އަދި ޑްރައިވަރު ލައިސަންސް ފީގެ ގޮތުގައި 250 ރުފިޔާ ނެގުމަށް ވަނީ ނިންމާފައެވެ.
މާލެ ސަރަހައްދުގައި ޚިދުމަތް ދިނުމަށް ގެނެވުނު އިޞްލާޙު:
މާލެ ސަރަހައްދުގައި ރަޖިސްޓަރީކުރާ ސެންޓަރުތަކުގައި މަދުވެގެން 50 އުޅަނދާއި 50 ޑްރައިވަރުން ތިބެންވާނެ ކަމަށާއި ޝަރުތު ފުރިހަމަ ނުވާ ސެންޓަރުތަކަށް، ޝަރުތު ފުރިހަމަ ކުރުމަށް 60 ދުވަހުގެ މުއްދަތެއް ދެވޭނެއެވެ. އަދި ދެވިފައިވާ މުއްދަތުގައި ޝަރުތު ފުރިހަމަ ނުކޮށްފި ނަމަ އެ ސެންޓަރެއްގެ ހުއްދަ ބާޠިލުކުރެވެނޭއެވެ. ނަމަވެސް އެ ސެންޓަރުގައި ރަޖިސްޓަރީވެފައިވާ ޑްރައިވަރުންނަށް އެހެން ސެންޓަރުތަކުގައި ރަޖިސްޓަރީވުމަށް 10 ދުވަހުގެ މުއްދަތެއް ދެވޭނެއެވެ.
ސަރުކާރު ހިއްސާވާ ކުންފުނިތަކަށް ޚިދުމަތް ދިނުމުގެ ފުރުސަތު:
ސަރުކާރު ހިއްސާވާ ކުންފުނިތަކަށް ދަތުރުފަތުރުގެ ޚިދުމަތް ދިނުމުގެ ފުރުސަތު ހުޅުވާލައި، އެފަދަ ޚިދުމަތެއް ފެށުމުގެ ކުރިން ވުޒާރާއަށް ޚިދުމަތުގެ ޕްލޭނެއް ހުށަހަޅައި، އެ ޕްލޭން ފާސްކުރަންޖެހެއެވެ. އަދި އެ ޕްލޭނުގައި އުޅަނދުތަކުގެ ޢަދަދާއި، ސަލާމަތީ ވަޞީލަތްތަކާއި، ޑްރައިވަރުންގެ ތަމްރީނުގެ މަޢުލޫމާތުގެ އިތުރުން ޚިދުމަތުގެ އަގުތަކުގެ ތަފްޞީލު ވެސް ހިމަނަން ޖެހެއެވެ.
މި އިޞްލާޙުތަކާ އެކު ޓެކްސީ ސެންޓަރުތަކަކީ މީހުން ދިރިއުޅޭ ތަންތަނާ ވަކިން ވަދެނިކުމެވޭނެ ގޮތަށް ތަރައްޤީކުރެވިފައި ހުންނަ އޮފީސްތަކަކަށް ވާންޖެހެއެވެ. އަދި އެ ސެންޓަރުތަކުގައި ކޮމްޕިއުޓަރާއި، ޕްރިންޓަރާއި، މުވާސަލާތީ ނިޒާމުތަކުގެ އިތުރުން ޑްރައިވަރުންނާއި އާންމުންނަށް މަޑުކޮށްލައިގެން ތިބެވޭނެ ސަރަހައްދެއް އޮންނަންޖެހޭނެ ކަމަށް ވެސް އެ އިޞްލާޙުގައި ބަޔާންކޮށްފައިވެއެވެ.
Ads by STO
