މިއަހަރުގެ ތެރޭގައި ކޮންޓެއިނާ ސްކޭނަރެއް ގެނެސް އޮޕަރޭޝަނަށް ގެނެވޭނެ: މިނިސްޓަރު
މި އަހަރުގެ ތެރޭގައި ކޮންޓެއިނާ ސްކޭނަރެއް ގެނެސް އޮޕަރޭޝަނަށް ގެނެވޭނެ ކަމަށް ހޯމްލޭންޑް މިނިސްޓަރު އަލީ އިހުސާން ވިދާޅުވެއްޖެއެވެ.
ރިޔާސީ ބަޔާނާ ގުޅޭގޮތުން ދައުލަތުގެ މީޑިއާގައި ވާހަކަ ދައްކަވަމުން މިނިސްޓަރު ވިދާޅުވީ ކަސްޓަމްސްގެ ބުރަ މަސައްކަތުން މިހާރު ރާއްޖެއަށް އެތެރެވާ ކޮންމެ ޕެކޭޖެއް އަންނާނީ ސްކޭން ކުރެވިގެން ކަމަށާއި މީގެ ކުރިން ރާއްޖެއަށް ވައިގެ މަގުން އެތެރެ ކުރާ ޕެކޭޖުތައް ރެންޑަމް ސްކްރީނިން ހެދިނަމަވެސް މިއަދު ހުރިހާ ޕެކޭޖެއް ސްކޭންކުރާ ކަމަށެވެ.
އަދި މިއަހަރުގެ ތެރޭގައި ކޮންޓެއިނަރ ސްކޭނަރެއް ގެނެސް ރާއްޖެ ގެންނަ ބޮޑެތި ކޮންޓެއިނަރުތައް ސްކޭންކޮށްގެން ނޫނީ ކާގޯ ދޫނުކުރާނެ ކަމަށްވެސް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ރާއްޖެއަށް މަސްތުވާތަކެތި އެތެރެވާ މިންވަރު މަދު ކުރުމަށްޓަކައި ވަރަށް ބުރަ މަސައްކަތްތަކެއް ކުރައްވަމުން އަންނަ ކަމަށެވެ.
އަދި މަސްތުވާތަކެތީގެ ވިޔަފާރިތައް ހުއްޓުވުމަށްޓަކައި ދިވެހި ފުލުހުންވެސް ބުރަ މަސައްކަތްތަކެއް ކުރައްވާކަން ފާހަގަކުރައްވައި މިނިސްޓަރު ވިދާޅުވީ މަސްތުވާތަކެތީގެ ވިޔަފާރި ކުރާ ފަރާތްތައް ހުއްޓުވުމަށް ފެށި އޮޕަރޭޝަން އަލިމަގަކީ ކާމިޔާބު އޮޕަރޭޝަނެއް ކަމަށެވެ.
ރާއްޖޭގައި މަސްތުވާތަކެއްޗަށް އޮތް ޑިމާންޑް ހުއްޓުވުމަށް ފަރުވާގެ ނިޒާމު ހަރުދަނާ ކުރުމުގެ ތެރެއިން އެންމެ ބޮޑު އިސްކަމެއް ދެއްވަނީ ނޭޝަނަލް ޑްރަގް އެޖެންސީގެ އިންފްރާސްޓްރަކްޗަރ ތަރައްގީ ކުރުމުގެ މަސައްކަތް ކަމަށްވެސް މިނިސްޓަރު ވިދާޅުވިއެވެ.
މަސްތުވާތަކެތީގެ މައްސަލައަށް ހައްލު ގެނައުމަށް ސަރުކާރުން ވަނީ ގާނޫނަށްވެސް އިސްލާހުތަކެއް ގެނެސްފައެވެ.
Ads by STO
