ޕެންޝަން އޮފީހުގެ ބޯޑުގެ ޗެއާގެ މަގާމުން އިނާޒް އިސްތިއުފާ ދީފި
ޕެންޝަން އޮފީސް މެދުވެރިކޮށް ސަރުކާރުން ނަގަން މަސައްކަތް ކުރާ ކަމަށް ބުނާ 2.4 ބިލިއަން ރުފިޔާގެ ބޮޑުގެ މައްސަލައިގައި، އެ އޮފީހުގެ ބޯޑުގެ ޗެއާޕާސަންގެ މަގާމުން އަހުމަދު އިނާޒް އިސްތިއުފާ ދެއްވައިފިއެވެ.
ޕެންޝަން އޮފީހުން މިދިޔަ އޮކްޓޯބަރު މަހު ވަނީ މަރުކަޒީ ބޭންކް، އެމްއެމްއޭ އާއެކު ފައިސާގެ މުއާމަލާތެއް ކުރުމަށް ފާސްކޮށްފައެވެ. އެ މުއާމަލާތަކީ އެ އޮފީހާ ގުޅިގެން އެމްއެމްއޭއިން ސެކަންޑަރީ މާކެޓުގައި ސަރުކާރުގެ ބޮންޑެއް ވިއްކުމެވެ. އެކަން ކުރަނީ ފައިސާ ޗާޕުކުރުމަށް ކަމަށް ބުނެ އިދިކޮޅު ފަރާތްތައް ހިމެނޭހެން ގިނަބަޔަކު ދަނީ ނުރުހުން ފާޅުކުރަމުންނެވެ.
މި މައްސަލައިގައި އިސްތިއުފާ ދެއްވިކަން އިއުލާނުކޮށް އިނާޒް އެކްސްގައި ކުރެއްވި ޕޯސްޓެއްގައި ވިދާޅުވީ 2.4 ބިލިއަން ރުފިޔާގެ ބޮޑުގެ މައްސަލައިގައި ގިނަ މަޝްވަރާތަކެއް ކުރެވުނު ނަމަވެސް، ދެމެހެއޓެނިވި ހައްލެއް ހޯދިފައިނުވާ ކަމަށެވެ.
އެހެންކަމުން މަގާމުން އިސްތިއުފާ ދެއްވާ ކަމަށާއި، ދުއާއަކީ ދައުލަތުގެ މާލީ ކަންކަން މިއަދަށްވުރެ ހަރުދަނާވެ، ދުރު ވިސްނުމުގެ ސިޔާސަތުތަކުން އިސްލާހުވުން ކަމަށް އިނާޒް ވިދާޅުވެފައިވެއެވެ،
އިނާޒް އިސްތިއުފާ ދެއްވިއިރު، މިދިޔަ އޮކްޓޯބަރު މަހު ޕެންޝަން އޮފީހުގެ ބޯޑުން އަހުމަދު ސަރުވަޝް އާދަމްވެސް ވަނީ އިސްތިއުފާ ދެއްވާފައެވެ. އޭނާ ވިދާޅުވެފައިވަނީ އެއީ ގާނޫނީ ގޮތުންނާއި އިގްތިސޯދީ ގޮތުންވެސް ބޮޑެތި މައްސަލަތަކެއް ދިމާވާނެ ކަމެއް ކަމަށެވެ.
Ads by STO
