ބިދޭސީ މީހާގެ މަރު: އެކްސްކަވޭޓަރުގެ ޑްރައިވަރު ހައްޔަރުކޮށްފި
ތިލަފުށިން މިދިޔަ މަހުގެ 26 ވަނަ ދުވަހުން ގެއްލިގެން ހޯދަމުން ދަނިކޮށް މަރުވެފައި އޮއްވައި ފެނުނު ބަންގްލަދޭޝް މީހާގެ މަރުގެ މައްސަލައިގައި ލަންކާ މީހަކު ހައްޔަރު ކޮށްފިއެވެ.
ތިލަފުށި ވެމްކޯ ސައިޓުން ގެއްލުނުތާ 2 ދުވަސް ފަހުން މަރުވެފައި އޮއްވައި ފެނުނީ އަމީން މިއާ 24،އެވެ.
އެ މައްސަލައާ ގުޅިގެން ފުލުހުން މިއަދު ބުނީ އަމީން މިއާ މަރުވުމަށް މެދުވެރިވެފައި ވަނީ މިމަހުގެ 26 ވަނަ ދުވަހުގެ މެންދުރު ވަގުތެއްގައި ކުނި ޖަމާކޮށްފައިވާ ސައިޓްގެ ބައެއްގައި އެކްސްކެވޭޓަރަކުން ކުނި ނެގުމުގެ މަސައްކަތް ކުރަމުން ދަނިކޮށް، އޭގެ ދަތްގަނޑުން ޖެހި ވެއްޓިގެން ކަމަށެވެ.
މި ހާދިސާ ގައި އެކްސްކެވޭޓަރުން ކުނިތައް އެތަނުގެ ކައިރިން އެހެން ދިމާލަކަށް ބަދަލުކުރުމުގެ ތެރޭގައި އަމީން މިއާގެ ހަށިގަނޑާއެކު ކުނިތައް ބަދަލުކޮށް، މީހާގެ ގައިމައްޗަށް ކުނިތައް އެޅިފައިވާ ކަމަށް ފުލުހުން ބުންޏެވެ.
ފުލުހުން ބުނީ އެ ސަރަހައްދުގައި ހުރި ސީސީޓީވީ ފުޓޭޖުން ފެންނަ ގޮތުގައި، އެކްސްކެވޭޓަރުގެ ދަތްގަނޑުން އަމީން މިއާގެ ގައިގައި ޖެހުނު ނަމަވެސް، މެދުކެނޑުމެއްނެތި މަސައްކަތް ކުރިއަށް ގެންގޮސްފައިވާ ކަމަށެވެ.
މި މައްސަލައާ ގުޅިގެން އެ އުޅަނދު އޮޕަރޭޓްކުރި 32 އަހަރުގެ ސްރީލަންކާ މީހާ ކޯޓު އަމުރެއްގެ ދަށުން ފުލުހުން މިހާރު ވަނީ ހައްޔަރު ކޮށްފައެވެ. ފުލުހުން ބުނީ ތަހުގީގަށް ކުރިއެރުން ލިބޭވަރަކުން ހާމަކުރާނެ ކަމަށެވެ.
Ads by STO
