ފުވައްމުލަކުގައި ގާއިމުކުރި ދަނޑުވެރިކަމުގެ ގައުމީ ލެބޯޓަރީ އިފުތިތާހުކޮށްފި
ފުވައްމުލަކުގައި ގާއިމުކުރި ދަނޑުވެރިކަމުގެ ގައުމީ ލެބޯޓަރީ އިފުތިތާހުކޮށްފިއެވެ.
މިއަދު ބޭއްވި ހާއްސަ ރަސްމިއްޔާތެއްގައި އެ ލެބޯޓަރީ އިފްތިތާހުކޮށްދެއްވީ އެގްރިކަލްޗާ މިނިސްޓަރު ޑރ. މަރިޔަމް މާރިޔާ އެވެ.
އެ ލެބޯޓަރީއަކީ ދަނޑުވެރިކަމުގެ ދާއިރާއިން ގައުމީ ފެންވަރުގައި ހިންގޭ ދިރާސާތަކާއި، ބަލި ދެނެގަތުމުގެ ވަސީލަތްތަކާއި، ހާއްސަ ލެބޯޓަރީގެ އިންފްރާސްޓްރަކްޗާގެ މަދުކަމުގެ ސަބަބުން ދިމާވާ އުނދަގޫތަކަށް ހައްލު ހޯދައިދިނުމުގެ މަގުސަދުގައި ގާއިމުކުރި ލެބޯޓަރީއެއް ކަމަށް އެގްރިކަލްޗާ މިނިސްޓްރީން ބުންޏެވެ.
އެއާއެކު ދަނޑުތަކުގެ އުފެއްދުންތެރިކަމާއި، ބަލިތަކާއި ފަނިފަކުސާ ކޮންޓްރޯލް ކުރުމުގެ އިތުރުން ގައުމީ ބަޔޯސެކިއުރިޓީ ވަރުގަދަކޮށްދޭނެ ކަމަށް ވެސް މިނިސްޓްރީން ބުންޏެވެ.
ދަނޑުވެރިކަމުގެ ގައުމީ ލެބޯޓަރީން ދަނޑުވެރިންގެ އިތުރުން، ދިރާސާކުރާ ފަރާތްތަކާއި، އެކްސްޓެންޝަން އޮފިސަރުންނާއި، ސިޔާސަތު ކަނޑައަޅާ ފަރާތްތައް ވެސް ހިމެނޭ ގޮތަށް ހިދުމަތް ދޭނެ ކަމަށް މިނިސްޓްރީން ބުންޏެވެ.
އެގޮތުން، ރާއްޖޭގެ އެކި ކަންކޮޅުތަކުގައި ދެމެހެއްޓެނިވި، މޫސުމަށް ހޭނޭ، އަދި ރައްކާތެރި ދަނޑުވެރިކަން ކުރިއެރުވުމުގައި ލެބޯޓަރީން މުހިންމު ދައުރެއް އަދާކުރާނެކަމަށް މިނިސްޓްރީން ބުންޏެވެ.
މި ލެބޯޓަރީ ގާއިމުކުރެވިފައިވަނީ ޔޫއެންޑީޕީގެ ޕްރޮޖެކްޓް ފޯ ޑިވެލޮޕިންގ ސަސްޓެއިނަބަލް އެގްރިކަލްޗަރަލް އިކޮނޮމީ(ޕީޑީއެސްއޭއީ) ގެ ދަށުންނެވެ.
Ads by STO
