"ސަސްޓެއިނަބަލް ޓައުންޝިޕް"ގެ ބިންގާ އަޅައިފި
ސްޕެޝަލް އިކޮނޮމިކް ޒޯންސް (އެސްއީޒެޑް) ގެ ގާނޫނީ އޮނިގަނޑުގެ ދަށުން ރާއްޖޭގައި ތަރައްގީކުރަން އެންމެ ފުރަތަމަ ހުއްދަދިން "ސަސްޓެއިނަބަލް ޓައުންޝިޕް"ގެ ބިންގާ މިއަދު އަޅައިފިއެވެ.
ނ. އަތޮޅުގެ ދެކެނަންފަރާއި ދިގުފަރުގެ އިތުރުން ކުރަމާދޫ ހިމެނޭ ގޮތަށް ޒޯން ކަނޑައަޅާފައިވާ ސަރަހައްދުގައި ކުރިއަށް ގެންދާ އެ މަޝްރޫއުގެ ބިންގާ އަޅުއްވައިދެއްވީ ރައީސް ޑރ. މުހައްމަދު މުއިއްޒު އެވެ.
ކްރިސްޓަލް ހޯލްޑިންގްސް ޕްރައިވެޓް ލިމިޓެޑާއި ބްލޫރޮކް ގްރޫޕު ގުޅިގެން "ޕްރޮޖެކްޓް އައިލާ"ގެ ނަމުގައި އަޅާ އެ ޓައުންޝިޕްގެ މަޝްރޫއަކީ ރާއްޖޭގައި ޒަމާންވީ ފަތުރުވެރިކަމުގެ މޮޑެލްއިން ޑައިވާސިފައިޑް ގޮތެއްގައި އަމިއްލަ ފަރާތަކުން ކުރާ އެންމެ ބޮޑު އިންވެސްޓްމަންޓެވެ.
ޖުމްލަ އިންވެސްޓްމަންޓުގެ އަގު 790މިލިއަން ޑޮލަރަށްވުރެ ބޮޑު އެ މަޝްރޫއަކީ، ލަގްޒަރީ ފަތުރުވެރިކަމާއި، ރެޒިޑެންޝަލް ޑިވެލޮޕްމަންޓުގެ އިތުރުން ދުނިޔޭގެ ފެންވަރުގެ ސިއްހީ ހިދުމަތާއި ފަތުރުވެރިކަމާބެހޭ ތައުލީމާއި، ޒަމާނީ ދަނޑުވެރިކަމުގެ ކޮމްޕޯނަންޓްސް ހިމެނޭގޮތަށް ކުރިއަށް ގެންދާ ތަރައްގީގެ މަޝްރޫއެކެވެ.
އެ މަޝްރޫޢުގެ އެންމެ މައިގަނޑު އެއް ސިފައަކީ، މުޅި ޓައުންޝިޕަށް ބޭނުންވާ ހަކަތައިގެ އެންމެ ދަށްވެގެން 60އިންސައްތަ އިއާދަކުރަނިވި ވަސީލަތްތައް ބޭނުންކޮށްގެން އުފެއްދުމެވެ. ތިމާވެށްޓަށް ކުރާ ނޭދެވޭ އަސަރު ކުޑަކުރުމަށްޓަކައި ޒަމާނީ ކުނި މެނޭޖްކުރުމުގެ ނިޒާމުތަކާއި ފެނުގެ ނިޒާމުތައް ޓައުންޝިޕްގައި ގާއިމުކުރާނެ އެވެ.
އޭގެ އިތުރުން މި މަޝްރޫޢުގެ ސަބަބުން ގިނަ ވަޒީފާގެ ފުރުޞަތުތައް އުފެދި، ރާއްޖޭގެ ހުނަރުވެރި މަސައްކަތްތެރިން ބިނާކުރުމަށްވެސް މަގުފަހިވެގެންދާނެކަމަށް ވެސް އިކޮނޮމިކް މިނިސްޓްރީން ބުންޏެވެ.
އިކޮނިމިކް މިނިސްޓްރީން ބުނީ އެ މަޝްރޫޢުގެ ބައެއް ނިމި ފަތުރުވެރިންނަށް ހުޅުވިގެންދާނެކަމަށް ބެލެވެނީ 2028ވަނަ އަހަރުގެ ތެރޭގައި ކަމަށެވެ.
